Yoonas 3 - NABUWWA KEE MALIKWA

YOONAS YALLIH AMRI OGGOLEH

¹ YALLI nammeyhaak Yoonas lih yaabeeh, kaak iyyeemih,

² «Nanawey kaxxa magaalah tani fan gex. Tokkel anu keenih waris kok axcu waam keenih waris» kaak iyye.

³ Too waqdi Yoonas Yallih yab yoobbeeh, Nanawe fan gexe. Woo magaala kaxxam naba magaalak teneemih sabbatah, adda teetik taboonuh sidiica ayro beyak ten.

⁴ Naharsi ayro inki ayroh gexo le baaxo tet addat gexak aseeh; elle gexaamal, «Morootom ayroh addat Nanawê magaala bayele» 'yaanam keenik iyye.

⁵ Nanawê magaalah mari too farmoy Yallak temeetehiyyal yeemeneh. Tohuk gexxaamah kulli num keenik soomaamal malsen. Yakkeenimiik qunxa numuuy kaxxa numuh toobiteenim yaybulloonuh, *qabuudut sartanah gacen.

⁶ Nanawê magaalah malik aham yoobbe waqdi, elle suge dardaarinni korsih baguk uguttu 'yeh, edde suge ibak gulub maada kameesik katta 'yeh, *qabuddat gacca 'yeh gombod addat daffee.

⁷ Sarrak Nanawê mara fan farmo ruubeeh iyyeemih, «A amri siinih rubtam, yoo kee yi gubal taamita mara. Maaqo num afah siinik xage waama. Sahda kee laay illi kee wadaraay buxal enna 'ya saq inkih, maaqo afah xage waamaay; leek aaqube waama.

⁸ Sahda kee saq inkih qabuudut gactaama. Kulli num baguuk Yalla fan dooqa abaama. Kulli num uma caalat kee uma taama cabaama.

⁹ Tonnal Yalli bagcarra cabba heeh neh racmatak xuwaawam takkeh. Tonnal kaadu rabak cattiimenno» iyye.

¹⁰ Yalli oson uma taamak raaqeenim keenik yubleh. Tohuk gexxaamah keenit abeyyo iyyeh suge digaalak raaqeeh, ken madigaalinna.