Yasaqya 6 - NABUWWA KEE MALIKWA

YALLI YASAQYA NABI YAKKE'GIDIH SEECE

¹ Malik Quddiyya edde rabe sanatih addat Goyta uble. Usuk isi dardaarinni korsiy fayya kee nabna lehiyyal daffeyak yeneeh; xagarat culsah le sartan inkih yan Yallih Qibaadah Qari duudeh yen.

² Kaak daga rooci leemiy hadig intahiyya haadak ten. Wohimik kulli tii lica gali luk yen. Keenik kulli tii kaadu fooca namma galit isik qellisak yen. Ibitte kaadu namma galit isik qellisak yeneeh, raaqa namma galit haadah ken uble.

³ Tittah seecak yeneeniih, «YALLAY Nabaamak Nabahiyya *kudduusuk yan. YALLAY Nabaamak Nabahiyya *kudduusuk yan. YALLAY Nabaamak Nabahiyya *kudduusuk yan. Kay nabna inkih tan addunya duddah» iyyen.

⁴ Ken anay Yallih Qibaadah-Qari akak culan culma yesgeyyeeh; woo qari qeerik yembegge.

⁵ Anu too waqdi exceemih, «Woyyow yi nabsow! YALLAY Nabaamak Nabaah malik kinnihiyya inni intih uble'mmay, edde yaabinnaan yab yok taahirik mayanay; addat akak anim, taahirik ane waa yab yaaba marih fanak tanih tanik, baati yot tekkeh tan» exce.

⁶ Sarrak woo rooci leemik tiyak teeni maxbaxat yabbixe xibciniy sadgat elle aben aracak beehiyya gabat luk haadak yol oobe.

⁷ Too waqdi woo urta xibcintot sokto yok xagga heeh, iyyeemih, «Taway taham sokto kok xagteeh; tahak wadir edde sugte umaane kok katteeh; abte dambik qafu geyteh» yok iyye.

⁸ Sarrak «Farmoh iyya ruubaah? Ni farmoyta takku waytam iyyaay?» 'yaanam YALLA axcih oobbe. Anu too waqdiiy, «Anu akkeyyok yoo rub» exce.

⁹ Too waqdi, «Gexay a farmo ummattah gabat bey» yok iyye. Farmoh yok iyyemii, «Faxeh gide taabbeenimih edde maraddan. Faxeh gide tableenimih takkem kinnim mataaxigan keenik inxic» yok iyye.

¹⁰ Sarrak kaadu yok iyyeemih, «Hawri ken cabsiisaay, ayti maleela kee inti maleelay tu able wayta ken ab. Tonnal tu mayablaanaay, tu mayaabbaanaay tut maradan. Intih yubleeniih, aytih yoobbeeniih, tut rade ken tekkek, yol yaduureenim takkeeh, yol yuduureenik urelon» yok iyye.

¹¹ Too waqdi anu kaak exceemih, «YALLAW, ah magide fan sugtu waytaamaay?» exce. Too waqdi usuk yok iyyeemih, «Magaalooli inkih abuuruh raqqaay foyya tikka intam fanah akkuk sugeleeh, tonnah kaadu, qarwa sinaamak foyyah raqqaay baaxol sugtem inkih bayya intam fanah akkuk sugele.

¹² Sarrak ummatta inkih xer baaxo askiliqeyyo. Baaxo inkih dibuk raaqele.

¹³ Baaxô-bagul bool yakke marak tabna num raqtaamah, naqboytit qagitak baaxo warareleeh, baaxot gira ruubelon. Takkay immay yirgiqen caxak buxux elle raaqe'nnal, taahirik yan dariyyuy sarra yaabuku waa raaqele» yok iyye.