Yoosuwa 9 - NABUWWA KEE MALIKWA

GIBQON MARI YOOSUWA DUQUURUSE

¹ Israayil mari gee nasri, Ordon weeqaytuk ayrô-culma le kabu raqqa 'ta amoytitiy qaleelah tan baaxo kee ayrô-culmat raqta mango koomaami le baaxol tanihiyya toobbe. Tonnah kaadu, Maditraaniyah badak afoofil tan gubbih tan baaxok xabba haanamaay Lubnaan baaxoh amma 'yaanam tan baaxoh amoytitte inkih ta yab toobbe. Tohum Ciita kee Amooraay Kanqaan kee Feriidaay Ciiwi kee Yabuusah yooboke marih amoytittek ten.

² A mari inkih, inki aracal mododeenih, Israayil kee Yoosuwat qeebi abaana'gidih, qaskarak loonum sitta fan gacsen.

³ Takkay immay Gibqon deqsitta baaxoh maray Ciiwih yoobokehiyya Yoosuwa Yeriko kee Qaay magaalal baahem yoobbeenih sugen.

⁴ Tonna leemiik qeebi hinna'mmay kaa duquurusaanamal malsen. Tembexe giriibat tan daro kee dambiyo le sooriitit heen qinab kamri danoonal eerra heenih ken fan yemeeten.

⁵ Labha kaadu qanxixe sarat gacca 'yeenih ibat kaadu yembexe kabel hayya heenih keenil yemeeten. Kaffa 'teh orongoobitte gaqambo kaadu gabat luk yemeeten.

⁶ Sarrak Yoosuwa elle yinfiddige ikke fan yemeeteeniih; tokkel Yoosuwa kee Israayil marak iyyeenimih, «Xer baaxok yemeete mara kinninooh, qalla siinit haysinnam fanxa» keenik iyyen.

⁷ Too waqdi Israayil mari keenil gacsemii, «A xayi aracak yemeete mara kinnitoonum keh, macak naaxigeh nan. Qalla siinit mannal hayna?» keenik iyyen.

⁸ Too waqdi Yoosuwak iyyeenimih, «Nanu siinih taaminna'gidih yemeete mara kinnino» kaak iyyen. Too waqdi Yoosuwa, «Isin maa mara kinnitoonuuh, akak temeeteenim ankeey?» keenik iyye.

⁹ Oson too waqdi kaak iyyeenimii, «Nanu YALLAY sin Dagelta kinnihiyyah xaagu noobbeh xer ikkek nemeete. YALLI Masril abba heem inkih noobbeh.

¹⁰ Wohuk kalah YALLI, Amoorah yooboke namma amoytay Ordon weeqaytuk ayrô-mawqa le kabut raqta baaxoh amoytittek yenehiyyak abem noobbeh. Tohum Sicon deqsitak yen malikiy Cesbon deqsitak ten magaalal yenehiyya kee Qoog deqsitak yen malikiy Basan deqsitta baaxol, Qastarot deqsitta magaalal yenehiyyak ten.

¹¹ Too waqdi ni idoola kee ni baaxol enna 'ya mari inkih, ‹Safarah sakayi haysitay Israayil marah fanah gexaay, keenit ongoorowa› 'yaanam nek iyyen. Kaadu ‹Ken taamat gacaay qalla ken lih haysita› nek iyyen.

¹² Ama tablen gaqambo, siinit nangoorowe'gidih, safarah ninni baaxok ugunne saaku alasneeh; a saaku akah tablen innah, kaffa 'teh ugguqawteh tan.

¹³ A qinab kamri edde yan soorit keewoh qinab kamrik kibne saaku qusbuk yen. Awayah tu gactekiiy akah tablen innah qanxixeh yan. Sara kee kabel abneh nan xer safarak gexxaamah nek yembexeh» iyyen.

¹⁴ Sarrak baahen maaqok tu takkem Israayil marah yeceeniih; Israayil mari woo maaqo haysiteh immay fayu YALLA messerinnon.

¹⁵ Yoosuwa qalla ken lih haysiteeh; yanoonay ken iyye. Israayil marih abbobti Yalla-kee-xagana ken lih haysitteeh; keenil make waanamih xagana keenih culen.

¹⁶ A qalla haysiteenimih sidiica ayro suggu 'yeenik lakal, a mari keenik garit tan baaxoh mara kinnoonum yeexegeenih.

¹⁷ Too waqdi Israayil mari safarah ugteeh; sidiica ayrok lakal, Gibqon mari elle suge magaalooli gufen. Woo magaaloolih migaq Gibqon kee Kafiira kee Beerot kee Kiryat-Yaqaarim deqsitta magaaloolik ten.

¹⁸ Tonna'mmay Israayil marih abbobti Gibqon marah YALLAY Israayil doore Dagelta kinnihiyyah migaaqal culen Yalla-kee-xagna kassiteeniih; tohoysa ken qidaanam keenih mabicinna. Tohih sabbatah Israayil mari yakkeenimiik, «Ah macah takke?» 'yaanamah Israayil abbobtil daqwat aben.

¹⁹ Israayil abbobti keenik inteemih, «Nanu YALLAY Israayil doore Dagelta kinnihiyyah migaaqal Yalla-kee-xagna keenih culleeh; tonna leemiik tu keenil bahnam madudna.

²⁰ Too Yalla kee xaganih sabbatah, yanoonay ken innam nel tan. Yanoonay ken axce waynek, Yalli akah nee digaalele.

²¹ Yanoonay immay, boco neh aggile loonuuh, lee kaadu xaanuh neh baahelon» 'yaanam iyyeeniih; tohul malsen.

²² Tohuk lakal Yoosuwa, «Gibqon mara yol baaha» iyyeeh; ken baahen waqdi, «Akkel xayi aracal taniiniih, xer baaxok nemeete 'yaanam macah nek inteeniih, nee macah duquurussen?

²³ Yi Dagelti sin abaareeh; woo abaaroh sabbatah isin ahaysa boco yaggileeh, lee weeroh, yi Dagelta elle yaqbuden taahirik yan aracah bahta naqoosa akkettoonum ixiga» keenik iyye.

²⁴ Oson too waqdi iyyeenimii, «Tah innem kinni. Tah akah innem, YALLAY sin Dagelta kinnihiyya isin bisoh gutuqak elle tamaateenimil, a inkih tan baaxo siinih yeceeh; tet addal yan mara qiddaana'gidih, isi naqasuh yen Muusa amrisem noobbeeh; toh numma kinnim neexegeh. Tohuh siinik meysinneh sugneemih sabbatah inne. Ninni roocih meysitak sugne.

²⁵ Taway nanu edde nanim sin gubak tanih tanikii, siinit ceelinnaanim nek abbaasita» iyyen.

²⁶ Tohuk lakal Yoosuwa amo keenik dacriseeh; Israayil marak, «Ken maqidina» iyye.

²⁷ Takkay immay naqoosa ken abe. Israayil mara kee YALLAH sadgat elle aban aracih bocô-diglo kee leê-weerot ken hee. Oson a saaku fan YALLI isi qibaadah doore aracal too taamat yanin.