Yasaqya 61 - NABUWWA KEE MALIKWA

YALLI DOORE NUMU

¹ Masaakiinah yayse-xaagu warsa'gidih YALLAY Mulki le yoo dooreh isi Roocaaniyya yot hee. Tonna luk niya akak tiddigille mara niya haa'gidiiy seewah been marak curri aba'gidiiy casbit yan mara casbik ayyaaquuy YALLI yoo dooreeh farmoh yoo ruube.

² YALLI, isi mara edde wadu waa wakti kee, isi naqboytit edde digaalu waa ayro temeetem warsa'gidih, yoo ruube. Rookat yan mara aytikumusa'gidiiy

³ Siyoonul yan maray rookitahiyyah rufto kee farci acee'gidiiy moyyat heen gombodih aftok, qaxa-le-kalabta haa'gidiiy arkaay niyâ-digloh aftok gad kee saare ken absiisa'gidih yoo ruube. A mari cakkit yan mara deqsiteloonuuh; YALLIH nabna kee qaxa yaybulleeni'gidih YALLI isih yuysubuke kaxxa cooxih innah gacelon.

⁴ Mango dabaanah abuuruh sugte baaxo xiselon. Dumaak bayteh sugte magaalooli nammayhaak xiselon.

AMURRUQE SINNI RUFTO

⁵ Allak yemeete mari siinih taamitele. Lac siinih dacriseloonuuh, buqre siinih abqureloonuuh, qinab elle yooboke baaxo siinih xagurelon.

⁶ YALLIH seeka siinih axceloonuh; ni-Dageltih-taamat gace mara siinih axcelon. Doolatwa tedderem sinim akkeleeh; wohul kaxxiinitetton.

⁷ Ahaysa wacarriy kee qaybik-radiyyak assaaqetton; luk sugten gaddal namma afah yaduure gadda geettoonuuh, qililisetton. Tonnal isinni baaxol assamaaqat xiinetton; amurruqe sinni rufto geetton.

⁸ Macaay inteenik, yooy YALLAH yani qadaalat kicna. Cado akak carrisan sadgatak tu cabaanam niqibiyo. Liyoh an diggal inni ummattah galto gacseyyo; baye sinni qahdi ken lih heeyyo.

⁹ Baadal tan ummattah addal, migaq le mara akkelon. Ken yable mari YALLIH barkat gee mara kinnoonum keenik aaxigelon.

YALLI DOORE NUM ABE SAARE

¹⁰ Yi rufto akak tanim YALLAAY; yi Dagelta aaxaguk kaxxam tassa axce. Macaay inteenik, qarus kee qibna digib sartanat akah bilqitte'nnal, YALLI wadu-kee-qadaalat sartanat yot hee.

¹¹ Baaxo elle anxaxxoyse'nnal, bustaan qiden dariyyi elle yaysubuke'nnal, YALLAY Mulki-lehiyya ummattah inkih cakkik-tan-maqaane bahsiiseleh; baadal tan ummatta inkih kaa faylisele.