Yasaqya 58 - NABUWWA KEE MALIKWA

NUMMÂ-DIINI

¹ YALLI iyyaamah, «Anay fayya haay! Baantah innah kaayey! Yaqkuubuk rade maray yi mara kinnihiyyak, ‹Yalla cinteenih dambit assen› inxic.

² Macaay intek, cakki-gital-gexa-marih innal, ken Dagelti iyyeemit darre cabe wee marih innal, oson kulli ayro, ‹Kay gita naaxigem fanxaah, kay amri oggollam fanxa› axcuk yoo yaqbuden. ‹Koo naqbudeemit rufto geennok, qadaalat le xinto neh eyyeq› yok iyyan.

³ Yok iyyaanamah, ‹Nek able waytek, macâ-sabbatah soomnaah? Atu baaqid net alle waytek, maca koh rammitnaa?› 'yaanam iyyan. Takkay immay anu keenik axceemih, ‹Soom abtan saaku, isin kaadu isinnih faxxeenim abtaanaah, siinih taamita marah cakki matacaan.

⁴ Tohuk kalah kaadu, abtan soom, qeebi kee qamalliinot siinik caba; naqabu kee qeebih sin yecee. Hay, annah yan soomut abtan dooqa oggoleyyom takkaleenii?

⁵ Soomtan waqdi, isinni biyaktaanah amo bayreh innah addah qunuunussu haytaanaah; sartanah *qabuudu xagarat haytaanah gombod baaxol caxxa hayteenih deerih elle gactan. Soomuh litoonum tahaa? Anu a soom siinik assakootem maay takkalen?› keenik axce.

⁶ «Anu faxa soom siinih warisu waa. Qadaalat-sinni-silsilatay sahda edde tabbixeeni kee sahdak fillal tabbixen koyta sahdâ-fillak kalay edde xukkutan mari currih yanay inxica.

⁷ Takmen maaqo qulula mara lih haysita. Qari sinni marah isinni qarih afa faka. Sartanah xagarat haam sinni marah sartan acuya; mare siinih le maral litoonum macinina.

⁸ Toh abteenik, qusba-mano, saaku tawqe ayroytah innah, siinil ifele; liton dalek xayih uretton. Liton qadaalat sin dacriseleeh, anu liyoh an nabnat kulliimik sin dacrisele.

⁹ Deero abtan waqdi, sin deero aabbeyyooh; catoh yoh sectan way, ‹Ah yoo› axceyyo. Sahdat abtan xukko cabteeniih sahda burutaanamak raqteeniih uma qangarah maxcok af tibba hayteeniih

¹⁰ satqita marah isinni maaqo teceeniih xukkot yan mari faxam keenih abteenik, edde tanin dite siinik katta inteh laqoh innah yan ifi siinih gacele.

¹¹ Anu kulli way sin miraaciseyyooh gadaamittan waqdi, amqinnaanimik sin cayiseyyo. Qande siinit heeyyooh mango lee geyte buqreh innah sin abeyyooh way kafe waa buyyi sin abeyyo.

¹² Sin mari duma abuuruh sugte arooca wadir xiseleeh duma sugte rakiiboh bagul qusba qarwa xisele. Isin baateh sugte gaso xisaah abuuruh sugte qarwa bicsa mara deqsitetton» iyyah yan.

¹³ YALLI qagseh iyyeemih, «Sabti ayro aki ayrok fula, taahirik tan ayro kinnim aaxaguk, too ayrot isinnih faxxaanam maabinay; yi xintol saduh tanim maabina. Yi ayroy taahirik tanihiyya kaxxa farcat le ayro deqsitak, essekexxeyaay, too ayrot isinni gita magexinaay, isinnih faxxaanam maabinaay, tonnah kaadu, tuxxiq sinni yaabat mayaabina.

¹⁴ Toh abteenik, yooy YALLA kinnihiyyat rufto geetton. Baadal bohoy sinni mara sin abeyyo. Sin kaxxa abba Yaqkuubuh xagana akah culem inkih siinih aceeyyo. Tah siinik intam yoo YALLA» 'yaanam iyye.