Yasaqya 57 - NABUWWA KEE MALIKWA

YALLI DUYYE-YAQBUDE-MARAL ACKUMELE

¹ Cakki-gital-gexa-mari rabeh immay, woh, num afqadok macubbusa. Yalla kicna mari rabeh immay, num baaqid edde mahaysitinna. Too mari rabek wadir, ken-tabbixe-umaane ane waytaamat num maradinna. Addunyal umaane takkeemik dumal, Yalli is fan ken bee.

² Cakki gital sugeh rabe mari, rabek wadir amaan kee affoofiyya geelon.

³ Yalli gersi marak iyyaamah: «Siinih tu gactek, amay siinik axcem oobbeya. Isin sicreynitte bis liton. Dalwa aba mara kee xiiqareh-xiinak mataysan.

⁴ Iyya tekkeenih sinaamal anqassaanaah? Makoleelaay dirableelay, af elle raqeeqissaanam iyyaay?

⁵ Kaxxa cooxih gubay yalla akak intan duyye elle taqbudeenihiyyal, mango dalwa abtaanaah; xixxaqak tan gablooli kee goloolah addal, isinni xaylo sadgatah qiddan.

⁶ Too goloolak saytun xeet beyya haytaanaah yalla axcuk taqbuden. Qinabak bicissen kamri kee daro, woo xeetih sadgatah bahtan. Anu, abtan umaane abalih, siinih xuwaawam meqem kinnim maay takkalen?

⁷ Sadgat abtaana'gidiiy dalwa elle abtaana'gidih, kaxxa qaleela tawqen.

⁸ Yalla axcuk taqbuden duyyeh asta, qarik albaabih-bagu kee albaabih garil haytan. Yoo maaqilteenih. Sahdâ foocal, lakqo akah taceen agabu luk, qarkaytô-bagul xintan. Bica ken luk haysitteenih, ken gaba wagittan. Too qarkaytoh bagul dalwah abittok cayya intan.

⁹ Mango qatri kee saliid (zeyti) gabat hayya hayteenih, kaxxa malik fan safarten. Farmoh afat ruuben mara xer baaxo fan rubtaanaah; akeerah agantah ken rubtan.

¹⁰ Mangom safarteenih akak taqabteeni'mmay, ‹Neh xiqtam mali› maxcinniton. Qusba qaafiyat haysitteenih, maboolaatinniton.

¹¹ Yoo akah hawwenteenih yot darre akah cabteenim, isin akak meysittaanam macaay? Yok akah meysite waytaanam mango wakti tibba siinik exceemi innaa?

¹² Meqe mara kinnitoonum takkaleenih, abtaanam meqem takkalen. Takkay immay abtaanam siinik aybeleeleqeyyooh, sin taama siinih xiqtu waytam mali.

¹³ Catô-goranah deero abtoonu waytan saaku, ama yalla axcuk taqbuden duyye sin cattay! A duyye caacay duufut beele. Takkay immay reebuh yoo eleelite mari, xagana keenih akah cule baaxol gaceloonuuh, yi qaril yoo aqbudelon» 'yaanam iyyah yan.

YALLI MASAAKIINA CATELE

¹⁴ YALLI iyyaamah, «Gita yi marah fiyaay bical keenih haa. Adaf keenil takke duyye giti afak keenik kala» 'yaanam iyyah yan.

¹⁵ Macaay inteenik, daga raaqa *kudduusuk yan Dageltay kulli way waarahiyya iyyaamah: «Elle anim daga raaqah kudduusuk yan araca'mmay, toh lih kaadu yoh rammitaah toobita mara lih anyo. Ken lih akah anim, kibaal kee niya keenit haa'gidi.

¹⁶ Tonnal ahak wadir keenik tu mawaay, ahaysa naqabut ken lih maraaqa. Kulli waqdi tu keenik week, sinam boolaateleeh, niya keenik rabele.

¹⁷ Oson aban dambi kee bukko kee guqulul adoobitak sugeenimih sabbatah, ken inqibeh sugeeh, tonna leemiik ken digaaleeh darre keenit cabe. Keenih tu gactek, yab aabbe waa maray isinnih faxem abahiyyak sugen.

^18-19 Ken taama ableh immay, innih ken uruseyyo. Innih ken miraaciseyyooh ken cateyyo. Rookat yan marat niya heeyyooh, yok iyyaanam ken afat heeyyo. Xer ikke kee xayi ikkel yan marah inkih, kaxxa amaan aceeyyo. Inni mara innih uruseyyo» 'yaanam iyya YALLI.

²⁰ Tonna'mmay umaane le mari, baddi haffoy haffok aade sinniih guddaafa kee wasak afat bahtahiyyah bis lon.

²¹ «Umaane le mari amaan mageya» 'yaanam iyya yi Dagelti.