Yasaqya 7 - NABUWWA KEE MALIKWA

YALLI MALIK ACAD FAN FARMO RUUBE

¹ Qudiyyâ-Yootam baxay Malik Acad deqsitahiyya Yuudâ-rasul malikih yen dabaanal carbi rade. Suuriyah malikih suge Raaxin kee Israayil malikih suge Ramalyaahû-Fekac Yarusalaam magaala tabbixem faxxe. Takkay immay yabbixoonu yeffereenih.

² Yuudâ-malikiy Dawuduk radehiyya Suuriyah qaskar Israayil rasih adda cultem yoobbe waqdi, kaa kee raqqa 'ye mari kaxxam cunxiteeh, caacay yasgayye caxah innah gacen.

³ YALLI, Yasaqyak iyyeemih, «Ku baxay Siir-Yasub deqsita gabat luk gexay Malik Acadat ongoorow. Daga raqta dorak bicsen caraatak obta lee edde taade aracay, «Sara kaqlisa marih Booxa» deqsita arac fan beya giti qaxal yanihiyyal, kaa geetto.

⁴ Too waqdi ‹Cisabbootiyyak isi dacrisaay mameysitinay mawariggitin› kaak inxic» iyye. «Malik Raaxin kee kay mara kee, tonnah kaadu, Ramalyaahû-baxih kaxxa bagcarra, namma caxxat gexxa girah qeerih gide.

⁵ Suuriya, Israayil ummatta kee ken malik lih gacca 'teh kol bahtu waytaamal malisseh tan. Iyyaanamah:

⁶ ‹Yuudâ-rasu wararennooh Yuudâ-mara meysiisennooh, ken baaxo ninnih abbixenno. Sarrak Tabqel deqsita numih baxa malikih heenno› iyyan.

⁷ Takkay immay yoo YALLAY Mulki le aham akke kaleyyom diggoysa.

⁸ «Macaay inteenik, Suuriya tet inaytah magaalay Damasko deqsittak qandeh mataysaay; Damasko kaadu malik Raaxiinik qandeh mataysa. Israayil ummattah tu gactek, lactam kee koona sanatih addat, doolat wadirik akak akke waan niksoh annikisselon.

⁹ Israayil tet inaytah magaalah tan Samaariyak qandeh mataysa. Samaariya kaadu Ramalyaahû-baxak qandeh mataysa. Imaanal digga axce wayteenik, isin kaadu digga mantan» 'yaanam Yasaqyak iyye. Yasaqya too farmo Acadah warse.

¹⁰ YALLI kaadu Acad fanah gersi farmo ruube.

¹¹ Too farmol YALLI iyyeemih, «Qaran takkuu, akeeral takku, tuk teenah asta koo aybulleem keh yok esser 'yaanam YALLAY ku Dageltah yanihiyya kok iyyah yani kaak inxic» iyye.

¹² Acad kaal gacseemih, «Asta yoo uybulluya maxcaay, YALLA maagirriba» iyye.

¹³ Tohuk gexxaamah Yasaqya kaak iyyeemih, «Malik Dawuduk rade maraw, yok oobbeya! Labhâ-sabri waysissaanam meqem maay takkalen? Hay yi Dageltih sabri waysissaanam maay faxxan?

¹⁴ Tonna'mmay YALLI asta isih sin aybulleele. Baxuwwah tan barra aadiqeleeh, lab-baxa xaleleeh, too awki migaaqah Ammaanuwel deqsitele.

¹⁵ Usuk yanabu waah umam kee meqem tittak baxisu duuda saakuk duma, hobbo nakeleeh malab akmele.

¹⁶ Woo ayro tamaateemik naharat, woo uma'nnah sin meysiisa namma malikih baaxo sinaamak foyyah raaqele.

¹⁷ YALLI, koo kee ku ummatta kee ku buxah maral, Israayil Yuudak baxsinte saakuk wadir akke wee taqabi kee gibdaabina ruubele. Assuuriyah malik siinit ruubele.

YALLI YUUDÂ-MARA DIGAALELE

¹⁸ «Too ayro YALLI Masri mari Niil weeqayti akak qimbisa ikkek kaaqayti innah edde yamaateeh; Assuuriyah mari kaadu isi baaxok diidaaleh innal edde yamaaten fooxay kaxxa asta keenih takku waytahiyya keenih abele.

¹⁹ Too waqdi yakkeenimik goloh addaay gabloolih addaay coox guba kee, tonnah kaadu, qayso le aroocal mododelon.

²⁰ «Toh takku wayta saaku YALLI, xagor sinaamak moola Assuuriyah malik, Furaat weeqaytuk woo kabuk siinit ruubele. Too num deben kee amô-xagor kee xagaral yan xagor inkih siinik moolele.

^21-22 «Toh takku wayta saaku, num dibuk inki saga kee namma reyta luk raaqele'mmay, canak faxxa haam keenik geele. Baaxol raaqu waa mari nakoonuh hobbo geeleeh, yakmoonuh malab geelon.

²³ «Toh takku wayta saaku, qinab buqreh cooxuk alfi caxay kulli caxa garsi akak baahak sugtehiyya elle sugte aracal, eqeb kee sibaasib aabukele.

²⁴ Ummatta wokke gayse kee gaysê-baxa luk alluwwah admoh gexele. Inkih tan baaxo eqeb kee sibaasibik amaggele.

²⁵ Koomaamih-amoy ummatta daro elle aysubukuk sugtehiyyal, sissib kee eqeb aabukeleeh; tohih sabbatah tokke num magexa. Too aracay abuuruh raaqehiyya laa kee illi elle yaloole arac akkele.»