Yasaqya 44 - NABUWWA KEE MALIKWA

¹ «Tonna'mmay Yaqkuubuk rade maraw, yi naqoosay! Israayil ummatey, anu innih doore maraw!»

² YALLAY sin yuklukeeh ina bagut sin giney sin catahiyya siinik iyyam le. Siinik iyyamaa: «Yaqkuubuk rade maraw, mameysitinaay, yi naqoosa kinniton. Kiciyyo maray anu doorehiyya kinniton.

³ Macaay inteenik, bakaaritte baaxo allaggoyseyyo; kafinuk sugte baaxol lee darah ruubeyyo. Sin xaylol inni Roocaaniyya oobiseyyo; siinik radda 'ye marat barkat heeyyo.

⁴ Agda geyte baaxol tooboke qaysoh innah gacelon; saagantoy darah gexxa leeh xaqul toobokeh innah gacelon.

⁵ Num numuk, ‹YALLIH num kinniyo› axcele; aki num, ‹Anu Yaqkuubuk rade num kinniyo› axcele; Gersi num kaadu, isi gabal ‹YALLIH imi› aktubeleeh yi migaaqah ‹Israayili› 'yaanam axcele» iyyah yan.

YALLI GERSIIMIY YAQBUDEENIHIYYAH GURRAL MAYAN

⁶ YALLAY Nabaamak Nabaah Israayil ummat wade malikik yanihiyya iyyamaa: «Qimbo yooy ellecabo yoo; yok sah Yalli mayan.

⁷ Yi bis lem iyyaay? Yi gid takkem tenek yaabittay. Tanim tekkek, abtem elle abte'nnah away yoh baxxaaqissay. Tanim tekkek, anu elle abe'nnal, sahda dumaak isim elle abteeh elle dacrisse'nna yoh baxxaaqissay. Yi gid takkem tenek, sarra takku waytam warissay.

⁸ Takkay immay yi ummatey, isin mameysitinaay cunxo sin abbixe waytay. Dumaak siinih warseeh, sin oysoobbeemil yi sumaq siini. Yok sa Yalli maay yan? Mayan. Anu aabbe wee yallay reebu sinaamah yakkehiyya mayan» iyyah yan.

⁹ Yallih aftoh yaqbuden duyye bicsa mari foyyâ-mara. Oson kaxxam ruffu edde iyyan duyye tuxxiq sinniimi. A duyyeh sumaaqita mari, tu aaxige waah tu'mabul sinni mara kinnon. Tonna-leemik tahamat wacarriye lon.

¹⁰ Isi gabat yalla bicsa num, tu duude waytam bicse.

¹¹ Yaqbuden duyye bicsa mara kee yaqbude mara inkih, qaybit radelon. Macaay inteenik, too duyye gabak bicsa mari, sahda kinnoonuh! Yakkeenimik amma 'yeenih abeenim nagay wagtoonay inxicay. Too waqdi, kaxxa cunxo keenit radeleeh, inkitanuuk qaybit radelon.

¹² Birtak-duyye-bicsa-mari birta beyya haah girat diyaayisa. Too waqdi too-diyaayise-birta, kay-gaba-le-qandek, maatakat yaatukeeh missoysaah yaqbuden ceelo akak bicsa. Too ceeloh bicsat bakar kee qulul kaa yabbixe waqdi, cawalah qande kaak gexxa.

¹³ Yaqbuden ceelo caxxak bicsa num kaadu woo caxxa bahha haah yamittireeh elle yaysaroorocu waa aracat asta akak haa. Sarrak woo caxxa coox edde bicsan birtat missoysaah, sahdayti ceeloy qaxmeqehiyya akak bicsa. Tohuk lakal qarik addal haa.

¹⁴ Too ceelo akak bicsaanam *sariidak yirgiqen caxxa akkiiy, *sublaytok yirgiqen caxxa akkiiy, wonna hinnay, saagantok bicsen caxxa akkek bicsan. Duyye bicsa num woo caxa doorru haah, meqe'nnal tambem fan qambaala. Ta cooxuy yaqbuden ceelo akak bicsaanahiyyak garabak naharak dariyyu qidda heenih taabukem fan qambaalaanam takkeh.

¹⁵ Ta coox irgiqqa haan waqdi yirgiqen caxak garab girâ-bocoh haan. Too bocoy uruuseenihiyyal waacak isinni elle laqsaanaah, tonnah kaadu, gaqambo elle alaysan. Raaqe garabak ceelo bicsaanaah yaqbudeenih gommoh akah radan.

¹⁶ Tonnal too caxay yirgiqeenih cooxuk garab kaffa 'ya waqdi, cado elle alaysan solâ bocoh haan. Sarra woo cado yakmeenih akak cayyan. Tohuk kalah too boco urussa heenih xagar isinnik waacak elle laqisan. Too gira waacak keenit emeqqa 'ta way, «Ah manxu meqe girak tanih tan!» iyyan.

¹⁷ Wohuk raqte bocoh tu gactek, yaqbuden ceelo akak bicissa haah, foocal akak qibaadah gomboh radan. Dooqah too ceelo kallacaanaah, «Yi dagelti kook, yoo wad» 'yaanam iyyan.

¹⁸ Tannah tanim aba mari, xangi cabe maray abam isik aaxige waahiyya kinnon. Namma inti baaxo tableemik alifit keenik taniih, tu cubbusaamak misinkaca keenik alifit tan.

¹⁹ Yaqbuden ceelo isi gabak bicsa mari, «Naqbude ceelo akak bicisna cooxuk garab girâ-bocoh haynaah, maaqo edde alasnaah; garabak kaadu yalla axcuk naqbude ceelo ninni gabak bicisna. Taham mannal takku bictaama? Boco naqbudem mannal takku bictaama?» 'yaanam axcuk, edde iyyan kas kee cubbi malon.

²⁰ Ballaaqet aben daacoh gide ikkal, tuxxiq lem hinna. Oson ceele-waytiy duquruk kalih mari edde ase waahiyyat asaanaah; ahak ken cataanam faxaanamah akak duude waan caddoh yemeeten. Ta mari ta ceeloy gabat loonuuh yaqbudeenihiyya yalla hinnam keenih matambulla.

ISRAAYIL MARI LE BARKATA

²¹ YALLI iyyemii: «Israayil ummatey, yi naqoosa kinnitoonuk, aham inkih kassitak, yoo mahawweenina. Yi taamat gactaana'gidih sin gineeh; yi naqoosa kinniton. Tonna leemiik, Israayil ummatey, sin mahawweena.

²² Abten dambi kee umaane qamburreh innah siinik eyseerreh. Sin waddem yook, tonna kinnuk yol uduura» iyye.

²³ YALLI isi taama abeh yanik, qaraanow ifric; ifricay qililis. Baaxoy kaadu ifricay qililis. Qaleela kee garbol yooboke cooxow, ifricay qililisa. YALLI Israayil ummat wadeh; isi qax-maqaane Israayil ummattat aybulleele.

TAKKU-WAYTAM YALLIH-GABAT TAN

²⁴ YALLAY qimbol sin gineeh sin wadehiyya kaadu iyyemii: «YALLI yooy; kullim tuklukem yoo. Mango qaran fidissem dibuk yoo. Baaxo gine saaku num yo'lih masuginna.

²⁵ Ginnili kee kalluwalle dirableela kinnoonum aybullee. Faal qida mara kee cutuk-beya duquura kinnoonum aybullee. Sahda le ixxiga, iggima kinnim keenik aybullee.

²⁶ Takkay immay yi naqoosa, ‹Annah tanim akkele› akak intem kee yi farmoytit, ‹Yalli nek iyye› axcuk edde yabba 'tem inkih numma akkele. Yarusalaamal ahak sarra ummat dabaaqah gacele. Yuudâ-magaalooli ahak sarra xissiimele. Too magaalooliy abuuruh sugtehiyya ahak sarra xissiimele 'yaanam exceeh; toh akkele.

²⁷ Afak exce qangarat, bad kee daroori kafsa Dagelta kinniyo.

²⁸ Kooris deqsita numih giddinaamak, ‹Usuk yi aftok baaxo xiinisele› 'yaanam axce. ‹Anu aba kaak axcem abele. Yarusalaam magaala nammayhaak akah xissinta innah amri aceele. Yallih Qibaadah-Qarih-rakiibo xisele› 'yaanam axce» iyye.