Yasaqya 65 - NABUWWA KEE MALIKWA

COKMI KEE WADOOT AYRO

¹ «Yoo fanah wagte waa marah inni aybulluyuh bical en. Yoo gorrise waak yen mari yoo geeh; keenih anu umbulleeh. Yi migaq ugse waa ummattak, ‹Ah yooy, ah yoo› 'yaanam exce.

² Umaanek aduure cinaah uma-taamak aduure waah uma-gitat gexa maray deedal kee dirab kataatah, inkih tan ayroy dudda le ‹Yol ama› axcuk namma gaba keenih fidseh ‹Yol ama› exce.

³ Too mari niqibyom abah fiiruk geerah ahat asaah foocal yok tohumut asa. Bustaan addal sadgat aban; daaduruk xisen aracal qibaadah qerto ruubaanah. Inkih tan ayroy dudda le ‹Yol ama› axcuk namma gaba keenih fidseh, ‹Yol ama› exce.

⁴ Bar gablah addat xiinaanaah; kabaarah amol dooqa aban. Ceray cado adoobitaanaah; nadaasa leh yan marákak yaaquben; 'kak adoobitan. Inkih tan ayroy dudda le ‹Yol ama› axcuk namma gaba keenih fidseh, ‹Yol ama› exce.

⁵ ‹Nanu taahirik nan› iyyan. ‹Ummatey, nel maamaatina; nadaasat nee mabaysina› axcuk aki marak baxsan. Too mari inkih yol sakkik yan. Sucummeeta suruy yol lon. Inkih tan ayroy dudda le yot naqabu culusaanah.

⁶ «Ken umaane yi garil tan; yi foocal tan; maktuubuk tan. Anu ahak, way tibba maxca. Ken abtol ken digaaleyyo. Keenih taguude digaalah digaale ken liyom digga.

⁷ Anu siinik axcem liyo: ‹Sin kaxxa abbobtih dambi kee isinnih edde assen dambih anu digaaleyyom siini. Tohuk sabab yoo esserteenik, qaleela kee koomam amol cado akak carrisan sadgat abeenih yoo xaafak sugen. Duyyeeyah qibaada elle aben. Tonna leemiik tohuk gexak oson edde asen umaane tohul taguude digaalah digaale ken liyom digga› » 'yaanam axcuk YALLI yaabe.

⁸ «Meqe lee le qinab-xaylo, qinab-xaylo fanat geenik, baaxot num qidam mafaxa. Qinab xaylo yaxmuumeenih leeh aftoh sahda taaqube. Yi mari yol too gideh yan; yi naqoosa too bis yol le. Baaxot inkih ken maqida; inni naqoosa mabaysa.

⁹ Yaqkuubuk rade yi marat, Yuudâ-kedok rade marat niqmat heeyyo; xaylo aceeyyo. Qaleela mango yi rasu ikoytah keenih aceeyyo. Inni maray innih doore dabqih too rasul hee liyo. Yi naqoosa elle sugele.

¹⁰ Yol xayyoowam faxa marah, ‹Gadaama› deqsitta golo lac nookisa arac akkele. Saron migaaqah le booxa saq yaloole arac akkele» 'yaanam axcuk YALLI yaabe.

¹¹ «Toh hinna'mmay raaqe maraw! Yoo hawweeneeh cine maraw! Yi qaley taahirik tani hawwenna 'yeeh burte maraw! ‹Nasiib› akak iyyan duyyeh meqe maaqo yecee maraw! ‹Ellecabo› akak iyyan duyyeh qinab-kamri yecee maraw, siinik excem tabbeenimi!

¹² Sin ellecabo tah teeti: Uma rabay ableh uma rabettoonum raq lem hinna. Sugdi-gadda sin abeyyo; tamah siinil baahu waama. Taham siinil 'kah baahu waam, siinih seeceeh yok cinteeniih sin lih yaabeh aabbe cinten. Yok foocal umaanet assen; yi yab cinteenih uf inten. Anu faxe waa gitittet gexxeenih tohum dooritten» 'yaanam siinik iyye YALLI.

¹³ YALLAY Mulki le tah yubleeh too way tannah siinik iyya. «Yi naqoosa maqululta; faxeenim maaqok akmelon; siinih gactek qululetton. Yi naqoosay yoh taamitta leê-waytih mabakaaritta; siinih gactek bakaaretton. Yoh taamitta yi naqoosa ruffa axcele, tassa axcele; siinih gactek gamoometton; wacarriyih gamoometton.

¹⁴ Yi naqoosa africele; qililo kee gad abelon. Siinih gactek boogisetton; niya addigille siinik le; boogisetton; weeqe liton.

¹⁵ Anu dooreeh meexe mari, ‹Umaaney woo marat tekke siinit takkay› 'yaanam axcuk ceelalloh sin haysitelon. Yoo YALLAY Mulki lehiyya sin qideyyooh, sin seleyyo. Yi naqoosay yoo takdumek migaq keenik korse liyo.

¹⁶ Addunyal faxinnaan ikkel, dooqa sinaamah aba num, dooqa yi migaaqal abak, ‹Digga leh numma le Goyti barkat siinit haay› axcele. Xiiba-aba-num akkel yenek, digga le Goyti-migaaqal xiibitele, xiibita way. Dumah siinit tekke umaane aakeri hawwensimele. Akke wayteh innah heeyyo» 'yaanam iyye YALLI yaabe.

QUSBA QARAN KEE BAAXO

¹⁷ «Kakka hayisaay, oobbeya! Qusba qaran xisam faxa; qusba baaxo aklukem faxa. Ahak duma tekkeh sugtem makasan; cubbit tet mahan. Ahaysa hawwentimele.

¹⁸ Toh aaxaguk ruffa 'xica; daayiman isin kulli way tassa 'xicay qililisa. *Yarsalaam kaadu xiseyyo; farcat le magaala akkele. Tet maray tet addal yani africuk africiseyyo.

¹⁹ Yarsalaam akcine liyo; inni marat ruffa axceyyo. Tahaysa weeqi mayakka; tet addal booge matakka; matantabbaay num mayabba.

²⁰ «*Yarsalaamal addal tahaysa urri xaylo matambaxa; macabaaritan maraban. Idoolite'kal raba num ahaysa teetil magaca. Qumri akak bool gufe numuk, ‹Atu qunxa numu› axcelon. Immay dambi baahe numuy qumrik bool liggida suge kaal Yallih-abaaro oobele.

²¹ Meqe qarwa xissitelon; dabaaqah elle gacelon. Qinab coox aysubukelon; xaylo akak attakammelon.

²² Oson isinnih xisen qarwa sinam im keenik matakka. Isinnih yubquren darooy yuysubuken caxah xaylo sinam im keenik matakka. Sinam nagri keenik mahaa. Qumri keenik caxah innah, waareleeh keenik sugele. Anu faxeeh doore mari, edde taamitak suggu 'yem akmelon; adoobitelon; edde ruffa axcuk sugelon.

²³ Cawal keenik mafoyyaata; abeenim foyya matakka. Macabaaritta, ken xaylo; anu barkat keenit heeyyo. Ken samad barkattoyseyyo.

²⁴ Dooqa kee kallacit anih faxeenim keenih abeyyo.

²⁵ Wakri anaqtu waklisele; lubak maaqoh qayso akmele. Awur innah qayso akmele. Hay, abeesa numut m'artaay, dibuk akmelem bullaaqe. Yi qaley taahirik tanil tet amol faxinnaan ikkel biyaakissam mageytinta; ahaysa umaane mayablan» 'yaanam iyya YALLI.