Yasaqya 46 - NABUWWA KEE MALIKWA

YALLA KEE BICSEN DUYYEY KAY AFTOK YAQBUDEENIHIYYA

¹ Beel kee Naboy, Baabelon mari yalla axcuk yaqbudehiyya bokokteeh, raddeh tan. Ken ceelo a saaku quukah merrayti illel beyan. Merraytuy isih yeclehiyyal quuka yekken.

² Oson yalla akak iyyan duyye, is cattaah is wadda duyye hinna. Quukah merraytul hayya heeniih dannabah ken been.

³ Yalli iyyamaa: «Yaqkuubuk rade maraw! Yi marak saaboh raaqe mara kinnitoonuk, yoo oobbeya! Tooboken saakuuy akke, sin akkuquk amo siinik wagitak suge.

⁴ Anu anyooh; idoolitta 'teenih amô qidi bahtaanam fanah, sin dacrissam yoo. Sin tuklukem yooy; sin takkuqem yoo; umaanek sin cateyyooh sin dacriseyyo.

⁵ «Yoo celtam maay tan? Yoo eleltam maay tan? Yi gid takkeeh yi bis lem maay tan?

⁶ Marak teeni yamaateeh santat baahe dahab yayyaaqe. Aki num kaadu yamaateeh gabat baahe lakqo yayyaaqeeh miizaanal haa. Too waqdi too dahab kee lakqoy baaheenihiyya dahab bicsa numul yeceen. Too num Yallih aftok yaqbuden ceelo akak bicsa. Too numuy toh bicsehiyyah gabah cawalah maalu yaceen. Sarrak too ceeloy gabak bicseenihiyyah gomboh radaanaah yaqbuden!

⁷ Gexan ikke yelleenik, quukah sunkul beyan. Aracak teenal oobissa haanaah sooliseenih caban. Elle soolisen ikkek tangayyeeh rooci lem hinnaay, gaba tet esgeyya haytam fanah, elle soolisen ikkel elle sugta. Too waqdi, ‹Yoo cateey yoo wadeey! Koo aleelitek› axcuk dooqa foocal akak aban! Too duyye taabbeeh tuk teena elle gacissam hinna.

⁸ «Dambileelay! Anu abem kassa haay! Anu abem cubbusay!

⁹ Dumî dabaanal tekkem kassa mahaytaana? Toh kassa haay, yok sa Yalli mayanam ixiga. Yook sah yi bis lem matana.

¹⁰ Sarra takku waytam dumal elle warseh suge. Sarrî-dabaanal takku waytam naharal elle sin iysixxigeh suge. Anu abam faxam akkele ikkal, raq matalla. Abeyyo inxicca excem abeyyo ikkal, fanat akak maasa.

¹¹ Ayrô-mawqa le kabuk qawita ceela numuh seecah an. Too num xer baaxok kaxxa dadah abak amaatele. Anu abam faxam kay gabat bicseyyo. Taham akkeleemit yaabeh ani'mmay fanat mayseeda.

¹² «Yab ayti akak cule waah, cakki faxe waa maraw!

¹³ Anu akah exce innah, cakki edde geytimu waa ayro xayih. Yi wadu baahu waa ayro xayih. Yarusalaam edde wadu waa ayro xayih. Israayil ummatah yi qax-maqaane aceeyyo» iyyah yan.