Yasaqya 5 - NABUWWA KEE MALIKWA

QINAB CAXAH ABEN QADARA

¹ Kiciyyo numuh aba qadar yok ankacisa. Akah abam, kiciyyo num kee qinab elle yuysubuke buqre. Yi kataysa caxa luk yen, woo caxa qinab xalak ten. Qalek ten, elle toobokem; woo qale niqmat le qale.

² A caxa yaysubuke'gid, elle yaysubuke aracak, xeet kaleh meqe'nnal dageh. Tet akak dacrisa'gidih, amo xer qari akah xise. Yuysubukem meqe caxa. A caxa xalta qinabat yaaqite'gid boodo dage. Qinab teetik alayam fan, tet qambaalak teetih suge. A qinab alaye saaku, qeero baaheh; mulcu luk yen.

³ Yi kataysa toh yuble way, iyyem leeh, edde yaabem le; «*Yarsalaam addal yan maraw, dabaaqah Yuudal yan maraw, caxat anu abe taqabi, ubulay tu akak inxica.

⁴ A caxa taabuke'gidih, meqe xaylo xalta'gidih, abe akah weem maay liyo? Meqe xayloy xaltam faxe; maxalinnaay; mabaahinna. An' cube weeh, acsube wee mulcu le xaylo yoh xaltem macâ-sabbata? Sabab le?

⁵ «Aysa mala teetih malsah, reebuh teetih xise gaso butukka teetik hee liyo. Tet dariifat reebuh yan coox bayseyyoh; dibuk raaqele. ‹Alluwwa tet tattakambay, ken gadda takkay› axceyyo. Ibah teetit aaqitelon.

⁶ ‹Sibaasib teetil yaabakay; amo teetik aysa buulay. Taabuke'gidi 'yaanamah aysa amo teetik margaqaay, sissib kee keenan tet buulay› axceyyo'kkal tet mawagta. Rob hinna'mmay gaanib kinnih, amol teetik wessa m'iyya.»

⁷ Hay, YALLAY Nabaamak Naba yuysubuke qinab caxa kinnim Israayilik xaylo. YALLI yuysubuke cooxuy, ruffu edde haak yene kinnim Yuudah yoobokeh yan mara. YALLI, meqem aba mara yakkeenim keenik faxak yen. Takkay immay woh makkinnon; sahda qida mara yekken. Cakkik tanim aba mara, yakkeenim keenik faxak yen. Takkay immay woh makkinnon; amot akak gacan mari, «Qadaalat waynah nan» iyyan.

YALLI ISI MARAL ABE COKMI

⁸ Dumaak luk sugen qarwat ossotinah osisaana'gidih, gersi qarwa kee baqurê-baaxo xaamita maraw, woyyow, siinit takku waytaamow! Sinaamah dabaaqah elle gacan arac macabinnitoonuuy, baaxol isinnih dibuk haysiten.

⁹ Anu YALLAY Nabaamak Nabahiyyak inni aytih oobbeemih, «Ama kaxxa qarwa abuuruh raaqeleh, sahdayti addal akak maraaqa.

¹⁰ *Madmadat nammay nammayah yoxeen labaatanni awurut ayrol yubquren baaxo, qinabak labaatanni litrik fula mabahta. Dariyyuk bool kiilo qideenik, darok tabna kiilok fula mabahta.

¹¹ Kamrih-maqabah dibroh ugtaah inkih yan carra askiruk kassoowa maraw, woyyow, siinit takku waytaamow!

¹² Qaffaydah digirtan saaku, *kiraraay karambo kee fooxima fooxissaanaah, qinabak bicsen kamri taaqubeenih. Takkay immay YALLIH taamat baaqid mantoonuy, YALLI abam mataaxigan.

¹³ Kaa mataaxigan. Tonna-leemiik, casbit yan marih innal sin beelon. Sin miraacisa mari qululuh ambaxele. Raqqa 'ye mari bakaarah ambaxele.

¹⁴ Akeera ken qambaalak sugele. Edde gacoonu waan kabaara af kaawut keenih luk sugele. Yarusalaamal tan muddaqiyi kee raqqa 'ye maray qaffaydah digiraah waxxaq iyya selele.

¹⁵ Kulli num keenik qaybit radeleeh, gaca mara akkelon. Kaxxiina leela aqunxeele.

¹⁶ Too waqdi YALLAY Nabaamak Nabahiyya gitah tanim abeleeh, tonnal leh yan nabna kaak ambulleele. Isi ummattal yackume waqdi, *kudduusuk yan Yalla kinnim kaak ambulleele.

¹⁷ Gaddaleelah-qarwa elle sugte aracay abuuruh raaqehiyyal beedi gacele. Illi-xaylo kaadu taloole qayso elle geele.

¹⁸ Diraabat yaabah dambik raaqu duude waa maraw, woyyow, siinit takku waytaamow! Edde yabtan dirab umaane siinih xalele.

¹⁹ Isin, «Yalli abeyyo iyyem sissikuk abam kaak nabalu wayna!» intan. «A Israayil doore Dageltay *kudduusuk yani abam faxam duudusam keh, kaak waginnu wayna» intaana'mmay, woyyow, siinit takku waytaama!

²⁰ Meqeemik umaama iyyaah, umaamak meqeemi iyya maraw, woyyow, siinit takku waytaamow! Ditek ifu intaanaah, ifuk dite intan. Qeero leemik salfa le intaanaah, salfa leemik qeero le intan.

²¹ Kaxxa kas lem isik yakkaleeh, kaxxam bagi cubbih is dareema maraw, woyyow, siinit takku waytaamow!

²² Qinab kamrih agiiray! Yesgellen kamrih maqabah sin aleltam matana'mmay, woyyow, siinit takku waytaamow!

²³ Guqul taagah tablen umeynit gexxay intaanaah, qellat sinni mara cakki gee kaltan.

²⁴ Tonna leemiik caffa kee qayso elle kafta innal kafettoonuuh, girat cararetton. Ragid siinik soxkele. Qobor siinik kafeh caacay beele. Toh siinit akah takku waytam, YALLAY Nabaamak Nabahiyya isi xintol siinih warsem cinteeniih, Israayil doore Dageltay *kudduusuk yanihiyya aba nek iyyem cinteenimih sabbata. Kay barittot maqal mahaysitinniton.

²⁵ Tonna leemiik YALLI isi marat bagcarriteeh, isi gaba ken yuybulleeh ken digaale. Qaleeli yengeyyeeh, rabe marih raysi guddaafah innah gititteh addal rade. Tohuh, Yallih naqbi maxamcaay, ken edde digaaluh ruube gaba wadir magacsa.

²⁶ Yalli xer baaxol yan marah seeco abeeh, baaxô-maggaraqal yan mari yamaate'gidih seeco abe. Woo mari ah keeniiy; sissikuk ardat yamaateenih yanin.

²⁷ Num keenik macawalinnaay num keenik mandafoofolinna. Qundugul kee xin num keenik maabinna. Bagi qarum keenik masalacinnaay kabellak sanaaga keenik maggaraqinna.

²⁸ Gayse kee gaysê-xaylo qeebi edde aboonuh bical tan. Gaysê-xaylo keenik af le. Ken faariisih ibitte gibdah qado-xeetih inna le. Ken faariisa beyta gaariira qaana fuluk haak tamaate.

²⁹ Ken qaskar, lubookay qidde lac sahda keenik bukkussaamak garadak kuddahiyyah xaw xawta.

³⁰ Too qaskar Israayil marat, bad haffo baaha way dub elle iyya innal, keenit kaayoonu waan wakti amaatele. A baaxo wagga hayteenik, ditet yan maray abam waagisaah yankikkiqehiyya abletton. Qamburre ifu qellisele.