Yasaqya 63 - NABUWWA KEE MALIKWA

YALLI UMMAT EDDE DIGAALA WAKTI AMAATELE

¹ Edom-rasuk Bosrâ-magaalak tamaatem iyyay? A qajaaqibih yan sartanay xarbat qassoowehiyyat gacteh, fooca fan annah nabna kee kaxxa qande luk tamaatem iyyaay? «Tah, yooy sahda waduh qande leeh, qadaalat luk yaabak yamaatehiyya kinni.»

² «Hay, atu sartanah, qinabak-kamri-bicsa-mari, woo kamri bicsa'gidih qinabat yaaqite waqdi, xarbat qassoowe sarih innah yan sartanat macah gacte?»

³ «Amah, ummattat inkih qinab xayloh innah eeqete. Toh, innih dibuk abe'kkal, baadal tan ummattak inkih, num yo'lih maabinna. Enneeqebbe waqdi keenit eeqeteeh, ken qabal sara yok bayseh.

⁴ Macaay inteenik, yi marih naqboytit edde digaaleh meqe ayro temeeteh 'yaanamal gaba kaleeh; anu wade marih wakti yemeeteh yan.

⁵ Wagteh immay, ahamal yoo cata mari ane waam uble waqdi, yol hagga tekke. Tonna leemiik yi naqbi maqar yot heeh, inni gabat iisa innih orbise.

⁶ Bagcarrite waqdi inkih tan doolatwat eeqeteh ken askirise. Qabala keenik baaxok bagul caxe» iyye.

YALLI ISRAAYIL MARAH YEMQEH

⁷ YALLIH kacanuy amurruqe waat walalu waa. YALLI neh abeemiy fayla kaa akah taguude warseyyo. Israayil ummattah kaxxa maqaane abe. Toh akah abem, isi racmatta kee amurruqe sinni kacanih sabbata.

⁸ YALLI, «Oson yi maraay; yi xayloy yoo make wayta kinnon» iyyeeh, tonna leemiik ken wadeena yekke.

⁹ Ken taqabi kaa taqbiseeh, tonna leemiik luk suggu 'yen gadaamak ken yeyyeeqe. Ken waddem, malayka hinna YALLA ikkala. Keenih le kacanu kee isih le xuwaawak gexxaamah, ken cate. Dumî dabaanal kulli way amo keenik wagitak suge.

¹⁰ Keenih tu gactek, kay yab cineeniih kay Roocaaniyyay *kudduusuk tanihiyya qaadiseenih. Tonna leemiik YALLI naqboyta keenik yekkeeh, isih qeebi keenit abe.

¹¹ Too waqdi dumî-daban kassa heeh; Muusa kee isi mara kassa hee. YALLAY isi ummatta kee ken loyna badak cateh yenehiyya mankel yan? YALLAY isi Roocaaniyya ken gudel heeh yenehiyya mankel yan?

¹² YALLI dumah isi gabay nabna kee qande let Muusâ-gabat mangom absiiseh, ken foocal baye sinni migaq akah geya'nnah, bad namma ikkel kure'mmay, a saaku usuk mankel yan?

¹³ YALLAY adda le badak gudek ken tabse mankel yan? Too marak-ibi, faras-ibak kaxxih maqar le ibay andufulle waahiyyak ten.

¹⁴ Saq qayso le ikke elle beyan innal, YALLIH *Roocaaniyya isi mara elle yaffoofen ikke beyte. Tonnal, YALLAW, isi marak foocat gacca 'teh beyak isi migaaqat nabna hayte.

YALLIH RACMATTA KEE CATO GEYAANA'GIDIH DOOQA ABEN

¹⁵ YALLAW, qaraanay taahiriino kee nabna luk elle tanihiyyak, nee fan wagit. YALLAW, nee waduh luk ten fayxi manke kok gexxe? Nee catuh luk ten qande maca tekke? Neh luk ten kacanu kee xuwaw maca yekke? Nee mamaaqilin.

¹⁶ Ni abba koo. Ni kaxxa abbobti Abraahim kee Israayil nee maaxaginna. Takkay immay YALLAW, ni abbay kulli way nee wada kinnito.

¹⁷ Ku gitak nee hoxissam macaay? Ku yab aabbe sinni maray darre kot caba nee akah abtem macaay? Ku naqoosa kinninok, nel uduur; ku mara kinninok, nel uduur.

¹⁸ Dago waktih gide ku mari ku aracay taahirik yani luk sugeeni'mmay, ni naqboytit awayih ibak too aracay koo elle yaqbudeenit yeeqeten.

¹⁹ Mango waktih, atu amoyta akak suge wayte marih inna gacne. Ku migaaqal muggaaqise waan mara nekke.