Yasaqya 48 - NABUWWA KEE MALIKWA

TAKKU WAYTAM YALLIH GABAT TAN

¹ YALLI iyyemii: «Yaqkuubuk radeeh Israayil deqsita marak Yuudah yooboke maraw, ankacisay yoo oobbeya. YALLIH migaaqal xiibittaanaah, ‹Israayil doore Dagelta yaqbude mara kinnino› intan. Takkay immay toh afak intaana'kkal baguuk intaanam hinna. Yaaminen mara hinniton.

² Tonna'mmay afak, ‹*Kudduusuk tan magaalah mara kinnino› 'yaanamat kaxxam takkalen. ‹Yalli nek, Israayil doore Dageltaay; kay migaq YALLAY Nabaamak Nabahiyya. Kibaal kaal lino› 'yaanam intan. Away siinik axcem ankacisay yok oobbeya.

³ «Takku waytam xer dabaanal elle warseh sugeeh, akkele akah exce'nnah tekke. Tohum, garciik cube waan waqdi, akah takke'nnah abeeh, tekkeh.

⁴ Yab ayti akak cule waah, xixxaqay lee adda akak cule waytah bis litoonum aaxaguk en.

⁵ Tohuk gexxaamah aham takku waytaamat dumaak yaabeh suge. Tohumu, takkeemik dumal naharal akah yaabem, ‹Ah amrisseeh neh abtem, nanu naqbude duyye› axce waytaana'gidi.

⁶ Anu edde yabba exceeh, akkele inxicca excem inkih tekkeh. Anu akkele akak excem, akkele'kkal raaqe waytam taamineenimi. Away kaadu qusbaamay duma akke waytehiyya siinih warsa. Daanisaamay isin aaxige waytaana siinih warsa.

⁷ Ahayduma tekkem hinna'mmay, away akah takke'nnah abeyyo. Away axcem dumaak aabbinnitoonuy, ‹Ah dumaak naaxigeemi› 'yaanam axcuk tenen. Immay away siinih warsam duma maabbinnitoonuuy, maballinniton.

⁸ «Yaaminen mara hinnitoonum aaxigeh. Qunxaaneey akke qamalleela kinnitoonum aaxigeh. Aham akah aabbe wayteeniih xaagu akah gee wayteenim tohu» 'yaanam iyye.

⁹ «Inni migaaqih taagah bagcarrak inni xabba heeyyo. Sinam yi migaq faylissa'gidih, mabagcarritaay sin mabaysa.

¹⁰ Lakqo, numma lakqo kinnim kee akke waytam girat elle yagirriben innal, sin kaadu igirribeeh; girah innah yan gibdaabina agarrabah siinil ruube.

¹¹ Abem akah abem, inni migaaqih taaga. Macaay inteenik, yi migaq bayam abalih tibba 'ya Dagelta hinniyo. Yi nabna yiimi'kkal gersiimit tabta nabna hinna»

KOORIS YALLI DOORE ABBA

¹² YALLI kaadu qagseh iyyemii, «Isin Israayil maray anu akah seecehiyyak, yoo ankacisa. Anu inki anyoh; Qimbo yooy ellecabo yoo.

¹³ Baad elle soola rakiibo inni gabah bicse. Qaran fidissem yoo; qaran kee baaxoh seeca waqdi, yoo yaabben.

¹⁴ Takkeenimik gaabooway ankacisa. Yi qaxat gaca'gidih doore num, Baabelon-magaalat qeebi abeleeh, teetik faxe baati teetit abelem toobbeenih maay sugten? Isin yallah liton xeet kee cooxuk bicsen duyye siinih maay warisse?

¹⁵ Kaah secteeh kaa'lih yabtem yoo. Ah aba inteeh, kay gabat absissem yoo.

¹⁶ Tonna'mmay ta way kabba 'xicaay anu axcem oobbeya. Dumaak qellite sinni yaabah sin lih yaabak sugeeh; edde yabba axcem inkih nummak macsiisam yoo» iyye. A saaku YALLAY Mulki le isi Roocaaniyya yot heeh yoo ruube.

¹⁷ YALLAY sin wadahiyya iyyam le. Israayil doore Dageltay *Kudduusuk yani siinik iyyamaa: «Anu YALLAAY; sin Dagelta kinniyo; Sin taagah meqe gita sin yaybulleeh, edde gexxan gita siinih ascasse.

¹⁸ Yi amri oggoltaanamal, weeqayti gurral amaan siinil oobak yeneeh; yi foocal cakkik yan mara akkuk teneenih, too cakki kaadu, baddi-afal tamuttuke haffoh innal, qande siinih acayuk yen.

¹⁹ Ramad siinik mangah baddi afih qiddeh gide akkuk yen. Migaq siinik baye maraarinnaay, baye haak mananniyo» iyye.

²⁰ Tonna'mmay Baabeloonuk amaanah eweqa; Baabelon marak isillima. Ifricay qililisaay a xaagu kulli ikke iysixxiga. YALLI Yaqkuubuk rade maray kay naqoosah yanihiyya wadem baaxô-maggaraqa fanah gexay warisa.

²¹ YALLI isi ummatta bakarroytay lee sinnihiyyal bee saaku, bakaariti ken mahanna. Lee xixxaqak baguk keenih yeyyeeqe. Xixxaq namma ikkel heeh, too waqdi lee akak tewqe.

²² «Umaane le mari amaan mageya» 'yaanam iyya YALLI.