Yasaqya 56 - NABUWWA KEE MALIKWA

UMMAT INKIH YALLIH IM AKKELE

¹ YALLI iyyaamah, «Yi qadaalat elle yan inna tabloonu waytaanah, sin edde catu waa wakti xayiimih sabbatah, qadaalatat taamitaay cakkik tanim aba.

² Tonnah tanim aba numuy baguuk edde taamitahiyyat barkat heeyyo. Too num umam akak inxicci 'yaanamak tut ase waah, sabti-ayro yassakaxxeeh too ayro maabina excem abe waa numu» 'yaanam iyyah yan.

³ Allî-baaxoh-numuy YALLA yaqbudeenim dooritehiyya, «YALLI isi numuh yoo maliiy, isi mara lih kaa aqbudi yoo maha» 'yaanam axce waay. Seelabu le num, «Kafte caxa kinniyo» axce waay.

⁴ Macaay inteenik, YALLI, seelabu le marak iyyaamah, «Sabti ayroy yoo edde yaqbuden ayro kinni tessekexxeeniih, yoo ruffa haytam abteeniih yi qahdil diggi inteenik,

⁵ addunyal xaylo siinik raqtaamak fula, sin migaq yi qarih addal sahda kassitak sugeleeh, yi marih addal migaq akak hawwensime waa mara akkettoonuuh, migaq siinik mahawwensima› 'yaanam iyya.

⁶ YALLI, allî-baaxoh-maray kaa akcinuk kaa aynabuk kay taamat gacaana'gidih kaa yaqbudeenim dooritehiyyak, iyyaamah: «Sabti ayro assakaxxuk yi qahdil digga inteenik,

⁷ Siyon qaley taahirik tanihiyya fan sin baaheyyooh, yi migaaqal abtan sadgat siinik oggoleyyo. Dooqa yoo fan elle aban qarih addal ruffa axcetton. Tonna-leemiik, yi qari baadal tan ummat inkih dooqa elle abta qari deqsitele» 'yaanam keenik iyyah yan.

⁸ YALLI Israayilik fixixeh suge mara ittah gacsa. Kaay Mulki le iyyeemih, «Kaadu gersi maray keenit yangalu waahiyya baaheyyo» 'yaanamah xagna cule.

YALLI, ISRAAYIL-ABBOBTI DIGAALAAMAH QAHDI CULE

⁹ Kee alluwwey, garbok amaay akuma!

¹⁰ Israayilit dacayrih yan mari inkih, inti-maleelaay iggimaleela. Oson dacayrih buxat yan kutay tu yableemih kaaye waahiyyah gide. Deerih gacca 'yeenih xiinan. A mari manxu xin kicna. Soonitaanamak sa abaanam malon.

¹¹ Maaqok cayye sinni kuutah gide. A marih-loynitte kas maliiy tut maradda. Kulli num isit amqinnaanim keenik aba. Bukko kee guqulul adoobitan.

¹² Iyyaanamah, «Ama qinabak bicsen kamri neh baahaay, dudnah gide akak naaqubay. Beeri kaadu a saakih innah maacise kee ayse akkelek» iyyan.