Yasaqya 55 - NABUWWA KEE MALIKWA

TOOBITAAY YALLA FAN UDUURA

¹ YALLI iyyaamah, «Kee, bakar le maraw, lee akkel tanik, ama. Kee, lakqo sinni maraw, amay gaqambo gee liton; akuma. Amay, qinabak bicsen kamri kee can, limo sinnim gee liton; aquba.

² Sin cayise waytaamat lakqo macah finqissan? Satqat akak raqtoonu waytaanamat geytan duyye mabaysina. Yi yab oobbeyaay anu siinik axcem aba; tonnal kulliimik tayse maaqoy niya siinik ruffu edde inta geetton.

³ Yi ummatey anu axcem ankacisaay yi fan ama; rooci siinik waara'gidih ankacisa. Waara xagana sin lih heeyyooh, Dawuduh qahdi akah cule kacanuy digga lehiyya siinit heeyyo.

⁴ Dawud baadal-tan-ummattah yi-sumaq kaa abeeh, ummatta inkih miraacisaah ken amrisa num kaa abe.

⁵ Wagitey! Israayil doore Dageltay kudduusuk yanihiyya migaq kee nabna kum abeemih sabbatah, koo aaxaguk suge wee marah koo fan edde yamaateeni'gidih amri ruubettooh; too mari koo fan arduk amaatele. Tamah abtu waytam, yoo YALLAY ku Dagelta kinnihiyya» iyye.

⁶ Uxih kaa geettoonuk, YALLAL uduura! Away garit siinik yanik, catoh kaah seeca!

⁷ Umeynit edde yanin uma gitak yaduuroonay; baguh yacsuben umaane caboonay. YALLA kinni ni Dageltal yaduuroonay. Toh abeenik, keenih racmateleeh, qafu keenih abele.

⁸ YALLI iyyaamah, «Anu acsubem kee isin tacsubeenim inkim hinnaay; anu abam kee isin abtaanam inkim hinnam taaxigeenim meqe.

⁹ Qaran baaxok daga elle raaqe'nnal, anu ascubem isin tacsubeenimik daga raqtaah, abem isin abtaanamak daga raqta.

^10-11 Yi qangara baaxo allaggoosaah qaraanak oobe barad kee roobih gide kinnim taaxigeenim meqe. Rob qaran fan gacak duma, daro kee coox yaysubukeeh, tonnal dariyyu bahsiiseeh, sinaamah maaqo bahsiise. Yi qangara too gide. Anu exce qangara kaadu baaxot maraddaay, too anu elle inxicci exce innal akkele. Anu faxam duuduseleeh, tet akah excem agdubele.

¹² Naqoosinnak wallitak gexettoonum kaadu taaxigeenim meqe; amaanah awqetton. Qaleela kee koomaami sin foocal farcih gad abeleeh, coox kaadu farcih qililisele.

¹³ A saaku waaqeexa elle tan aracal, saagan aabukele; sibaasib elle yan aracal, ceba aabukele. Taham, YALLA elle kassitan waarta asta takke» iyyah yan.