Yasaqya 64 - NABUWWA KEE MALIKWA

¹ YALLAW, qaran boohisseh nel macah oobe waytaah? Qaleeli koo yable way meysih axaxitele.

² Gira boco elle urussa'nnah, too girah bagul lee akah facta'nnah amaay qandek litom isi naqboytit uybulluyaay; baadal tan ummatta ku foocal akah axaxitta innah keenik ab.

³ Nanu cubak suge wayne taamay sahda akak cunxitta abte saaku lito. Too saaku nel obteeh; qaleeli koo yubleh, cunxoh axaxite.

⁴ Dumî dabaanaak akke fanah, ku innah yan Dageltay kaal kibaal hee marah a xaqan le cato abahiyya tubleeh toobbem matan.

⁵ Cakkik tan taamah ruffa luk taamita maray koo kasitak ku gita kataatak xiinahiyya oggoltah. Atu nee niqibuk sugteeh, nanu kaadu dambit bisoh gexak genxe. Dumî dabaanak xabba haanamaay akke fanah, ku naqbi yanim aaxagih, dambit asak sugnek, mannal waddinna?

⁶ Nakkeemik caraamuk yan mara nekke. Abba hayna meqe taama nek inkih, abicih tan saroh innah tan. Abnah nan dambik gexxaamah laqaymumma 'yeh kafe ayyuufay caacayat gexah gidek nan.

⁷ Dooqa abeh kol yaduure num mayanaay, catoh ku fanah yamaate num mayana. Nek tomboqorreeh nanu abne dambih gabat nee bayisse.

⁸ Takkay immay YALLAW, atu nek abba kinnito. Nanu kallaay; atu kallak buuti bicsa numih bis lito; nakkeemik ku gabah taama kinnino.

⁹ YALLAW, kaxxam nee manqabinaay ni dambil faxe way nee makatayin. Nakkeemik ku ummatta kinninok, neh racmat.

¹⁰ Ku magaalooliy taahirik tenehiyya Siyon agantah haanah raqte. Yarusalaam sahda elle deedalta abur tekke.

¹¹ Ni Qibaadah-Qariy taahirik yeneeh qax-muquk yeney ni kaxxa abbobti koo elle aqbuduk tenehiyyat gira ruuben. Kicinuk sugga inne arooca inkih abuuruh raqte.

¹² Hay, YALLAW, tah inkih net akkih tibba intaa? YALLAW, tu neh axce'kal, duude waynam nel maay oobissaa?