Zakariyya 1 - NABUWWA KEE MALIKWA

YALLI ISI MARAK, YOL UDUURA, IYYE

¹ Daryawes Fursi-rasul tu edde taade malik yakkeemih nammeyhaytô-sanatak bacarhaytoh alsat, YALLI Zakariyyal farmo oobise. Zakariyya Barkiyya deqsita numih baxak ten. Barkiyyah abba Qiddo deqsita numuk ten.

^2-3 YALLI wacyih Zakariyyak iyyeemih, «Gexay ummatak intaamah: Yoo YALLAY Nabaamak Nabahiyya sin kaxxa abbobtit kaxxam bagcarrite saaku luk en. Awayah tu gactek siinik axceemih, Yol uduuraay, anu kaadu siinil aduureyyo.

⁴ Isinni kaxxa abbobti makkina. Sin kaxxa abbobtih dumî-dabaanal yi nabuwwa yi farmo warisak sugteeh; ‹Edde gexxan uma gitak raaqaay, dambit maasina. Toh intam YALLAY Nabaamak Nabahiyya›, 'yaanam keenik axcuk sugen. Takkay immay oson yi nabuwwah yab ankacisak masuginnoonuuy; anu aba axcem oggolak masuginnon.

⁵ A saaku sin kaxxa abbobti kee woo nabuwwak num mayan.

⁶ Nabuwway yi naqoosah tanihiyya lih yaabak, ‹Ama marak maabina inxicaay, yi yab macinina keenik inxica› axcuk suge'mmay, sin kaxxa abbobti tohut baaqid mahanna. Tohih sabbatah gibdi biyaakah biyaakiten. «Toh yublen waqdi sin kaxxa abbobti, ‹YALLAY Nabaamak Nabahiyya ascubuk sugem abeeh; akah iyye'nnal, nek uma-caalat kee uma taamay abnehiyyah nee digaale› axcuk, isinni dambik toobiteenih, 'yaanam keenik inxic» kaak iyye.

ZAKARIYYA SIRRIH FAARIS YUBLE

⁷ Daryawes tu edde taade malik edde yekke nammeyhaytô-sanatak taban kee inikhaytoh alsay Qibraan afat Sebat deqsitahiyyak, labaatanna kee fereyhaytoh ayrot, Nabi Zakariyya YALLIH wacyi yubleeh; iyyeemih:

⁸ Numuy qasa farasih amot yani uble. Kaa elle ublem, goloh addal cebak-cooxih fanak ten. Kaak salafak qasa faroosaa kee burraacin faroosa kee qado faroosa soolah uble.

⁹ Maqna akak yoh warsa'gidih, malaykatti tokkel suge. Tah uble waqdi woo malaykattuk, «A faroosa akkel akah tanim macaay?» exce. Malaykatti, «Ama faroosak maqna koh warisu waa» yok iyye waqdi,

¹⁰ cebak-cooxih fanak yen num, «Amah, YALLI, addunyal caalat elle yani'nna wagteh yamaate'gidih, baaxo fan ruube faroosa» yok iyye.

¹¹ Too faroosah amot yan mari, YALLIH malaykattuy cebak-cooxih fanak soolah yanik inteemih, «Addunya fanah genxeh nubleeh; inkih yan baadal ummat amaanah xiinan» iyyen.

¹² Too waqdi YALLIH-malaykatti, YALLAK iyyeemih, «Nabaamak Naba YALLAW, taham fanah Yarusalaam magaala kee Yuudâ magaaloolil tan ummatah malcina-tabanih sanatih gide naqabut sugte. YALLAW, ahaysa ku racmatta keenil obtu waytam maa saaku?» iyye.

¹³ Too waqdi YALLI, yo'lih yaabe malaykattul meqe yaabay ruffu sinam haa gacse.

¹⁴ Too malaykatti, «A farmo ummatat qid» yok iyye. «YALLAY Nabaamak Nabahiyya siinik iyyaamah: ‹Anu Yarusalaam kee Siyon qaley teetil tani afqadook kiciyyooh; teetit umam takkem yoo biyaktah.

¹⁵ Ama kaxxa amaan kee wagarih xiina marah kaxxam bagcarriteh an. Keenit akah bagcarritem, anu dago gide inni marat bagcarriteh sugeeh; too saaku yi mara kaxxam biyaaken.

¹⁶ Ahaysa Yarusalaam emeeteh aniih, teetih racmateyyo. Yi Qibaadah Qari nammeyhaak xiseloonuuh, Yarusalaam kaadu nammeyhaak xissiimele. Tah intam yooy YALLAY Nabaamak Nabahiyya› 'yaanam siinik iyya, keenik inxic» yok iyye.

¹⁷ Tohuk kalah too malaykatti yok iyyeemih, «YALLAY Nabaamak Nabahiyya iyyaamah: ‹Yi magaaloolil yan mara gaddaloola abeyyo. Yarusalaam qagitak anu doorite magaala akkeleeh; tet cateyyom ummatah waris› » yok iyye.

GAYSOOSI WACYIH UBLE

¹⁸ Tohuk kalah gersi wacyi ubleeh; tohuu, awur gaysoosi fereey takke.

¹⁹ Woo yo'lih yaabak suge malaykattuk, «A gaysoosik maqna macaay?» exce. «Amah, baadal kaxxa doolatwah ten doolatway Yuuda kee Israayil kee Yarusalaam ummat fixixih rubtehiyyah ceelallo» yok iyye.

²⁰ Tohuk lakal YALLI, affara numuy maataka gabat leeh naggaareenih tani yoo yuybulle.

²¹ «A mari macah yemeete?» exce. Too waqdi yok iyyemii, «Akah yemeeteenim, Yuudâ-marat teeqeteeh ken fixixisse doolatwal umâ-yabulih tanim baahaana'gidiiy; too doolatwa baysaana'gidih yemeete mara» iyye.