Yasaqya 52 - NABUWWA KEE MALIKWA

YALLI ISI MARA WADELE

¹ Siyon maraw, uguta! Isinni qande kee nabna haysita. Yallih maray *taahirik yani kinnitoonuk, meqe sartanat gaca. Ahak wadir diini-maleela kee nadaasa-leela sin gasoh afak maculta.

² Yarusalaam maraw, siisa isinnik urgufa. Ama elle tanin siisak katay, dardaarinni korsih amol gaca. Casbit yan Siyon-maraw, axawah edde tanin silsilat isinnik kala.

³ Macaay inteenik, YALLI iyyaama, «Naqoosa tekken saaku, siinih lakqo mahannoonuuy; a saaku kaadu currih tawqeeni'gidih, yagdiyen lakqo matan» 'yaanam iyyah yan.

⁴ YALLAY Mulki lehiyya qagseh iyyamaa: «Duma Masri fan gexxeenih, Masri marih addal allî-baaxoh marih innal sugten. Sarrak Assuuriyah mari siinit xukkutak suge.

⁵ A saaku kaadu tonnah tanim siinit tekke. Seewah been marah tantoonuuh, wohul yeexegen lakqo matana. Sin amol reedah yan mari yol tirtirisaah, ‹Nanu abnu waynaamow› iyyan. Inkih tan ayro yoo xaafak assan.

⁶ Tonna'mmay yamaatu waa dabaanal yi mari anu Yalla kinniyom aaxigeleeh; too ayro, ‹Wagitey ah yoo› intam yoo kinnim aaxigelon» iyyah yan.

⁷ Farmô-numuy qaleelak taturra 'yeh wagari xaaguy meqehiyya gabat lehiyya tableenim manxu meqeeh; too num waddiimaanam sinaamah warsaah, Siyon marak iyyaamah, «Sin Dagelti maliki» keenik iyya.

⁸ Magaalak gasoh afa dacrisa mari xongolo fayya haak ruftoh saxxaq aban. Macaay inteenik, YALLI Siyon fan yaduurem isinni intit yableenih yanin.

⁹ YALLI isi magaala umaanek wadeh yaniih, isi ummattat niya heeh yanik, Yarusalaam magaalay abuuruh sugtek, away satta le gaditte ab.

¹⁰ Baadal tan ummatta inkih, YALLI isi gabay taahirik tanit abe taama isinni intit yubleenih; baadal enna 'ya mari, Yalli isi ummatta umaanek wadem aaxigele.

¹¹ YALLIH Qibaadah-Qarih-duyye quukah beya maraw, wokkek eweqay gexa. Nadaasah tanim gabah maxaginaay, taahirik gacay gexa.

¹² A saaku gexot akah tasissikeenim manton; akak kuddaanam manton. YALLI isih foocat siinik gacca 'yeh sin beeleeh, kulli kabuk isih sin dacrisele.

YALLIH NAQASUY BIYAAKITE

¹³ YALLI yaabeh annah iyye: Aham kaana; yi naqsi kaa. Yi naqsi edde asu waa taama inkih kay gabal bicele. Ummat garil, sahda garil, kaxxam naba num akkele.

¹⁴ Mango mari kaa yuble way, wariggah kaxxam cunxiten. Xagar ginok luk yen ceelo suge wayteh innah kaak heen. Sahdah ceelok kaa yeyyeeqen.

¹⁵ Toh tekke waqdi yi naqsi mango baaxol tan ummatta yoo yaqbudoonuh rifele. Amoytitte kaa table way, qangara afak mayayyaaqan. Able weeniih, aabbe weenim, maqna akak aaxige weenim, aaxigelon; asmitelon; ahak sarra edde radelon.