Yoosuwa 23 - NABUWWA KEE MALIKWA

YOOSUWA UMMATTAH ABE ELLECABO YAABA

¹ YALLI Israayil mara naqboytiitik amaan abek lakal, mango wakti tatreeh; Yoosuwa kaxxam idoolite.

² Tonna-leemiik Israayilik idoolaay kedoh abbobtiiy cokmaaba kee ummattâ qaskarih abbobtih inkih seeceeh, keenik iyyeemih, «Anu kaxxam idooliteh an.

³ YALLAY sin Dagelta kinnihiyya sin taagah a baaxo akak tibbixen marak inkih abem tubleenih. YALLI sin taagah a marat qeebi abem tubleenih.

⁴ Ordon weeqaytuk xabba haanamaay Maditraaniyah badah amma 'yaanam tan baaxo sin marah eceeh an. Qeebil akak iissa 'ne marih baaxo siinih eceeh aniih; uxih qeebi edde abe wayten marih baaxo kaadu, siinih eceeh an.

⁵ YALLAY sin Dagelta kinnihiyya, sin yabloonu waan waqdi akah kudan innah keenik abele. Ken baaxok siinih ayyaaqele. YALLI qahdi siinih akah cule innah, ken baaxo sinim abele.

⁶ Tonna'mmay Yallih xinto elle tan Muusal obte kitaabal unkuttubba intem digga luk abtaanam siinil tan. Too kitab inxicca 'tam inkih duudussaanam siinil tan.

⁷ Tonnah kaadu a sin addat raaqeh yan mara lih magacinaay; oson migaq akak xagan isinni gabak bicsen duyyey yalla akak iyyaanahiyyah migaq ken lih maxagina. Tohimih migaaqal nadri maculina. Too duyye maqbudinaay qibaadah gommoh akah maradina.

⁸ A saaku fanah YALLAY sin Dagelta kinnihiyya imaan digga luk akah sugten innah, uxih imaan dibuk kaal haa.

⁹ YALLI isin bisoh gutuqak elle gexxaanamal, kaxxam nabaah qande le doolatwa baaxok yeyyeeqe. Num siinit makoysitinna.

¹⁰ YALLI isih xagana siinih elle culla 'ye innal, qeebi isih siinih abeeh; tonna-leemiik sin marak inki num keenik alfi num yeyredde.

¹¹ Wohoysaay YALLAY sin Dagelta kinnihiyya ikcinaay tohul digga 'xica. Toh sin taagah siinik axceemi.

¹² Isinni Dageltal imaan hee wayteeniih woo sin addat raaqe marat tengeleenih keenik rihimteenik,

¹³ tonnal YALLAY sin Dagelta kinnihiyya a mara baaxok siinih mayayyaaqa. Takkay immay ta mari edde raddoonu waytan oflo siinil akkelon. Keetalat yoogoren numih xiiroonuh daleh inna siinil akkelon. Intih addat rade keenah gide siinil akkelon. A niqmatah tan baaxoy YALLI siinih yeceehiyyah inki num cabba haytaanam fan tamah siinit akkuk sugele.

¹⁴ «Awayah tu gactek, yot rabi wakti xayyooweh yaniih; siinik kulli num isi afqado kee kasal, YALLI aceeyyo axcuk xagana siinih akah cule niqmat siinih yeceem tableenih tanin. Usuk xagana siinih akah culla 'yeemik tu siinil mamakinnay siinih duuduseh.

¹⁵ Takkay immay YALLAY sin Dagelta kinnihiyya too xagana akah culla 'yem tiya-tiyah siinih elle duuduse innal, tonnah kaadu, kay yab cinna hayteenik, siinil baaheyyo iyye umaanek tu cabe'kal siinil baahelem ixiga. A baaxok bayetton.

¹⁶ Usuk xagura siinik iyye kay xinto xagure wayteeniih, tonnah kaadu, YALLAY sin Dagelta kinnihiyya maaqilla hayteenih, deedaltamay yalla axcuk yaqbudeenihiyya tuqbudeenik, wohih taamat gacteenik, YALLI isi bagcarrat sin digaaleleeh; away siinih yecee niqmatah tan baaxol num siinik maraaqa» keenik iyye.