Yoonas 1 - NABUWWA KEE MALIKWA

YOONAS YALLIH AMRI CINEH

¹ Ayrok teena YALLI, Amittay baxa Yoonas lih yaabe. Kaak iyyeemih,

² «Kaxxa magaalah tan Nanawê-magaala gexaay; tet marih umaane ableh anik, tet marat takku waytam keenih waris» iyye.

³ Tonna'mmay Yoonas YALLAK kuda'gidih, aki qaxal gexe. Yaffa fan gexeeh; tokkel Isbaaniya gexxa doonik gee. Too doonikih kira igdiyya heeh, YALLAK elle yambooqoruh Isbaaniya gexa'gidih teetit kore.

⁴ Too waqdi YALLI badal kaxxa caacay ruubeeh, baddi sabo doonik aggile raarte.

⁵ Baddi mari wariggiteh kulli numuuy isih le yallal cato essere. Sarrak doonik sutimik cattinta'gidih, amol teetik suge quuka badal qiden. Oson tohut yanin waqdi, Yoonas doonikik addah culla 'yeh kaxxa xiinih xiineh yen.

⁶ Doonik beya num kaal yemeeteeh, annah kaak iyye, «Away mannal xintaah? Ugutay isi yalla kallac. Ku yalli neh xuwaaweh rooci nek catam takkehik» iyye.

⁷ Sarrak baddi mari, «A qawwalayla net akah takkem faxxaamih sabab naaxige'gidih, saami caxxa qidnay» tittak iyyen. Saami caxxa qiden waqdi, woo saami caxxi Yoonasal yewqe.

⁸ Too waqdi kaa essereeniih, iyyeenimih, «A umaane inkih net akah takkem iyyin sababaay? Atu akkel abtam macaay? Ku baaxo ankeey? Ma maraay?» kaak iyyen.

⁹ Yoonas keenil gacsemii, «Akah oobokem Qibraayisti. Elle aaminem YALLA. Usuk qaraanal yaniih; baaxo kee bad inkih gintem kaa» keenik iyye.

¹⁰ Sarrak akak kudam YALLA kinnim keenih warse. Too waqdi baddi mari kaxxam wariggitak hagga iyyeenih kaak iyyeemih, «Atu abtem umaamaay abaanam hinna» kaak iyyen.

¹¹ Badal sabo gacak gacteeh, too waqdi baddi mari Yoonasak, «A sabo taade'gidih, ko'lih maca abnam tayse?» iyyen.

¹² Yoonas keenik iyyeemih, «Yoo badat qida; tonnal aadelek. Ah siinit akah takkem yi sabbata» keenik iyye.

¹³ Baddi marah tu gactekiiy quuruuk seeb abeeniih, woo doonik baddi afah baahaanam faxen. Takkay immay bad haffo gibdah amattakuk yeneemih sabbatah, kabul yangayyeenim maduudinnon.

¹⁴ Too waqdi YALLAL weeqen. Iyyeenimih, «YALLAW, a numuk rooci nayyaaqeemih nee maqidin. YALLAW, atu elle faxxe'nnal abteemih sabbatah, nanu a numuy tu nel baahe weehiyya qidneemih nel mabeetin» iyyen.

¹⁵ Tohuk lakal Yoonas doonik addak eyyeqqa heenih badak addat qiden. Muxak suge bad too waqdi yeede.

¹⁶ Toh yublen waqdi, baddi mari YALLAK kaxxam meysiteh raaqeeh; tonna leemiik YALLIH migaaqal sadgat abeenih nadri kaah culen.

¹⁷ Yoonas badat qiden waqdi YALLI kaxxa kulluntak, «Yoonas unxuq» 'yaanam iyyeeh, woo kullunti kaa yunxuqeeh; kullunti bagih addat sidiica ayro kee sidiica bar suge.