Zakariyya 11 - NABUWWA KEE MALIKWA

ISRAAYIL NAQBOYTIITIH BAATI

¹ Lubnaaney, afa fak! Sarid cooxuy ku addal yanit gira gexxa'gidih afa fak.

² Saagan cooxow, weeqaay, boogisa. Sarid cooxuy Lubnaanal yenehiyya yiggiriqeh. A coox kaxxa qax-maqaane luk yene'mmay, a saaku yiggiriqeh gaba kaleh. Basan addal yan garsâ-cooxow, weeqaay, boogisa. Kaxxa garbo yirgiqeenih ragid cabsiiseenih.

³ Baaxoh abbobti rookah abta booge ankacisay! Itta luk sugen nabna a saaku weenimih boogisiyyat yanin. Ordon weeqaytih dariifal ten garbo booxah raqteemih, a saaku lubooka abta weeqa ankacisay! Lubooka woo garbot dabaaqah sugte.

⁴ YALLAY yi Dagelta kinni iyyeemih, «Yasguudoonu waan illit loynah yan num tik!

⁵ Illi xaamita mari, isih faxa saaku, faxah yan ida akkiiy maruw akki usgudda heenih niyya akak aban. Takkay immay tahah ken digaaltam matan. Illi yaylamme mari, ‹Alcamdulillaah nanu gaddaleela kinnino› iyyaana ikkal, qiden lac ken lac kinnih immay akah maxuwaawan» yok iyye.

⁶ Too waqdi yok iyyeemih, «Anu ahak wadir a baaxol enna 'ya marah maxuwaawaay, ken macata. Kulli num, garil kaak yan num akkeey, amol kaak yan amoytih gabal hee akkeyyo. Too mari baaxo bayseleeh, anu kaadu woo baaxo baysoonay ken axceyyo. Tah intam yoo YALLA» iyye.

⁷ Zakariyya iyyeemih, «Tonna leemiik, yasguudoonu waan illit loynah yan num ekkeeh; eddeey edde xukkot yan illit duwah gace. Namma caxxa gabat hee. Too namma caxxak caxxak teenak migaaqah ‹Maqaane› exceeh; aki caxxak kaadu migaaqah ‹Egla› exce. Too illi dacriseh.

⁸ Sidooca duweenay yoo niqba yeneeh; sarra ken faxe cineeh, inki alsih addat wokkek ken xiiriyeh.

⁹ Tohuk lakal illiy duwah edde anik exceemih, ‹Illow, anu innih tahaysa sin duwat magaca. Bayu waa illi siinik bayay; rabam faxa illi siinik rabay; raaqe illi titta bayisay› 'yaanam exce.

¹⁰ Sarrak ‹Maqaane› deqsita caxxa butukku hee. Toh akah abem, anu innih baadal tan ummat lih heeh suge xagana bayisa'gidih abe.

¹¹ Too ayrok wadir too xagni maraaqinna. Taaxige xukkot yan illi yoo wagitak yen. Too mari, aham akah abem, YALLIH amri kinnim abinal yok yeexegen.

¹² Keenik exceemih, ‹Yi cawal yoh taceenik yoh acuya; manaca inteenik raqsita› keenik exce. Toh keenik exce waqdi soddom garsi yoh yeceen» iyye.

¹³ YALLI yok iyyemii, «Ama dago lakqoy yoh taguudem yekkeleenihiyya, yi Qibaadah Qaril lakqo elle daanisan sandugut qidey» yok iyye. Tonnal too lakqo Qibaadâ Qarik lakqo elle daanisan aracal hee.

¹⁴ Tohuk lakal nammayhaytô caxxay «Egla» deqsitahiyya iggileh. Tohuk gexxaamah, Yuudâ kee Israayil egla tiddigilleh.

¹⁵ Tohuk lakal YALLI yok iyyemii, «Taway kaadu illi nagay duwe waa duweenih innah gac.

¹⁶ Macaay intek, anu inni illit duwah num heeh an. Too duweeni bayele akak iyyen illih amo mawagita. Baye illi magorrisa. Biyaakite illi maqaffoysa. Hinnay kaadu qaafiyatak yan illi mayayloola. Takkay immay gabul le illik cado akmeleeh, xukcun keenik yirgiqeh baaxot qidele.

¹⁷ Woyyow tu xiqe waa duweenat takku waytaama! Isi illih amo mawagitinna. Gaba kee migdi inti kaak seefit mudduntay! Gaba kaak kaftay! Migdi inti waay!» iyye.