Yasaqya 50 - NABUWWA KEE MALIKWA

¹ YALLI iyyamaa, «Num gennaaqô-barra cabah elle xiiriya innal, sin maxiiriyinniyo. Sin xiiriyem teexegeenik, sin elle xiiriye sumaq-warkat baaha. Keenit tan magoh sabbatah isi xaylo xaama marih innah, sinaamal sin xaamem maay takkalen? Tonna hinna'mmay, sin akah xaamem, isinnih abten dambi. Ina siinik akah xiiriyem, edde assen umaane.

² Anu inni mara wada'gidih gexe saaku, yi mari isi aracal akah suge weem macaa? Keenih seece waqdi, inki num kinni-way tu yol magacsinna. Anu ken catam yaffare Dagelta maay kinniyo? Ken wadaamih cayla mayyu innaa? Tonna hinna'mmay, badak ‹Badow, kaf› 'yaanam afak excek, bad kafsa Dagelta kinniyo. Lee darah elle gexak sugte baaxo bakarroytah gacsa Dagelta kinniyo. Woo leeh addat suge kullum gubbil raaqa waqdi, abicaah, lee wayya heeh bakaarah raba.

³ Qaran dattoosu duudaah, rookat sarat yanim celsiisu duuda Dagelta kinniyo» iyya.

YALLIH NAQASIH YAB AH KAANA

⁴ Boolaatteemit qande haa'gid, keenik axcem YALLAK barte; YALLAY Mulki le yoo barse. Usuk yoo barsa baritto, kulli maaca ankacisa'gid, xiinik yoo ugusak, yoo barsa.

⁵ YALLAY Mulki le yaabe way; yok faxam yoh warse waqdi, yabti-cina maabinniyoy; Dageltak maxxeerinniyo. Darre kaat macabinniyo.

⁶ Ugrah yoh yemeete marah, maciniyyoy buucus ecee. Deben-xagor yok giiteenih macininniyoy; tibba exce. Yoo xaafeenih qaytimeenih; afak guduqqa maxciyyo. Qunxuf foocat yok tufeenih immay guduqqa maxciyyo.

⁷ Ken xaafi yol baaham mali; YALLAY Mulki le yoo cataah; toh abaluk, tu edde mawaa. Ableemil inkih asbiruk, aabbeemil inkih asbiruk, takkay axceh edde xiina. Faxe xaafu yot aban way, qaybi akah yoo mayabbixa.

⁸ Anu Yalla xaqut liyooh; umaamat ase wee numuy qellat baahe wee kinniyom, Yalli isih yok aybulleele. Tu yok waytam sugay iyya? Yok tu waytah, tastikiyem, maa maraay? Talliilem iyyaay? Wayto yok waa mari yenek, nee beyoonay cokmi-buxah.

⁹ YALLAY Mulki le yoo cata; yi qaxat yan yi Dagelta. Qellat yol num way mageya. Yok tu waa mari yakkeemiik, bayele, finqah gexele. Irimbite gorrih innah, gorritelon, foyya akkelon.

¹⁰ YALLAK meysitaah, kay-naqasih-yab yaabbe maraw, diteh yan aracal ifu sinnuk gexxan way, Yalla eemenaay kibaal YALLAL haysita.

¹¹ Takkay immay gira isih urusa maray isi ifoytal gexahiyyaw, isinnih ifsen gititte gexa! Takkay immay, ellecabo siinik finqa. Aham siinik abtu waytam yoo YALLA.