Yasaqya 53 - NABUWWA KEE MALIKWA

¹ Barinneh warisne farmo miyyi nek elle yeemene? YALLI le cayla kee qande annal taniih a ceelo lem sinam cubbussu madudda.

² Kafin-baaxoy laqaymumtal toobokeh ten caxah gide akah yenem, YALLIH garil. Xagarat kaak yablen nabnay, kaa tablem kaa elle taaxige, kay xagarat matambulla. Too misliino luk mananna. Kaa elle nassakaxxe hayba kay xagarat maballino.

³ Kaa nuble way kaa burunneh, kaa cinneh xayyoowe kalleh. Ceeceyite num sugeh yen; mango biyak kaa yibbixe. Maqal kaat haysittem matan. Kulli num darre kaat cabe; kaa burunneh kaa maaqilleh.

⁴ Ni gibdaabina isil heeh yen; ni aftok usuk biyaakite; Umam kaal baahak yeneenih kaa yoogoren; kaa biyaaken. Tah inkih kaat akah tekkem Yallih digaala nekkele.

⁵ Nanu bahneh sugne dambih, kaa mudeeniih, kaa tafqeenih; bahne qellat kee ni umaaneh, ugra kaat abak, kaa qiden. Kay nabsit tekke digaalah, amaan kee wagari geyne. Kay xagarat aben atkah, sahhilowneh qaffonneh nen.

⁶ Gitak hoxe illih innal nen. Gitak honxeh, makot genxe; ninnih fanxem abak sugne. Nakkeemiik, tikka 'nah gidek nel amaatuk ten digaalah, YALLI ni aftok kaa digaale. Nanu edde asneh sugne dambi YALLI kay amo yeyyeeqe.

⁷ Kaat xukkuten; kaa biyaaken; immay elle asbiruk suge; asbiruk rammitak suge. Guduqqa axcuk masuginna. Neyyah beyan marqih innah, suuf 'kak kalan idah innah, afak guduqqa maxcinna.

⁸ Cokmih casbi fanah kaa been; qadaalat sinni cokmi aben; cokmih raba kaal yuckumen. Annah tanim kaat akkelem teexegeeh tekkelem iyyay? Num yekkeleh sugem hinna. Qellat leeh, dambi le taamay yi ummat abteeh, bahtehiyyah usuk rabeeh fida yekke.

⁹ Diraabat way mayaabinnaay, umaanet way maasinna'mmay, umeynit lih kaa yoogoqen. Gadda leelah yan mara lih, kabrit kaa heen; diikot kaa heen.»

¹⁰ YALLI tahak annah iyye; «A biyak kaat akah yekkem, yi fayxi kee yi raabiti. Usuk sahdah yekke fida, ummatah qafu baahele. Kaak radu waa mara ableleh; waarele, mangom sugele. Anu faxaah abam faxam, kay gabat bicseh abeyyo.

¹¹ Ganditeh biyaakite'mmay a biyak kaat akah yekkem, foyya hinnam aaxigele. Toh aaxaguk ruffa axcele. Yi naqasuy qadaalat le isi ixxigat mango marah cakki geeleh bahsiisele. Woo mari abeh suge umaane isil akkuqeleeh, beele.

¹² Saraf kee migaq le reeda, kaah eceeh, kayim abeyyo; mango ummat kee sahdah addat yassakaxxen num kaa abeyyo. Cayla-leela fanat kaadu cayla-liiy celem kaa abeyyo. Toh inkih kaah akah abem: isi fayxiik isi rooci calaaliseeh, fidah yecee; umeynittet loowoh gace. Umeynit edde asse dambi isi amol hayya heeh beeh yen. ‹Yallaw, qafu keenih inxic›, 'yaanam axcuk yoo kallace» 'yaanam YALLI iyye.