Yoonas 4 - NABUWWA KEE MALIKWA

YOONAS YALLI ABE XUWAAWAH BAGCARRITE

¹ Yoonas tah yuble waqdi faxe cineeh, kaxxam bagcarrite.

² Tohuk gexxaamah YALLA fan dooqa abe. Dooqah iyyemii, «YALLAW, anu ku farmo gabat luk buxak ugte saaku, ah abtu waytaamih cunxoh inni bagul luk suge. Isbaaniya baaxo akah kudem tohu. Atu kulli way maqaane kee racmatta le Dagelta kinnitom kok aaxigeh. Dagoomut mabagcarritaay digaalat matasissikaay kaxxa kacanu taybullee. Sahda abta umaanek sahdah qafu aba Dagelta kinnitom kok aaxigeh.

³ YALLAW, ahaksa rabay yoo inxic; aniimik rabam yoh taysek» iyye.

⁴ YALLI kaak iyyeemih, «Bagcarrittaamih cakki maay lito?» iyye.

⁵ Too waqdi Yoonas elle suge magaalak ayrô-mawqa le kabul yan arac fan gexeh, tokkel elle yeede. Tokkel iraawo haysitta heeh, Nanawê magaala takku waytam yable'gidih, too iraawoh gubal daffa 'ye.

⁶ Too waqdi YALLAY Dageltah yani Yoonas garil caxa yuysubukeeh; Yoonasah iraawo takkeeh usuk ruffu iyya'gidih, too caxay kay amol tooboke xer caxa tekkeh. Yoonas woo caxa nabam yikcine.

⁷ Nammeyhaytoh ayro maaci maacise waqdi, Yalli amriseemih sabbatah, woo caxat xaariya raddeeh kafteh.

⁸ Ayro laqte waqdi, Yalli ayrô-mawqa le kabuk laqin caacay ruubeeh; Yoonas ayrô-dahan kaxxam kaa biyaakeemih sabbatah damaysiteh. Tohih sabbatah isi bagul, ahak rabam yoh aysuk ten, iyyeeh, «Aniimik rabam yoh tayse» 'yaanam afak kaak tewqe.

⁹ Too waqdi Yalli annah kaak iyye: «Atu a caxat tekkem tanqibeemih cakki maay lito?» kaak iyye. Yoonas Yallal gacseemih, «Anqibeemih cakki liyoh. Naqbi yoo qidda haam fan anqibem yol tan» iyye.

¹⁰ Too waqdi YALLI kaak iyyeemih, «A caxa inki ayroh addat toobokeh gersi ayro kafteh. Tet taysubukem koo hinna; teetih abba haytem mantu. Hay, tonnal macah teetih qaaddaa?

¹¹ Hay, Nanawê magaalah addal bool kee labaatanni alfih numuy meqem kee umam baxse waahiyya yaniih, tonnah kaadu mango saqi elle yanik, anu mannal teetih qaade waah?» kaak iyye.