Zakariyya 10 - NABUWWA KEE MALIKWA

YALLI ISI MARA WADELE

¹ YALLI siinih aceelek, dabayba rob siinih rada'gidih kaa kallaca. Rob xagarat le qamburre rubtaah, woo qamburreh addak robti tiffa rubtaah baaxo anxaxxossam YALLA.

² Duyye kallactaanam tu matanfiqa. Faal qida mara tu esserten waqdi, too mari siinil yaceem diraaba. «Nuble soonoh maqna siinih warsennok aytikuma» siinik iyya mari kaadu yeceem deedalaay, sahda gitak makot beyan. Tohuk gexxaamah ummat, baye illih innah, finqat tan. Abbay ken miraacisa maloonuuy, edde yaniinim gadaamah adda.

³ YALLI iyyeemih, «Yi marih amol reeda leh yan allahih-baaxoh mara anqibeeh, ken digaalu waah an. Yuudâ mari yi mara. Ken amo dacrissu waytam yoo. Tah abtu waytam, yoo YALLAY Nabaamak Nabahiyya. Carbi farasay maqar le yoh akkelon.

⁴ Yuudâ marih addak baaxo xiinisaah, sahda miraacisa mara kee qaskar abbobti awqele. Oson rakiibo akkelon. Siraq edde daabisan birtaay, carbi edde aban macaxi innah qande le mara akkelon.

⁵ Yoo wakalih loonumih sabbatah, Yuudâ-mari qeebil agiiray naqboytit kallat tayborooroke akkelon. Faaris amok qeebi abta labhak kinni way qeebil ayselon.

⁶ «Yuudâ mara maqar bahsiiseyyo. Israayil ummat umaanek cateyyo. Keenih xuwaawaah; tohih sabbatah ken baaxo ken gacseyyo. Duma keenil baahem edde hawwenna haan maqaane keenih abeyyo. YALLAY ken Dageltah yanihiyya kinniyooh; yoo fanah aban dooqa keenih oggoleyyo.

⁷ Israayil mari carbil celeema akkele. Qinabak bicsen kamri yooqobe marih innah farcaanak gacelon. Keenik rade mari taham kassiteleeh; too waqdi YALLI ken kaxxa abbobtih xiqem kassitak ruffu axcelon.

⁸ Inni ummatah seeceyyooh, tittal ken gacseyyo. Umaanek ken cateyyo. Mangah duma akkuk sugeenih gideh ken abeyyo.

⁹ Fixixih baadal tan ummat fanat ken ruuba way, elle yanin xer baaxol yoo kassitelon. Ken kee ken xaylo saaboh raaqeleeh, isinni baaxo titta lih aduurelon.

¹⁰ Masri kee Assuuriyak ken baaxo fanah ken gacseyyo. Ken baaxol ken nookiseyyo. Gilqad kee Lubnaanal ken nookiseyyo. Ummat baaxok amaggele.

¹¹ Kaxxa gibdaabina keenil yakku waa badak adda gacca 'yeenih gexaanam faxan waqdi, yooy YALLAH yani woo badih haffo keenih aatukeyyo. Baddi haffo soolele. Niil weeqaytuy adda le kafinuk cabeyyo. Assuuriyah yooboke mari le kaxxiina ken cabsiiseyyooh, rammita mara ken abeyyo. Masri maray kaxxa qande le, qande cabsiiseyyo.

¹² Inni marat qande heeyyo. Yoo aqbudeloonuuh, yi yab aabbelon. Tahat yabtam yoo YALLA» iyye.