Yoosuwa 24 - NABUWWA KEE MALIKWA

YALLIH QAHDIH NAMMEYHAAK ABEN XAGANA

¹ Yoosuwa Seekem deqsita aracal Israayilik rade mara inkih gaaboyse. Tokkel idoola kee kedoh abbobtiiy cokmaaba kee ummattâ qaskarih abbobtih inkih seeco abeeh; oson Yallih Qibaadah Siraqih foocal gaaboowen.

² Too waqdi Yoosuwa keenik iyyemii, «YALLAY Israayil doore Dagelta kinni siinik iyyaamah, ‹Dumah yan saaku sin kaxxa abbobti Furaat weeqaytuk woo qaxal guubuh yeneeniih; too dabaanal deedaltamay Yalla iyyeenihiyya aqbuduk yenen. Toh abak teneemik numuk teeni Abraahim kee Nacor abba Terac deqsita numuk ten.

³ Sarrak anu sin kaxxa-abba Abraahim Furaat weeqaytuk daga le kabu raqta baaxok beyya heeh inkih tan Kanqaan baaxo kaa miraacise. Tokkel mango abuusih abba kaa abe. Kaadu Iscaak kaah ecee.

⁴ Iscaakah Yaqkuub kee Qiiso ecee. Qiisoh ikoytah woo qaleela le baaxoy Edom deqsittahiyya ecee. Yaqkuub kee kay xaylo Masri fan gexxe.

⁵ Sarrî daban Muusa kee Haaruun ruubeeh; Masril gibdi umaane ruubeeh sin Masrik eyyeeqe.

⁶ Sin kaxxa abbobti Masrik eyyeeqe saaku, Masri mari gaariiray faroosat giitak beyaana kee qeebi faariisa luk lakak ken katayen. Takkay immay sin kaxxa abbobti Qasa-badah temeete waqdi,

⁷ catoh yoo kallacen. Anu too waqdi ken kee Masri marih fanat dite qide. Qasa-bad Masri marih amo buulla heeh ken akah yanxuqe innah abe. Anu Masri marak abem isin isinnih taaxigeenih. « ‹Woo bacarih tan baaxol mango sanat sugten.

⁸ Sarrak Amoorâ-marih-baaxoy Ordon weeqaytuk ayrô-mawqa le kabut raaqahiyya fanah sin baahe. Wokkeh mari qeebi siinit abeh immay keenik sin iysiiseh. Baaxo keenik beyteeniih isin bisoh gutuqak elle tamaateenimil ken bayseh.

⁹ Sarrak Mooyab malikiy migaaqah Baalak deqsitak yeneeh abbak migaaqah Xiffor akak axcuk yenehiyya qeebi siinit abaamal malse. Usuk Baqor-Balqamah farmo ruubeeh «Ken abaara» 'yaanam kaak iyye.

¹⁰ Takkay immay woo numuk, a marat abta abaaro kok moggola exceeh; too waqdi Balqam dooqa siinih abe. Tonna-leemiik Baalakak anu innih sin cate.

¹¹ Tokkeek Ordon weeqaytuk tabba 'teenih Yeriko fan temeeten. Yerikô-magaalah mari qeebi siinit abeeh; keenik qeebil sin iysiiseh. Amoorâ-mara kee Feriidâ-mara kee Kanqaan-maraay Ciita kee Girgaasâ-maraay Ciiwi kee Yabuusâ-mari kaadu qeebi siinit abe. Takkay immay keenik inkih qeebil sin iysiiseh.

¹² Woo namma Amoorâ-malik a baaxok ayyaaqe'gidih, isin bisoh gutuqak elle tamaateenimil, gadaamah addat ken hee. Sin gayse kee gaysê-baxi keenil baahem mali.

¹³ Abqure wayten baaxo kee xise wayten magaala siinih teceem yoo. A saaku anu siinih ecee baaxol nookten. Isinni gabak aysubuke wayten qinab cooxih xaylo kee *daytuun cooxih xaylo takmen› 'yaanam YALLI siinik iyya» keenik iyye.

¹⁴ Yoosuwa qagseh keenik iyyemii, «Hay, taway, YALLAK meysitaay imaan kaal hayya haay, isinni afqadook kay qibaadat gaca. Sin kaxxa abbobti Furaat weeqaytuk woo qaxa kee Masril, Yallih aftok aqbuduk sugte duyyeeya maqbudinay, wonnah baaxot qida. Dibuk YALLA uqbuda.

¹⁵ YALLA taqbudeenim faxe wayteenik, ta saakut edde taqbudoonu waytaanam yoo iysixxiga. Yalla aqbude wayteenik, wonnal isin akak radden sin kaxxa abbobti Mesbotaamiyah rasul sugte saaku aqbuduk ten duyyeeya akke kee, hinnay kaadu, away elle tanin baaxol Amoorâ mari aqbuduk suge duyye doortaanama. Yoo kee yi buxah maraay yi buxal taamita marah tu gactekiiy nanu YALLA aqbudenno» keenik iyye.

¹⁶ Ummatta too waqdi kaal gacisseemih, «Tahaysa YALLA cabba hayneh kalah naqbudu waytam mannu. Toh inkinnah nacsubem hinna.

¹⁷ Nee kee ni abbobti Masrih addal edde sugne naqoosinnak nee teyyeeqem, YALLAY ni Dagelta kinni. Usuk abba hee ablewaynu ninni intih nuble. Elle genxe rasul sahdak adda gacneh elle genxaamal nee dacrissem kaa.

¹⁸ A baaxol kaadu bisoh elle genxaamal, YALLI Amoorâ-maray akkel sugehiyya baaxok yeyyeeqeh. Tonna leemiik koo kee ku buxa elle abtan innal, nanu kaadu YALLA aqbudenno. Ni Dagelti kaa» iyyen.

¹⁹ Yoosuwa keenil gacseemih, «Toh meqeh immay, YALLA taqbudeenim gibdi. YALLI *kudduusuk yan Yallaay; Yalla akke sinnim Yalla axcuk kaat missoosaanam maqansiisa. Kaa cinna hayteenih dambit asa mara takkoonu waan waqdi, usuk toh siinit macaba.

²⁰ Kaa cabba hayteenih marin mari yaqbudem tuqbudeenik, gaba siinil qideeh sin digaalele. Duma siinih maquk sugaamah, sin baysele» keenik iyye.

²¹ Too waqdi ummatta Yoosuwal gacissemii, «Aleeyyah, nanu YALLA aqbudenno» iyyen.

²² Yoosuwa keenik iyyeemih, «Hay, tonnal, tahaysa isin YALLA taqbudoonuh kaa doorteenimih sumaq isinnih isinnil akketton» keenik iyye. Osonuuy, «Yeey, meqeh; ninnih ninnil sumaq akkenno» iyyen.

²³ «Hay, tonnal, ama gabat liton marin mari yaqbude xeet kee coox wonnah qidaay; imaan YALLAY Israayil doore Dagelta kinnihiyyal digga haa» iyye.

²⁴ Ummatta sarrak Yoosuwak inteemih, «Nanu dubuk YALLAY ni Dagelta kinnihiyya aqbudennooh usuk aba iyyem abenno» iyyen.

²⁵ Yoosuwa too saaku YALLIH aftok ummatta lih bica abeeh; tokkel Seekem deqsita aracal kataatoonu waan xinto kee amri keenih warse.

²⁶ Yoosuwa too xinto kee amri Yallih xintoh kitaabih addal yuktube. Kaxxa xaa bahha heeh YALLA elle yaqbuden aracak xaqul tan garsah gubal hee.

²⁷ Tohuk lakal Yoosuwa inkih tan ummattak iyyeemih, «A xaa wagita. A xaahi ni sumaq akkele. A xaahi YALLI ne'lih yaabe yab inkih yoobbeh. Tonna-leemiik YALLA kinni sin Dagelti niqbam abe waytaana'gidih, a xaahi sumaq siinil akkele» iyye.

²⁸ Sarrak Yoosuwa too yaabak gaba kale waqdi ummattak, «Ahaysa gexxaasita» iyyeeh; too waqdi kulli num keenik isi aracah yuduure.

²⁹ Tohuk lakal Nuun-Yoosuway YALLIH naqasuh yenehiyya qumrik bool kee tabna karmat yan saaku rabe.

³⁰ Efrayim rasuk qaleelah tan baaxol, Gaqas deqsitta qalek kilbat le kabut raqta Timnat-Serac deqsitta magaalay Israayil mari kaah yeceeh sugehiyyal kaa yoogoqen.

³¹ Israayil mari Yoosuwa yanim fanah, YALLA aqbuduk sugeeniih; sarrak usuk rabek sarra kaadu woo kedoh abbobtiy YALLI Israayil marah abem isih tublehiyya tanim fanah, YALLA aqbuduk sugen.

³² Yuusuf ginaaday Israayil mari Masrik baahehiyya Seekem deqsita aracal yoogoqen. Woo arac Yaqkuub, Camor xaylok bool garsih xaame aracak ten. Camor, Seekem abbak ten. A baaxo Yuusuf abuusi nagre.

³³ Haaruun baxi Alqedar kaadu rabeeh; Gibqa deqsitta magaalal kaa yoogoqen. A arac Efrayim rasuk qaleelah tan baaxol geytima aracay kay baxa Fincasah yeceenihiyyak ten.