Yasaqya 45 - NABUWWA KEE MALIKWA

KOORIS MALIK ABTEM YALLA

¹ YALLI, Kooris malik yakke'gidih doore. Ummattak qeebil yayse num yakke'gidih, kaa doore. Amoytittek tikiya kala'gidih, kaa ruube. YALLI, magaalah afoofi kaah fakeleeh, alifut tan afa kaah masugta.

² YALLI Koorisik iyyamaa, «Gita anu innih koh bicseyyo; qaleela booxa koh abeyyo. Nacaasak bicsen afoofih alif butukku koh heeyyo; oson alifit tabtabbih heen biriita butukku koh heeyyo.

³ YALLA kinniyom yok taaxige'gidih, dite le aracat daanah yan maaluy sinam elle yan arac akak aaxige waytahiyya koh aceeyyo. YALLAY Israayil doore Dagelta kinnihiyya, migaaqal-koh-seecem taaxiguh, toh abeyyo.

⁴ Israayil ummattay yi naqoosah taniih, innih doorehiyyah liyo kacanuk gexxaamah koo dooreh, koh seece. Atu yoo mataaxiga'mmay, ken catta'gidih migaq koh eyyeeqe.

⁵ YALLI dibuk yooy; yook sah yalli mayana. Atu yoo mataaxiga'mmay, qande kot heeyyo.

⁶ Toh akah aba sabab liyo. Toh macaay intek, addunyak ayrô-mawqaay ayrô-culma takke baaxol yan mari Yalli dibuk yoo kinnim yaaxige'gidiiy, yok sa Yalli ane waam yaaxige'gidi.

⁷ Dite kee ifu bicissem yoo. Barkat sinaamat haytaah, bala sinaamal rubtam yoo. Ah abtam yoo YALLA.

⁸ Qadaalat qaraanak robti innah ruubeyyo. Addunya woh raabiteleeh, namma gaba akah garaysele. Yi wadu kee qadaalat teetil reedele. Aham absissu waytam yoo YALLA» iyye.

GINO KEE AYDAADA YALLIH IMI

⁹ Gabak bicsen buuti, kaa bicse num giddiyam duudaa? «Yoo bicse num yaaxigem mali» iyyam bictaa? Toh bictam hinna. Hay toh bictam akke waytek, is gine Dagelta lih daqwat aba numow, kum tekkem ixig.

¹⁰ Abbak baxi, «Annal macah yoo xalte» iyyam bictam kinnii? Hay, inak woh iyyam kaadu bictam maay kinni? Bictam hinna. Isi xaleenak toh iyya numow, kum tekkem ixig.

¹¹ YALLAY sin gine siinik iyyam le. Israayil doore Dageltay kudduusuk yani iyyamaa: «Sarra takku waytam elle takke inna kee yi xayloh giddinaamak, num tu yoo essere waay. ‹Ah abaay woh ab› yok maxcina.

¹² Baaxo tuklukem yooy; baaxol gaca'gidih sahdaytu tuklukem yoo. Qaran inni gabat fidise; ayrooy alsa kee cutuuka yi milkih tan.

¹³ Kooris ugussem yooy; akah ugsem, gital tanim aba'gidi. Innih faxam kay gabat absiisa'gidih kaa ugse. Usuk edde gexxa 'ya gita missoyseyyo; yi maray seewah beenihiyya usuk gacsele. Yarusalaamay yi magaala kinnihiyya nammay haak xisele. Tah aba'gidih, tu kaah maacinniyooy; ah aba iyyeh guqul kaah yecee mari mayan. Tahat yabtam yoo YALLAY Nabaamak Nabahiyya» 'yaanam iyyah yan.

YALLI ABAM FAXEEMI

¹⁴ YALLI iyyamaa: Yi ummatey, Masri kee Kuus mari le duyye sinim abeyyo. Saabah maray lafa xeerihiyya siinil amaateleeh, sin mara akkele. Silsilatat axawah anuk, sin kataateloonuuh, assakaxxiyyah amo qunuunussa heenih, ‹Yalli sin qaxat yanim nableh naniih, kaak sah yalli mayana› 'yaanam axcelon» iyyah yan.

¹⁵ Israayil doore Dageltay ken wadehiyyaw, atu nummah is yaaqure Dagelta kinnito!

¹⁶ Xeet kee cooxuk yaqbuden duyye bicsa mari ahat wacarriyak maacisele. Yakkeenimiik qaybit radelon.

¹⁷ Israayil ummat YALLI wadeh yan! Israayil ummat tahaysa wadu mawaytaay, qaybi wadiriik ken mayabbixa.

¹⁸ Macaay inteenik, YALLAY qaran gineh baaxo kaadu gineh, tet bicseeh tet daabiseeh, foyya tet maabinnay sahda dabaaqah elle gacta arac tet abehiyya isih iyyamaa: «Anu YALLA kinniyo; yok sah yalli mayana.

¹⁹ Anu dibuk tan ikkel sin lih mayaabinniyo; abam faxam siinik maaqurinniyo. Yaqkuubuk rade marak, ‹Yoo akah gorrisa› excem foyya hinna. Anu YALLAAY; edde yaabam, numma le yaaba. Cakki baxxaqqa haa Dagelta kinniyo» 'yaanam iyyah yan.

²⁰ YALLI iyyamaa: Baadal tan ummattak saaboh raaqe maraw, titta fanah gacaay inki aracal gaaboowa; inkih yoo fanah amay. Cooxuk bicsen duyyey yaqbudeenihiyya ukkuqqa heeh baaxo meksiisa mari, kas cabe mara. Oson too duyyey hebeltô-tu'xiq sinnihiyya yaqbudeeniih ta duyyek, ‹Nee wada› iyyan.

²¹ Amaay, waytaanam cokmi-buxal haysita. Yistikyen maraw, intoonu waytaanam sitta lih malisa. Sarra takku waytaamat dumaak yabtem yoo. Ahat yabtem yoo YALLA; yok sa Yalli mayana. Anu gital tanim aba Dageltaay; wadeena kinniyooh, yi'nnah tanim matana.

²² Baadal tan ummatey, inkih waddintaana'gidih, a saakuuk yol uduura. Yalli dibuk yoo.

²³ Anu abeyyo axcuk, culeemik kora Dagelta hinniyo. Akkele excem takkeeh, abeyyo excem abah: ‹Kulli num yi foocal gommoh yoh radeleeh, Kok sa tu manaqbuda 'yaanam axcuk qahdi culelon› inni migaaqal akah xiibitem, duuduse'kkal wadir maxca.

²⁴ ‹Cakkik tan maqaane kee cayla YALLAL geytimta› 'yaanam axceloonuh; YALLA fan amma axcelon. Yallal saduh yan mara kaxxa qaybi abbixele.

²⁵ Yoo YALLI, Israayil ummat wadu waa Dagelta kinniyo. Tohuk gexxaamah too mari yoo faylisele» 'yaanam iyye.