Yasaqya 8 - NABUWWA KEE MALIKWA

YASAQYÂ-BAXI UMMATTAH ASTA YEKKE

¹ YALLI yok iyyeemih, «Kaxxa luuc baahay, ‹Xayuk Ibbixa Sissikuk Buuba› 'yaanam kaxxa kutbeh elle uktub» iyye.

² «Sumaaqah sek Uriyya kee Yaberkiyâ-Zakariyya haysit. Oson aamanti le mara kinnon» yok iyye.

³ Waqlaak wadir barra yok teedeqeh. Ni baxi yooboke saaku YALLI yok iyyeemih, «Xayuk-Ibbixa Sissikuk-Buuba» 'yaanamal kaa muggaaqis.

⁴ Yooboke awki ‹Yi inay› 'yaanam kee ‹Yi abbaw› 'yaanam afak ayyaaqe'kal yan saaku, Damasko kee Samaariyah mari edderra heem inkih Assuuriyah malik buubele» yok iyye.

⁵ YALLI kaadu yo'lih yaabeh iyyeemih,

⁶ «Too mari Siloc deqsita sila le lee-arac cineeh, malik Raaxin kee Ramalyaahû-baxah yifriceenimih sabbatah,

⁷ tonnal yooy Goytah yani, Assuuriyah-malik kee usuk elli haa qaskar ken radaana'gidih baaheyyo. Furaat kaxxa weeqaytuy sissikuk gexay dariifal caxittah innah amaatelon.

⁸ Tohuk lakal Yuudâ-rasu fanah, sahda filla fanah yanxuqe weeqih innah, kullim duufut beyak amaatelon. Ammaanuwelow, too qaskar fakimit tan kaxxa galway baaxo inkih duddahiyya akkele» yok iyye.

⁹ Isin baadal tan ummatey, titta lih gaca'mmay baysetton. Baaxok xer ikkel yan maraw, ankacisa! Qeebih bical gaca'mmay baysettoonuuh, finqitetton.

¹⁰ Abtoonu waytaanamal malisa'mmay siinil mabicta. Faxxeenih gide yaabita'mmay toh inkih tu maxiqta. Macaay inteenik, Yalli ne'lih yan.

YALLI NABIH AYLAHU KALE

¹¹ YALLI isih le kaxxa qandet a ummatta katatta gita kataye waa'gidih, aylahu yoh kaleh. Iyyeemih,

¹² «Oson aban malat ken lih mangalin. Oson akak meysitaanamak mameysitinaay, akak cunxitaanamak macunxitin.

¹³ Yoo YALLAY Nabaamak Nabahiyya *kudduusuk yan Dagelta kinniyom mahawweenin. Akak meysiteh meqem dibuk yoo. Akak cunxitaanam yoo.

¹⁴ Yi *taahiriino siinih reebu akkele. Takkay immay Yuuda kee Israayil marah, xaay sahda adafa kinniyoh; ken yannikisse xaa kinniyo. Yarusalaam mari edde radu waa oflo kinniyo.

¹⁵ Mango maral adaf heeleeh; annikisseloonuh addigillelon. Tonnah kaadu ofloh addat radelon» yok iyye.

DIGAALAK RAAQU WAA MARI ABEH MEQEEMI

¹⁶ Isin yi darsay, Yalli yol ruube farmo dacrisaay tet daanisa.

¹⁷ YALLI isi marak is yooqoreh immay anu niyak kaa aamineeh; niya elle liyom kaa.

¹⁸ YALLI yoh yecee xaylo luk akkel aniyo. YALLAY Nabaamak Nabaah dardaarinni korsi Siyon-qaleh amol akak tanihiyya yoo kee yi xaylo Israayil ummatta fanah asta nakkuh nee ruube.

¹⁹ Takkay immay sahda, «Ramli qida mara kee kalluwalley tutuc intak xaagu aba» siinik intu wayta waqdi, isin, «Xaagu kalluwallek abtaanamak, Yallak macah abe waytan? Yan marih xaagu rabe marih roocik macah abtan?» 'yaanam keenik axcetton.

²⁰ Too waqdi keenik intaanamah, «YALLI siinik iyyem abay kay farmo ankacisa» keenik inxica. Ta qangara cina maral, maaci mamaacisa.

GADAAMA LE DABAANA

²¹ Niya akak tiddigilleeh qululte ummatta baaxot meekitele. Qulul ken yabbaxu waa waqdi bagcarriteloonuuh isinni malik kee Yalla xaafelon. Qaran gubaak wagga heeloonuuh

²² baaxo fan addah wagga heelon. Too waqdi laqô-bar keenil radeleh; keenit takku wayta gadaama kee gibdaabina ablelon. Dite le aracay ableh umahiyyat gutuqak ken heelon.