Yasaqya 43 - NABUWWA KEE MALIKWA

YALLI ISI MARA CATELE

¹ Tonna'mmay ta saaku hay, YALLI siinik iyyam le; Israayiley, sin yuklukeeh inki mara sin abe Dagelti siinik iyyam le. Toh macaay inteenik, «Sin waddem yook, mameysitina. Migaaqal siinih seeceeh; yi mara kinniton.

² Kaxxa weeqaytih adda tabtaanamah, anu sin lih ani'kkal, akak cunxittaanam manton. Weeqi siinit yamaateemih, anu sin lih ani'kkal, duufut sin mabeya. Urta girak adda gactaanamah gira sin matakma. Anu sin lih ani'kkal, girâ-huuri sin macararisa.

³ Macaay inteenik, YALLAY sin Dagelta kinniih sin wadahiyya yoo. Israayil doore Dageltay *Kudduusuk yanihiyya yoo. Isin currih tawqeeni'gidih, Masri-mara sin gidyatah ecee. Kuus kee Saba sin aftok ecee.

⁴ Yi garil muxxo leeh kunnabna le mara kinnitoonuuh, sin kiciyyo. Tohuk gexxaamah sin aftok sinam aceeyyo; sin roocih gidyatah mango baaxoh ummatta aceeyyo» siinik iyyah yan.

⁵ Qagseh iyyemii; «Anu sin lih ani'mmay mameysitina. Ayrô-mawqa le kabul tan sin xaylo siinih gacseyyo; ayrô-culmak bahha sin heeh, sin baaxol tittal sin gacseyyo.

⁶ Kiblat le kabu marak, ‹Ken maxaginay gexoonay ken inxica› axceyyo. Gabbi-qaxat raaqa marak, ‹Gexe ken makalina› axceyyo. Inni xaylo xer-baaxoy elle yaniinik gacseyyo.

⁷ Yi migaaqal yaaxigen maray anu uklukeeh yoo yaynabeeni'gidih akah ginehiyya inkih gacseyyo» iyye.

YALLI IYYEM AKKELE

⁸ YALLI isi mara cokmi-qari fan baahe. Intiita loonumuh mayablan; aytiita loonumuh mayaabban.

⁹ Baadal tan ummatta inkih gaaboyseeh doolatwa tittal kobxisse. Too waqdi keenik iyyaamah: ‹Sugay ama isin yalla akak intan duyyey taqbudeenihiyyah addat sarra takku waytam naharal siinih warissem iyya?› inxicay ken esseray. ‹Taham akkele inneh neneeh tohum tekkeh› akak iyyaanam tenek, ‹Naabbu waynak neh warisa› keenik inxicay! Toh nummak sugtek, ‹Aleey oson yallah loonum nummat yabtah tan!› axcenno» 'yaanam iyye.

¹⁰ YALLI iyyemii, «Yoo taaxigeeni'gidiiy yol taamineeni'gidiiy Yalli dibuk yoo kinniimih sumaq takkeeni'gidih, sin dooreeh inni naqoosa sin abe. Qimbooy ellecabo mayyuuy, tohoysa yok sa Yalli mayan.

¹¹ YALLI dibuk yooy; yok kalah Yalli mayan; yok sah wadoot akak geytan Yalli mayan.

¹² Takku waytam naharal elle siinih warseeh; toh tekke saaku, wadootuh siinih temeeteeh sin waddem yooy; tohum inkih toysoobbem yoo ikkal, ama sinam taqbude duyyey gabak bicseenihiyya hinna. Tonnal, yok sa Yalli ane waamah sumaq yok siini» 'yaanam iyye.

¹³ «Tonna kinnuk, Yalli dumaak yooy, sarra yoo. Yi gabat tanim num mabukkusa. Anu abem korsa mari mayan» 'yaanam iyye.

YALLI BAABELOONUK KEN BAAHELE

¹⁴ YALLAY sin wadahiyya iyyam le. Israayil doore Dageltay *Kudduusuk yani siinik iyyamaa: «Sin taagah, Baabelon fan amri ruubeh an. Oson inkih dabbô-mara akkeloonuh, ken maraakibiy kaxxam edde yakkaleenihiyyat kudelon.

¹⁵ Israayil ummatey, anu YALLAY *kudduusuk yan sin Dagelta kinniyo. Inkittu sin abeeh, sin malik kinniyo» iyya.

¹⁶ Dumî dabaanal YALLI badak gudek gita bicse; haffita badak gita siinih yeyyeeqe.

¹⁷ Too dabaanal celeemah tan qaskar edde baatu wayta gitat ruube. Too qaskar faras-gariira kee faroosa qeebih luk gexxe'mmay, elle gexen ikkel akak ugte waan niksoh yinnikisseeniih, mano luk maraaqinnon. Urta dubaalat elle bargusan innal, xaynal Yalli ken barguseh.

¹⁸ Tonna'mmay tahaysa YALLI iyyamaa: «Duma tekkem makassitinaay hawweena; duma tekkem niyal mahana.

¹⁹ Away qusbaamay bicsam faxahiyya liyok, wagita; taway tohih abtoh addat ani'mmay, wagita. Bacarih tan baaxot gita bicseyyooh; bakarroyta le baaxooxal daroori abeyyo.

²⁰ Dubaali yoo assakaxxeleeh, wakri kee inin yi assakaxxiyyat gacele. Yoo akah yassakaxxoonu waanam, bacarih tan baaxo lee abeyyooh, Israayil maray innih dooriteh bakarroyta le baaxooxal daroori abeyyo.

²¹ Ta mara anu inni caagidih gine. Yi fayla abu waa mara yakkeeni'gidih, ken gine» iyyah yan.

YALLIH MARI ABE DAMBI

²² YALLI kaadu iyyemii: «Israayil maraw, abtan kallaci kee dooqa, akah abtaanam yoo hinna; yoh isinni taqbisak masuginniton.

²³ Cado akak cararisan illi, yi-sadgatah mabahtan; sin sadgoota yoo mataynaba. ‹Sadgatah yoh baaha› axcuk quuka siinit mahanniyo; hinnay kaadu, ‹Qaydarus qerto sadgatah yoh baaha› axcuk, sin edde taqabak masuginniyo.

²⁴ Yi sabbatah, sadgat rubtaana'gidih qaydarus xaamah sin maballiyo; saqa yi sadgatah maqiditinnitoonuuy, xayti-qeerisan-suruyuk yoo ruffa mahanniton. Toh hinna'mmay isin abtaanah-tanin-dambi yol quuka yekke. Qellatay edde taniini yol taqabi yekke.

YALLI ABA QAFU

²⁵ «Tah inkih abtaanam siinik abaluk, abtan dambi siinik luuqusa Dagelta kinniyo. Toh siinih akah abam, inni migaaqih taaga. Tohuk gexxaamah edde assen umaane kassitak maraaqa.

²⁶ Duma tekkeemit maro foocal yabnay inxica. Edde taniinim gita tekkek, yoh qaddoysa.

²⁷ Akak radden sin kaxxa abba duma dambit aseh yen; sin afak yabta sin kedoh-abbobti yi yab cinak sugte.

²⁸ Tonna leemiik yi marak abbobtih yan mara qaybik qideyyo. Yaqkuubuk rade mara bayseyyo; Israayil-mara buruten mara abeyyo.