Yasaqya 51 - NABUWWA KEE MALIKWA

YALLI ISI MARAH XUWAAWELE

¹ YALLI iyyemii, «Isin yoo faxaah cakkih taniimih abtok kore waa maraw, yi yab ankacisa. Akak tewqen xixxaq baguh kassa haa; akak temeeten raceyna kassa haa.

² Sin kaxxa abba Abraahim kee Saaray akak raddeenihiyya baguh kassa haa. Abraahimih seece saaku maxalaytuh yen. Takkay immay yi barkatah xaylo xale; kaak rade mara eymeggeh.

³ Macaay inteenik, Siyon-magaalay abuuruh raqtehiyyah xuwaaweyyooh, niqmatak tan baaxo abeyyo. Bacari tekkeh sugte baaxo, Qadanal anu innih uysubuke bustaanih innah, gacele. Too waqdi ummat ruffu axceleeh africele. Yoo fayliseloonuuh, candu yoh gacselon.

⁴ «Yi ummatey, yoo ankacisa; yi maraw, anu axcem oobbeya. Ummattah inni xinto warseh an; yi cakki baadal tan ummattah ifu akkele.

⁵ Xayuk keenih amaateyyooh ken wadeyyo. Inni gabat qadaalat keenih baaheyyo. Allî-baaxoh mari niya yol haak sugele; yi gaba qambaalat sugelon.

⁶ Qaran wagga haay, baaxo kaadu lilla haay. Qaran qerti innah bayele; baaxo, udurrutte saroh innah, ambaxele. Tet bagul yan mari kaaqay innah ambaxele. Takkay immay anu baaha wadi waarele; yi qadaalat daayiman anele.

⁷ Qadaalat kinnim yaaxige maraw, yoo ankacisa. Yi xinto afqadoh addat kutbeh akak tan maraw, yi yab oobbeya. Sinam siinil qangaasaltaah sin ilaqtaamah, keenik mameysitinay hagga maxcina.

⁸ Macaay inteenik, toh siinik aba mari irimbi tokme saroh gideey, addak yonkomme mara. Yok geytoonu waytan wadi mayambaxaay, waara wadu; yok geytoonu waytan qadaalat, daayiman yan qadaalata» 'yaanam iyye.

YALLAH ABEN DOOQA

⁹ YALLAW, ugutay ku qandet nee catey. Ku gabal nee catey. Dumî dabaanal akah abte innah ab. Racab deqsita kaxxa alay baddi addal geytimahiyya rike rikeh kurtem koo.

¹⁰ Bad kafisseeh adda xer badak gudek gita teyyeeqem koo. Woh akah abtem, isih waddam faxxa mara badak tabissa'gidi.

¹¹ YALLI wade mari Siyon fanah aduurele; Siyon fanah qililisak africuk aduurelon. Too saaku aben farcatah kulli waqdi africelon. Cisab kee nadaama mayablan.

¹² YALLI iyyemii, «Niya siinit haytam yoo kinni way, sahdaytuy rabah yoobokeeh qaysok maqarah ayse waahiyyak macah meysittan?

¹³ YALLAY sin gineeh qaran fidseeh baaxoh kaadu elle solta rakiibo bicse, hawwenteenii? Kulli waqdi siinit xukkutaah, sin baysam faxa marih bagcarritaamah macah meysittan? Ken bagcarra tu makalta.

¹⁴ Away casbit yan mari casbik awqele; rabak waddiimeloonuuh, maaqok faxeenih gide geelon.

¹⁵ Yoh tu gactek, anu YALLAAY; sin Dagelta kinniyo. Bad abah yan haffoh kaxxa xongoloh xongolissam yoo. Yi migaq YALLAY Nabaamak Nabahiyya.

¹⁶ Qaran fidisak, baaxo elle solta rakiibo bicisak, Siyon-marak, ‹Isin yi mara kinnitoonu› axcuk, inni farmo afat siinik heeh inni gabat sin dacrise» 'yaanam iyye.

YALLIH BAGCARRA

¹⁷ Yarusalaamey, ugut! Ugutay bical gac. YALLI bagcarrite saaku, kay bagcarrah kobbaayak tooqobe. Woo kobbaayak tooqobeeh lagaq koo hayte.

¹⁸ Gita sin yaybulle mari mayana; sin marih addat gabal sin yibbixeh sin beya mari mayana.

¹⁹ Kaxxa bala siinil obte. Baaxo siinik carbit baate; ummatta siinik qulul kee carbit tembexe. Takkay immay siinil yamaateeh taqdiyya siinih gacsa mari mayan.

²⁰ Xaylo siinik xagar-boolah kulli gitih addal yannikisseenih, qangalaalat yanin. YALLI keenit aba bagcarrah sabbatah, oflot yibbixen sageerih innah raden.

²¹ Tonna'mmay Yarusalaam maray biyaakat yaniih yiskire marih innah lagaq iyyahiyyaw, oobbeya.

²² Sin Dagelti isi marih qaxat gaca. Tonnal KAAY malikih yani siinik iyyaamah, «Enneeqebbe saaku siinih ecee kobbaaya siinik beeyyo. Ahaysa lagaq sin hayta kobbaayat mataaquban.

²³ Siinit xukkutak suge mari woo kobbaayak aaqubele. Woo mari, ‹Siinit taqqa inna'gidih baaxô-bagul inaaqita› siinik iyye waqdi, isin guddaafay ibah edde yaaqiteenih inna tekken. Tohih sabbatah, yok naqbi-kubbaayat aaqubelon» 'yaanam iyyah yan.