Yasaqya 66 - NABUWWA KEE MALIKWA

YALLI UMMATTAL YUCKUME

¹ YALLI iyyaamah, «Qaran yok daffeyna korsi. Baaxo yok ibih mattaaqatta. Hay tonnal, elle gaca'gidih yoh xissoonu waytaanam, mannah yan qariy? Anu elle affoofu waa arac, mannah yan aracay?

² Ahim inkih anu innih gineeh, tonnal tekke. Takkay immay anu kiciyyom, rammitaah dambik toobita maray anu excem yok meysitak oggolahiyya.

³ «Sahda isih faxxem abbaasitta. Sadgatah saq qidaanam kee sahda qidaanam keenil inki gide. Anaqtu qidaanam kee kuti filla yaggileenimiiy, daro sadgatah baahaanam kee ceray qabala sadgatah caxaanam keenil inki gide. Qaydarus qeerisaanam kee, deedaltam yalla 'yeenih yaqbudeenim keenil inki gide. Yalla umâ-yabulih yan gital yaqbudeeniih, tohut ruffa iyyan.

⁴ Tonna leemiik anu innih ken digaalam dooriteeh, akak meysitaanam keenil oobiseyyo. Macaay inteenik, anu keenih abe seeco yok maabbinnoonuuy, edde yaabe yab yok mankacsinnon. Yi yab cinaanam kee uma-taamat asaanam dooriten» iyyah yan.

⁵ YALLI iyyem kaak meysitak oggola maraw, YALLI siinik iyyam ankacisa. Siinik iyyaamah: «Isin imaan yol litoonumih sabbatah, sin marak garab sin yanqibeeh, agle siinik cina. Siinil anqaaseenih, ‹Siiniy yafrice nable'gidih, YALLI isi nabna yuybulleeh sin catay› siinik iyyan. Takkay immay oson isinnih qaybit radelon» 'yaanam iyyah yan.

⁶ Kee ummatey ankacisa! Woo magaalah addal taabben xongolo ankacisa! Yallih Qibaadah Qarih addak radda xongolo ankacisa! YALLIH xongoloy isi naqboytit edde digaala'gidih ruubehiyya ankacisa!

^7-8 YALLI iyyaamah, «Yi magaala, lacaw sinnim garciik baxa xalta barrah gide. Annah tanim akkih yubleeh yoobbe num maay yan? Doolat inki ayroh addat tekke saaku maay le? Takkay immay Siyon-magaala lacaw sinni xaylo xalte.

⁹ Hay, anu inni marak ubkah xayyowwa 'yan waqdi, maabukina keenik axceyyom maay takkalen? Yooy kullim yuysubukehiyya, xalay cineyyom maay takkalen? 'yaanam intam yoo sin Dagelta kinni» iyyah yan.

¹⁰ Yarusalaam magaala kicna maraw, tet lih ifrica. Tet rufto sin rufto takkay. Teetih qaadak suge maraw, taway tet lih ifrica.

¹¹ Inah-angu-yaaxe-awki, inah-anguh-canat ruffu akah iyya'nnah, isin kaadu is leh tan baxaaxinnat ruffu axcetton.

¹² Macaay inteenik, YALLI iyyaamah, «Ambaxe sinni amaanah Siyoonut xiiniseyyooh; doolatwa elli hayta gaddaliino, kafe sinni weeqaytih innah, teetil caxitele. Isin, ina gurumbal qarissa baxay kacni intit tablehiyyah bis alletton.

¹³ Ina baxa elle aytikumussa'nnal, anu kaadu Yarusalaam addal sin aytikumuseyyo» iyyah yan.

¹⁴ Aham akkih tablen waqdi ruffu axcetton. Qande kee qaafiyat akak geetton. Hay tonnal, YALLI isi naqoosa cataah naqboytit naqabu yaybulleem, kulli num aaxigele.

¹⁵ Macaay inteenik, YALLI girah innal amaatele. Kay gaariira qaana fuluk haak tamaate. Niqba mara kaxxa bagcarrat edde digaala'gidih, YALLI gira gabat luk amaatele.

¹⁶ Addunyal eneyya iyya mara gira kee seefit digaalele. Mango mara keenik qidele.

¹⁷ YALLI iyyaamah, «Isinni taahirroysak, taahiri akak iyyan bustaanih addat Yallih aftok duyye yaqbude marih ellecabo xayih. Oson keenik gudel yan num katayak, ceray-cado kee ikiqyô-cadooy, tonnah kaadu, aaminnaan maaqo yakmen. Sittat finqitelon.

¹⁸ «Anu sinam baguh tacsubem kee ken taama digga haa. Taway, baaxol enna 'ta ummatta inkih gaaboysu waa ayro xayih. Oson gaaboowan saaku, yi nabna takke gide ablelon.

¹⁹ Ken fanat asta hee liyo. Garabak teena keenik wadeyyooh, yi migaaqaay yi nabna kee yi qande elle aaxige waan baaxooxay kulli kabu geytintahiyya fan ken ruubeyyo. Ken ruubu waam, Isbaaniyaay Liibiya kee Liidiyah baaxo. Liidiyah mari nagay gaysê-baxa sahdat elli haa inna yaaxige mara kinni. Wohuk kalah ken ruubu waam, Giriik kee Tuubal kee xer baaxoy baddaafal tanihiyya. Oson yi nabna ta marih addal baxxaqiselon.

²⁰ Baadal tan ummatak sin tooboko inkih, mattacoh yoh baahelon. Gaariiy faarisiiy bakil kee gaalal hayya ken heenih, Yarusalaamal tan yi qaley taahirik tani ken baahelon. Israayil mari taahirik-yan-kafaqat sadgatah daro yi Qibaadah-Qari elle baahan innal, ken baahelon.

²¹ Keenik garab seeka kee yi Qibaadah-Qarih-taamat yan mara abeyyo» 'yaanam iyya YALLI.

²² «Qusba qaran kee baaxoy away abu waahiyya yi foocal digga luk elle tani'nnal, sin migaq kee siinik radu waa mari yi foocal digga baahele.

²³ Alsi elle bilinnaanimil aban qiid kee, kulli sabtih aban qiidih, sinam inkih Yarusalaamal yoo taqbude'gidih amaatele» 'yaanam iyya YALLI.

²⁴ Qagseh, «Yamaatoonu waan saaku, yi yab cine marih raysa ablelon. Ken xagar takme xaariya, rabta xaariya hinnaay; ken takme gira mabarugta. Ken raysi ableh uma innah gacele» iyye.