Yasaqya 54 - NABUWWA KEE MALIKWA

YALLI SIYOONUH LE KACANU

¹ Maxalaytoh tan barray, qililisay wallit. Ahak wadir baqala le barra xalta xaylok fuli, dibuk ten barra xaylo luk sugeleemih sabbatah, atu way dabbaqaane wayte barray, anay fayya haay qililis!

² Addat akak tan siraq farakka hayisay bagu bahsis. Akoota akak eyxeerra hayisay, edde daabisan biriitat meqe'nnah daabis. «Woh yoh matakka» maxcin.

³ Macaay intek, atu woo exxak a exxal guubuh elle gacta baaxo aymagguk aymaggetto. A saaku baadal tan ummatta elle tan baaxo, ku mari raaqisele. A saaku abuuruh tan magaaloolil, kok radu waa mari amaggele.

⁴ Qunxuk ten saaku kot rade biyak kot maqagitaay, gubnah innah edde sugte dibuukitiyyak katettoomih sabbatah, ahaysa qaybik maradda'mmay mameysitin; qaybik koo maqidaana'mmay niya isik margaqin.

⁵ Macaay intek, baqli innah koo dacrissam, koo gine Dagelta; YALLAY Nabaamak Nabahiyyah tanim kaa. Koo waddam, Israayil doore Dageltay kudduusuk yanihiyya; inkih tan addunya xiinissam kaa.

⁶ Qunxih digibte barray baqli cabeeh bagi akak ankayeh bis luk sugte'mmay, YALLI koh seeceh isil koo gacse. Ku Dagelti kok iyyaamah:

⁷ «Dumah dago waktih gide koo maaqileh suge'mmay, awayah tu gactek, kaxxam koh xuwaaweh innil koo gacseyyo.

⁸ Dago waktih gide kaxxam kot bagcarriteeh darre kot cabeh suge'mmay, ahak wadir way koh maamay, koh nacruureyyooh, kulli way koo akcineyyo» 'yaanam kok iyyah yan. YALLAY koo wadahiyya tama'nnah kok iyya.

⁹ YALLI kaadu kok iyyaamah, «Anu Nuuc dabaanal ‹Tahak wadiril baaxo weeqat mabaysa› 'yaanam axcuk xagana culeh suge. Away kaadu ahak wadir kot mabagcarritaay koo masahita» 'yaanam axcuk xagana koh cula.

¹⁰ Qaleeli bututtukka 'yaah, koomaami suge wayteh innah gactaamah, koh liyo kacni way mabaya. Amaanah koo xiiniseyyoomuh xagana koh cula» 'yaanam kok iyya. Tamah kok intam, YALLAY koh nacruurahiyya.

¹¹ YALLI iyyaamah, «Biyak le magaalay gadaamittehiyyay, koo cataah aytikuma kok iyya num magennito'mmay, anu innih nammeyhaytô-xisneh koo xiseyyo. Limoh gibdih yan xeetik koo xiseyyo. Akak xisen xeet qaxmeqe-kallat edde haysiteyyooh, rakiibo kok kuclinan bisu le xeetik xiseyyo.

¹² Ku gasoh amol tan fayyat raqta arooca liliq iyya xeetik xiseyyo; afa kok xibcin inna le luuluk xiseyyo; maroh kot tan gaso limo gibdi xeetik xiseyyo.

¹³ Ku addal tan ummatta abtu waytam innih ken barseyyooh, meqe manooy amaanah ken xiiniseyyo.

¹⁴ Cakkik tan maqaane xinto kok akkele; xukko kee cunxok amaan akketto.

¹⁵ Qeebi kot abu waa mari yi amrik kot abem madeqsita; qeebi kot abu waa mari ku gubah gacele.

¹⁶ Gabâ-birta bicsa mara tuklukem yoo; silaacat sinam qidda qaskar gintem yoo.

¹⁷ Tonna'mmay faxe silac kol baahu waam mali. Koo akah istikiyya hannaanimil, gacissu waytam geetto. Inni naqoosah acayu waam, tamah teeti. Anu keenih acee cakkik tanim, tamah teeti» 'yaanam iyya. Tamah YALLI iyyaama.