Yasaqya 60 - NABUWWA KEE MALIKWA

YALLI ISI MARAH IFU AKKELE

¹ Yarusalaamey, ifi kol ifseemih sabbatah ugutey ayroh innah ifey; YALLIH nabna kol ifta.

² Macaay inteenik, baadal dite gactaah, baadal tan ummatta diteh addat gexxa'mmay, ku amol YALLIH ifi ifele. Kay nabna ku addal gacele.

³ Doolatwa inkih, ku ifuy maaci ifih innah urahiyyah goranah amaatele; malikwa kaadu ku ifuh goranah amaatele.

⁴ YALLI iyyaamah: «Deraafi isik wagga haay takkem ubul! Yakkeenimik gaaboowaanah koh fan yamaateenim matabla? Say-xaylo kok aliilit xabba heenih beeloonuh; kok lab-xaylo xeri'kkek amaatele.

⁵ Aham akkih ablettooh, ruffu axcetto. Abtu wayta ruftoh xagar kok farci akkele. Baadal tan ummatta tedderem inkih koo fanah baahele; badak woo qaxa raaqa mari isi gadda koo fan baahele.

⁶ Kulli kaalibik koo fan amaatelon. Miidiyan kee Qeefa rasuk mango soosá luk kol amaateloonuuh, kok deraafit raqta baaxol too soosák amaggeleeh; Sabâ-garik dahab kee qaydarus gaalal quukah le mari amaatele. Too mari, anu abe kaxxa taamat yaabak, yoo fayliselon.

⁷ Keedar kee Nebayot mari illik elli haam sadgatah ku fan baahelon. Yoo ruffu haana'gidih, sadgatah asguudeloonuh; anu too sadgat keenik oggoleyyo. Tonnal yi qariy bilqa lehiyya qax-meqe bilqak kibeyyo.

⁸ Qamburreh innah gexak tamaatem macaay? Haaddah buxa fan taduure camaama celtam macaay?

⁹ Aham xer baaxok yamaate maraakibi; a maraakib, yi xaylo edde tan maraakibi. Israayil doore Dageltay *kudduusuk yanih migaaqih nabnah baahen dahab kee lakqo a maraakibih addat tan. Tah akah abaanam, yoo ku Dagelti nabna kot heemih sabbata. Macaay intek, allî-baaxoh mari yoo qambaalita» 'yaanam YALLI Yarusalaamak iyyah yan.

¹⁰ Qagisak teetik iyyaamah: «Koo inqibeeh koo digaaleh suge'mmay, koh liyoh an kacanu kee inni racmatta koo aybulleemih sabbatah, allak yemeete mari ku gasoosa xisele; ken malikwa ku taamat gacele.

¹¹ Mango baaxoh malikwa kee ken-doolatwah-duyyek-tedderem koo fan akah baahan innah, ku gasoh afoofi bar kee laqoh fakimit gacele.

¹² Takkay immay koh taamite wayta doolatwa bayele; ken baaxo abuuruh raaqele.

¹³ Yi qariy taahirik yanit qax-maqaane haana'gidiiy too qari elle yan magaalah migaq fayya haana'gidih, Lubnaan rasuk nabam meqe coox koh baahelon.

¹⁴ Kot xukkutak yen marih xaylo amaatele; koo yassakaxxeeni'gidih gommoh koh radelon. Duma koo bursutak yen mari ku ibih gubat radeh, ‹YALLIH magaalay! Siyon magaalay! Israayil doore Dageltay *Kudduusuk yanihiyyah magaalay› 'yaanam axcuk koo diyaarelon.

¹⁵ Koo maaqileenih koo yinqibeenih sugeenih, dibuukuyitteh abur tekkeh sugte'mmay, kaxxa magaalay qaxmeqe koo abeyyo. Kulli way farci elle yan magaala koo abeyyo.

¹⁶ Doolatwa kee malikwa meqe'nnal koo dacrisele. Too waqdi yooy YALLAH yani koo wadem aaxigetto. Xixxibaanek koo yeyyeeqe Dagelta kinniyom aaxigetto. Yaqkuub doore Dageltay cayla le kinniyom aaxigetto.

¹⁷ «Nacaas aftok, dahab koh baaheyyo; biriita kee bocoh aftok, lakqo kee nacaas koh baaheyyo. Xeet aftok, biriita koh baaheyyo. Ku addal xintoh abbobtih yan mari ahak wadir kot maxukkuta. Qadaalat kee amaanah koo xiinisa mara ken abeyyo.

¹⁸ Umaane sinaamat abaanam gaba kalele; umaane ahaysa rasu kok mabayissa. Yi wadoot reebu koh akkeleeh; kaxxam yoo faylisetto.

¹⁹ Ahaysa laqo ayroh ifut faxxu waytam mantu; bari kaadu alsah ifut faxu waam mali. Yoo YALLI way-baruge-sinni-ifu koh akkele; nabna ku Dageltak geetto.

²⁰ Rooka gaba kok edde kalta wakti amaatele. Yoo YALLI way baruge sinni ifu koh akkele; ayro kee alsah ifuk fula koh ifisak sugeyyo.

²¹ Ummatta cakkik-tan-taamah taamitele; baaxo kulli way kenim akkele. Liyoh an qax-maqaane keenil elle tambulle'gidih, ken bicisseeh ken daabissem yoo.

²² Siinik qunxa mari naba mara akkele; siinik gaca mari qande le mara akkele. Anu YALLA kinniyooh; edde akkeh meqe waktit, taham inkih xayuk absiiseyyo» 'yaanam iyyah yan.