Yasaqya 62 - NABUWWA KEE MALIKWA

¹ Yarusalaamah liyo kacanuk gexxaamah yaabu waa; Siyon waddintam fanah tibba maxcaay, is geyta cakkik-tan-maqaane, bar ursan girah innah, urtam fanah maffoofa.

² Yarusalaamey, baadal tan ummatta cakkik-tan-maqaane koo geyah ablelon; malikwa ku nabna ablele. YALLI qusba migaq koh ayyaaqeleeh; too migaaqal koo aaxigelon.

³ Atu YALLIH garil malik-kalabtay qaxmeqehiyyah innah gacetto; ku Dagelti gabat yabbixe kalabtah innah gacetto.

⁴ Ahak wadir maaqilen magaala kok m'iyyan; ku rasuk abuuruh raaqe rasu 'yaanam m'iyyan. Ku migaq «Yalli ruffu akak iyya magaala» deqsitele; ku rasih migaq «Meqe rihimih rihimte barra» deqsitele. Macaay intek, YALLI isih baqli bis koh aallele.

⁵ Furrayni baxuwwa isim elle aba'nnal, Yallay koo xise koo isim abele. Qarus qibnah yassalleh gide, ku Dagelti koh assaallele.

^6-7 Yarusalaamey, ku gasoh afal koo dacrissa mara koh hee. Oson bar kee laqoh tibba m'iyyan. YALLI cule xagana YALLA kassisa maraw, aadayi mahaytaanay YALLI Yarusalaam daabissa haah addunyal faylisan magaala tet abam fanah aadayi kaa mahaytan.

YALLIH XAGANA

⁸ YALLI kaxxa xagana cule; woo xagna isi qandet duudusele. Iyyeemih: «Ahak wadir isin tubquren daro naqboytit-gadda siinik matakka. Allî-baaxoh-mari sin kamriy qinabak bicisseeni mayaaquba.

⁹ Takkay immay siiniy a daro qiddaay orbissa heehiyya tet gaqambo akmeleeh, YALLA faylisele. Qinabak bicsen kamri taaqabu waytam, siiniy qinab caxah amo wagitak sugeeh tet xaylo gaaboysehiyya. Elle taaqaboonu waytaanam, yi qariy taahirik yanihiyyah daarata» 'yaanamal xagna siinih cule.

¹⁰ Magaalah afoofik eweqa; magaala fan yaduure marah gita bicisa. Gita nagay bicisaay xeet akak kala. Asta-yakku-waa-qalam baadal-tan-ummattah haysita.

¹¹ Macaay inteenik, YALLI baadal tan ummatak inkih iyyeemih; «Siyoonuk, ‹Ubuley, koo wadu waa num yamaateh yan› inxica. ‹Isi galto luk yamaate. Isi-ummatay isih wade, gabat luk yamaateh yan› 'yaanam axcuk teetik inxica» iyye.

¹² Too mari migaaqah, «Yallih ummattay *taahirik tani» deqsitelon. Tonnah kaadu, «YALLI wade ummatta» deqsitelon. Siyon-magaala, «Yalli faxa magaala» deqsiteleeh, «Yalli ahak sarra cabe sinni magaala» deqsitele.