Yasaqya 47 - NABUWWA KEE MALIKWA

KOORIS BAABELON QEEBIT ABBIXELE

¹ YALLI iyyemii: «Baabelon magaalay, elle tan dardaarinni-korsik oobay baaxol bullaaqê-bagul gac. Dumah yan saaku, qeebil num akak ayse weeh, gabah xage ween bikirit tan baxuwwah gidek sugte. Ahak wadir luk ten saytunan kee qax-maqaane gaba kok kalteh.

² A saaku naqaso tekke. Eceyya baahay daro riy. Amol lito seedar isik kal. Qax-meqe saray edde tanihiyyak kat. Kames cankaffa haay dorak ibah tab.

³ Qasunan kok ambulleeleeh qaybi kok gubbil gacele. Num siinik cabe'kal cane siinil gacseyyo» 'yaanam iyye.

⁴ Ni wadeeni, YALLAY Nabaamak Nabahiyyah yaniih, Israayil doore Dageltay *kudduusuk yanihiyyah yan.

⁵ YALLI Baabelon marak iyyemii: «Tibba inxicay dite le aracat ombooqora. Baabelon mari doolatwa abbobtih yanin 'yaanam ahaysa siinik m'iyyan.

⁶ Anu inni marat oomeh, marin mara ken abe. Sin gabal ken hee'mmay, keenih maracmatinniton. Idoolal kinni-way, duude waan quukay keenik naba keenil hayten.

⁷ Kulli waqdi maliká tikka 'teh waarettom tekkeleeh, cubbusak masuginnitooy, digaala kot akkelem kot maceelinna.

⁸ «Hay, tut-baaqid-maleelay tut-carra-maleelay, siinih warisu waak, yok ankacisa. Isin, buxal farcatat yaniih ‹Tu nee maxagta› iyya maraw, ‹Nanu nanih; nek sa tu matan› bagul intaanaah ‹Baqolti nek marabta; xaylo nek qunxih macabaaritta› intan.

⁹ Tama isin net matakka inteenim siinit akkeleeh, inki ayroh addat siinit akkele. Xaylo qunxih siinik rabeleeh, agbi siinik gubuunuh raaqele. Ramli qida kee ginnilil akah gexxaanamah, tah siinik raq lem hinna.

¹⁰ Isinni makari kee uma-taamat kaxxam takkaleeniih, ‹Nanu abnam tablem matan› 'yaanam intan. Litoonum takkalen kas kee ixxiga makot sin beyteeh, ‹Nanu nanih; nek sa tu matan› 'yaanam intan.

¹¹ Bala siinil oobele'mmay, too bala isinnik akah kaltan inna mageytan. Masiibat sin abbixele'mmay, faxe sicri siinik mawaasa. Cube waak sugten bala kee qaasir-umaane sin abbixele.

¹² «Sicriy qunxaaneey akke edde taqabak sugteeni macabinay aba. Tuk teena siinih xiqa kaa tekkek tableenih! Sinaamaay edde meysissaanam takkek, abak sugteenim macabina.

¹³ Siinih yeceen *fayi, boola akke waytek, siinih xiqem mali. Ku cutuuka-beya siinih temeeteh sin waddek, ablenno. Cutuuka wagta mari xiqam siinih yellek, ablenno. Cutuuka-beya qaran fanah wagga haanaah, too waqdi ‹Woo alsat woh akkele; a alsat ah akkele› 'yaanam iyyan. Sin cutuk-beya siinit takku waytaamak sin cattek, ablenno.

¹⁴ Caffay gira edde gexxah bis lon. Gira keenit gexeleeh, ken cararisele. Too giray ken carrissu waytahiyyak isinni cataanam maduudan. Keenit gexxu waytam, xagar elle laqisan gira hinnaay, waacak garit akak daffeyan gira hinna.

¹⁵ Sin cutuk-beyah maqaanek ellecabo toh teeti. Qunxaaneey akke maalu akah acayuk, edde taqabak sugten sicri-abaa kee cutuk-beyah qaada toh teeti. Gira siinit gexxu wayta saaku, sin wadu duuda num keenit mayanaay; too saaku, sin cabba heeh isinni gexoh gexu waa mara akkelon» 'yaanam iyye.