Yasaqya 49 - NABUWWA KEE MALIKWA

YALLIH NAQSIH YAB AH KAANA

¹ Xer baaxol geytima maraw, allahî-baaxoh ayyuntaw, ayti yoh 'cuya, yoo oobbeya. Aabukeemik dumal elle, YALLI yoo dooreeh, yoo meexe; inâ-bagut elle suge way yoo muggaaqisak yoo doore.

² Yi-afak yawqe qangor inkih, gileh innah af bahsiise; isi gabat yoo dacrise; arbaqen (samlisen) gaysê-baxi innah, yoo samliseh, af bahsiise; sibah addat yoo dacrise.

³ Annah axcuk yo'lih yaabe; «Yim kinnito; yi naqasu. Ku migaq Israayil kinni; akah tantom, koo akah doorem, liyoh an qaxa-maqaane kol elle tambulle'gidi» 'yaanam axcuk yo'lih yaabe.

⁴ Anu yaabeh, annah exce, «Taamiteh immay, yi taama, foyya tekkeeh, boolatteh tan. Dudda haam akah taqbe'mmay, bicsem mayyu; duudem mayyu. Yot tekkeemih yi Dagelti yoh hawselem kaak aaxigeh. Anu edde aseeh abe taamal, kay galto geeyyom digga le. YALLA akah aaminem tohu.

⁵ Taway YALLI yo'lih yaabe. Aabukeemik dumal elle, inâ-bagut akah anih, YALLI isi naqasu yoo abe. Isi naqasu akah yoo abem, Yaqkuubuk rade kay mara kaa fan gacissa haa'gidi. Israayil xayloy fixixxe, kaa fan gacissa haa'gidi. YALLIH garil nabna liyo; Qande akak liyom yi Goyta.

⁶ Tonnal annah yok iyyamaa; «Yi naqasow, Israayilik baatik raaqe marak inkih, luk sugen nabna gacsaanam, ku gabat absiise liyo. Wohuk kalah tayse taamay muxxo leeh giffa lehiyya ku gabat absiise liyo. Baadal inkih tan ummatah ifu kee noori koo abeyyo; Wadoot kee catotta akketto. Toh ku gabat absiiseyyo» yoo doore Dagelti yok iyyah yan.

YALLI, NAQASIH GABAT, ISI MARA WADELE

⁷ Israayil ummatta wade Dageltay *kudduusuk yanihiyya, sinam intit bura leeh baadal tan ummat niqba numuy abbobtih yan marah naqasu yekkehiyyak iyyamaa: «Amoytit koo tabalu wayta waqdi, aracak ku assakaxxah ugtele. Baaxoh abbobti koo table way gomboh radele. Ta mari ta assakaxxiyya akah abu waam, YALLAY digga lehiyya isi farmoytah koo dooreemih sabbata. Yeey, ta mari ta assakaxxiyya akah abu waam, Israayil doore Dageltay kudduusuk yani isi farmoytah koo dooreemih sabbata» iyya.

⁸ YALLI iyyamaa, «Innih faxe waktit koo oggoleyyo. Edde cateh meqe waktit kaadu koo cateyyo. Koo dacriseyyooh, amo kok wagteyyooh, ummat lih qahdi ku kabuuk heeyyo. A saaku abuuruk yan rasul ahak sarra sinam nookisetto.

⁹ Casbit yan marak, currih gexxaasita, axcettooh, ditet yan marak, iful eweqa, axcetto. «Giti qaxal baraya illih innah, gacelon; koomaamil yaloole illi akkelon.

¹⁰ Mabakaaritaanaay maqululan. Wahari le caacay kee ayrô-dahan ken mabiyaaka. Macaay inteenik, yoo YALLAY ken kicnahiyya foocat gacca 'yeh ken beeyyo; lee le buyyi fan ken beeyyo.

¹¹ Inkih yan inni qaleela booxa abeyyo; yi ummattah edde gexan gita bicseyyo.

¹² Yi ummatta xer rasuk amaatele. Garab kilbat le kabuk amaateleeh, garab ayrô-culma le kabuk amaatele. Garab kaadu gabbi-qaxak Sinim deqsita aracak amaatele» iyye.

¹³ Qaraanow, farcatah qililis; baaxoy, wallit; qaleelay, ifricay qililisa! Macaay inteenik, YALLI isi marat niya heeh yanih, isi maray biyaakitahiyyah xuwaawe.

YALLI ISI MARA MAHAWWEENA

¹⁴ Yarusalaam mari iyyemii, «YALLI nee maaqileeh, nee hawweeneh» 'yaanam iyyen.

¹⁵ YALLI iyyamaa: «Ina isi anguk yaaxe baxa maay hawwenta? Is isi baguk xalte baxa maay akcine wayta? Ina isi baxa hawwentam takkeh, immay anu sin mahawweena.

¹⁶ Wagitay! Migaq siinik gabâ-gennaqtah addal kutbeh liyo. Yarusalaam-ummatey, anu kulli way inti siinit liyoh; sin mahawweena.

¹⁷ Sin xaylo xayi saaku amaateleeh, sin bayisak suge mari gexele.

¹⁸ Dariifa isinnik wagga haay takkem ubulay! Xaylo siinik elle sugte baaxok taduurem matablaana? Inni migaaqay waarahiyyal xiibitaah, sin xaylo bilqa siinih akkeleeh, qaxah bilqitte qibnah innah gacetton.

¹⁹ Baaxo siinik sinam sinni abuuruk sugte. Takkay immay ahak wadir, akkel dabaaqah gacam faxa mari faxo teetil mageya. Sin yiggileeh abur sin abe mari siinik axxeerele.

²⁰ Sin maray xaleena seewah elle been baaxol yoobokehiyya a baaxo yaduure saaku, mangak gexxaamah, ‹A baaxo dabaaqah nee tabbixeh matanak, baaxo neh osisa› 'yaanam ken axcih aabbetton.

²¹ Taham taabboonu waytan waqdi, ‹Sugay ah maa saaku yoobokeeh yembe maraay? Oson iyyin xaylooy? Ni baaxok nee yiskiliqen saaku, xaylok mangom nek rabte. Tohuk wadir gubuunuh sugneeh, xaylo xalenno 'yaanam niyat mahanninok, sugay tah ankek yemeete mara?› 'yaanam axcetton.»

²² YALLAY Mulki le isi marak iyyamaa, «Doolatwa fan gaba caseyyo. Elle yaaxigeeni'gidih, inni qalaamat ken aybulleeyyo. Sin xaylo sin baaxo fanah gacseloonuuh; lab-xaylo siinik aliilit baahelon; say-xaylo kaadu sunkut baahelon.

²³ Malikwa, abbobtih inna siinih akkeleeh; malikwah-agbi inonti siinih akkele. Massakaxxah gommoh siinih radelon. Isinni ayqunxuk, sin aynabelon. Tonnal anu YALLA kinniyom aaxigetton. Yol kibalsita numuk niya margiqa» iyyah yan.

²⁴ Qaskariiti seewah orbisem, gabah addak iyyi kaak beyam duuda? Racmatta sinni abbah gabat yan num, iyyi yayyaaqem duuda?

²⁵ Takkay immay YALLI, «Toh tekkeemi» 'yaanam iyya. «Sin lih aaminnaan mara lih anu aameyyo. Qaskar gabat yan casbi mari asillimele. Racmatta sinni malik seewah orbisem gabak kaak kalelon. Sin xaylo umaanek anu cateyyo.

²⁶ Siinit xukkuta mari titta akmeloonuuh; sittak caxen qabala yaaquboonu waan waqdi, kamri yooqobe marih innah askirelon. Too waqdi baadal eneyya 'ya mari, anu YALLA kinniyom aaxigele. Sin wadaah xixxibaanek sin yeyyeeqe Dagelta kinniyom aaxigelon. Yaqkuub-Dageltay cayla le kinniyom aaxigelon.»