Yasaqya 59 - NABUWWA KEE MALIKWA

NABI YASAQYA UMMATTA ABTE DAMBIK ILAAQEH

¹ YALLI ux-gabay sin aleele waytahiyya lem makkalina; catoh kaah sectan waqdi, ayti maliy aabbe waa makkalina.

² Sin akah aabbe waam, isin abtan umaaneh sabbata. Sin Dageltak sin tayxeerem, isin abtan dambi.

³ Diraabat yabtaanaah, kullim dirkih abtaanaah, qabal gabal siinik yan. Toh inkih qellatay isin abtaana.

⁴ «Qadaalat faxximtaama» iyya num mayanaay, cokmi-buxal qadô-baguuk yaabe num mayan. Foyyah taniimil kibaal haanah, diraabat yaabaanah, umam malsaanah, umaane aban.

^5-6 Isin malissan uma mala, summih abeesa xalte naalah gide. Too naala yakme num rabele. Abeesa xalte naalah addak abeesa tawqe. Malissan mala siinih xiqtam maliiy, qarok-qarik bicsen sarih gide. Kulli way umaanel malissaanaah; elle malisseenim abtoonuh, bical gactan.

⁷ Tu baahe wee mara sissikuk qiddaanah, bagi siinik xuwaw mali. Umaanek sa tu mamalissaanaah, elle gexinnaan ikkel baaxo abur kee baatî-gadda abteenih cabtan.

⁸ Amaan le gita mataaxigan; qadaalatak ane wannaanim abtan. Makoh yan gitat gexxaanaah woo gitat sin lih gexe mari amaan way magenna.

⁹ Ummatta intaamah, «Yalli nee akah cate waam, tohumu. Qadaalat nek yexxeereeh; cakkik tan maqaane nek teerreh. Edde genxa ifu geennom nekkele'mmay, edde nanim diteh addaay,

¹⁰ inti maleelah innah tataf inna. Kaxxa laqo, bari yekkeh innah, nandafoofole. Mango celeema fanat, rabe marih innah boolatne.

^11-12 Ali innah garadnaah; camaamah innah iihisak nan. YALLAW, kol bahne dambik loowo mangoh. Tohih sabbatah qadaalat fanxa'mmay qadaalat mayanaay; nee wadda'gidih kok qamballa'mmay, tu geenih manan. Abne dambi nel sumaaqitaah; qellataay umaane ninnik diggi hayna.

¹³ Kooy ni Dagelta kinnihiyyal makneeh, koo kataye cinneeh kok nexxeere. Sahdat elle xukkutan inna malisnaah; edde nacsubem, hoxaay; edde yabnam, diraaba. Tah inkih abne» 'yaanam iyyan.

¹⁴ Tonna-leemiik, qadaalat mayanaay; cakkik tan maqaane baaxok teerreh. Numma qado-laqo qellitteeh, amaanat bayeh.

¹⁵ Yaaminen mari mayanaay; umaanek waasiminnaan numuk amot gacen. YALLI aham yubleeh, qadaalat ane waam yuble waqdi faxe cineh.

YALLI ISI MARA WADA'GIDIH AMAATELE

¹⁶ Tohuk ken cata num ane waam yuble waqdi, kaal faxe-waynaan tekke. Tonna leemiik isi-qadaalatay maqar let, YALLI isi gabat ken wade.

¹⁷ YALLI, qadaalat alil-dacayrî-birtih innah sarteeh, wadu birti-kalabtah innah haysiteeh, canê-gacsa sartan innah sarteeh, bagcarra raraytoh innah haysite.

¹⁸ Kullim cakki-gitah gacseleeh, sahdal baahen umaaneh sahda digaalele. Kay naqboytit abba heen umaaneh digaalele; xer baaxol yan mara kinni way digaalele.

¹⁹ Tonnal ayrô-mawqaay ayrô-culmal kulli num kaak meysitele; kay nabnak meysitelon. Haruurugutak ooba weeqih innah amaateleeh, kullim duufut beya caacayih innal amaatele.

²⁰ YALLI iyyaamah, «Dambik toobite marah kalalu kee cato yakke'gidih, wadeeni Siyon fan amaatele» iyya.

YALLIH QAHDI

²¹ YALLI qagseh iyyaamah, «Dambik toobite mara lih haa qahdi ah kaana: inni baritto kee inni Roocaaniyya kot haa. Tonna leemiik tahak wadir ellecaboh ayro fanah, kooy ku xaylo kee keenik radu waa mara kaadu yi baritto oggolettoonuh, barsetton. Taham intam yoo YALLA» iyyah yan.