Yasaqya 9 - NABUWWA KEE MALIKWA

¹ Too maray too gide gadaamat sugehiyya tohuk wadir kaxxa diteh addat maraaqaay gadaamitak maraaqan. Yalli duma, Dablon kee Naftaalih yooboke marih rasi gaca-rasu abak suge'mmay, sarra yan saakuh kaxxa rasu kaa abele. Too rasi, Maditraaniyah badak ayrô-mawqa le kabuk xabba haanamaay Ordon weeqaytuk woo qaxa raaqa Galiil baaxoh maray Israayilih aabuke waahiyya elle yanih fanah, kaxxa nabna le rasu akkele.

YAMAATU WAA MALIKI

² Ditet tan ummat kaxxa ifu ablele. Duma silal elle radak suge rasul yan maral away ifi gacele.

³ YALLAW, ken teyderreh mango mara ken abetto. Kaxxam ruffu ken heetto. Sahda buqrek daro orbissa waqdi kee dannabah orbiseenim kurrasitan waqdi elle wallitan gurral, ku foocal wallitelon.

⁴ Woh akah kinnim, luk sugen quuka keenik kalettooh, sunku keenik edde aagaruk sugen caxxa aggilele. Keenit xukkutak sugeeh ken adlumuk suge mara duma Miidiyan mara elle bayisse innal baysele.

⁵ Sinam gaada qaskarih kabel kee ken sartanay qabalat yutlukehiyya inkih girat carariselon.

⁶ Macaay inteenik, awki neh yooboke. Baxi neh yontocowwe. Usuk abbootan gabat le. Migaaqah «Qajiibik yan Fayisi», «Nabaamak Naba Dagelta», «Waara Abba», «Amaan Yamliki» 'yaanam kaah axcelon.

⁷ Kay abbootan osak oseleeh, ambaxe sinni amaan gacele. Dawud korsil gaceleeh, kay baaxol ellecaboh ayro fanah dardaarah anuk, qadli kee cakkih yan gitat xiinisele. Taham YALLAY Nabaamak Nabahiyya isi mara yaysiiseemih fayxi kee, keenih le kaxxa kacanuk akkele.

YALLI ISRAAYIL MARA DIGAALELE

⁸ Yalli Israayil doolat kee Yaqkuubuk rade maral farmo ruubeh; cokmi keenil abele.

^9-10 Israayil ummatta kee Samaariyah magaalal yan mari, kaxxiina kee anaani xagarat hayya heeh, «Kallak bicsen xisne tiddigilleh immay wokke xeetik bicsen xisne ciggiilisenno. Sublâ-cooxuk bicsen qarwa tiddigilleh immay, wokke nabam meqe sariidak bicsen qarwa ciggiilisenno» iyyaana'mmay, oson inkih takku waytam Yallih cokmi kinnim aaxigelon.

¹¹ YALLI, Malik-Raaxin le naqboytit qeebi keenit abta'gidih bicat heeh; ken naqboytit keenit uguuguse.

¹² Suuriyah mari ayrô-mawqa le kabuk gaccaay *Filistiinih yooboke mari ayrô-culma le kabuk gacca 'yeh Israayil yanxuqoonuh af fakka teetit heen. Tohuh, Yallih naqbi maxamcaay, ken edde digaaluh ruube gaba wadir magacsa.

¹³ Yallih-marah tu gactek, dambik matoobitinna. YALLAY Nabaamak Nabahiyya ken digaaleh immay, tohuh kaal maaduurinnon.

¹⁴ YALLI inki ayroh addat Israayilik kaxxa mara kee qunxa mara digaaleh, amo kee geera keenik yirgiqe.

¹⁵ Amo keenik idoolay oson assakaxxuk sugeeniiy; geerah keenik tanim, nabuwwa kinnino iyya maray dirab acayuk sugehiyya.

¹⁶ A ummatta miraacisa mari ken edde beyaanam, gita maliinooy; ken edde yabbixeenim, badambadisiyya.

¹⁷ Tonna leemiik Yalli furraynak num keenik asillimi mahannaay, ken qayxiixa kee gubuunuk numuh maxuwaawinna. Macaay inteenik, oson inkih Yalla maloonuuy, uma marah yaniiniih; oson edde yabba 'yaanam inkih umaane. Tohuh, Yallih naqbi maxamcaay, ken edde digaaluh ruube gaba wadir magacsa.

¹⁸ Macaay inteenik, oson lon umaane, eqebto kee sibaasibit gexxa girah gide. Ken umaane garbot gexxa giray qer qaran fan akak yawqehiyyah gide.

¹⁹ YALLAY Nabaamak Nabahiyya bagcarriteemih sabbatah, kay digaala girah innah baaxo inkih carariseeh, ummatta inkih bayseeh; num numul saduh gace.

²⁰ Inkih tan baaxol ummatta maaqo tittak bukkusseeh; maaqok geennaan im yakmeeni'mmay tohuh macayyan. Isinni gabah cado kinni way yokmen.

²¹ Manasse kee Efrayim mari qeebi tittat abeenih, tonnah kaadu, titta lih gacca 'yeenih Yuudâ-marat qeebi aben. Tohuh, Yallih naqbi maxamcaay, ken edde digaaluh ruube gaba wadir magacsa.