Yoonas 2 - NABUWWA KEE MALIKWA

YOONAS ABE XAAQINTU

¹ Yoonas kullunti bagih addat yen waqdi, YALLAY isi Dagelta kinnihiyya kallaceh,

² iyyeemih, «YALLAW, gadaamite saaku koh seeceeh; wohul woo seecol yol gacisseh. Kabri addak catoh koh seece waqdi, yoo toobbeh yoo catte.

³ Badak ragid fan yoo rubte; baddi lee marot yoo hayte; ku baddih haffoy qande lehiyya amol yok muxak muxxe.

⁴ ‹Kok exxeereh anih› exce. ‹Ku qibaadah qariy taahirik yani qagisak maay ableyyoo?› exce.

⁵ Lee bagul gacca yok 'teh ufuy yoo waysisseh. Baddi addal taabuke qayso amo yok buulteh. Bad inkitanuuk yoo yunxuqeh.

^6-7 Qalek ragid fan oobeh, sutta exce. Akeeray afa kulli waqdi alifit le oobe raareh, sutta exce. Rabi yot xayyoowem uble waqdi, YALLAW, kooy yi Dagelta kinni kallace. Wokkek addak nuwwuk yoo teyyeeqe. Isi qibaadah qariy taahirik yanik dooqa yok toobbeh.

⁸ Tuxxiq sinniimil yaamine mari YALLAY cato yacee caban.

⁹ Yoh tu gactek koo saariseyyooh; ku migaaqal sadgat abeyyo. Abeyyo excem duuduseyyo. Umaanek sinam cattam YALLA» iyye.

¹⁰ YALLI woo kulluntak, «Yoonas badak afal tuf» iyye waqdi, woo kullunti badak afal kaa tufe.