Yasaqya 42 - NABUWWA KEE MALIKWA

YALLI RUUBU WAA NAQASU

¹ YALLI iyyemii, «Aham kaana: Yi naqasuy innih dooreeh, ossokoote. Inni gabat kaa dacrisa. Inni Rooci kaah eceeh an. Baadal inkih tan ummatah, qadaalat usuk baahele; numma-le-meklah meklele.

² «Usuk sahda lih mayaamaay kaxxa anayat maxongola; gitittel waxxaqto maaba.

³ «Toome bayre mayaggila; uri akak boola le faanus mabargusaay mabadisa. Boola le mara mabaysa. Usuk amaanat kee diggat cakkih yan cokmi ackumele. Kulli num qadlil meklele.

⁴ «Inkih yan baadal qadaalat nookisaah daabisam fanah, kay niya mataddigila; way madaacta, mabaxaqta. Allahî-mari kinni-way, kay afak tawqe baritto geyoonu qambaalitelon» iyye.

⁵ YALLI inkih yan qaran gineeh fidseeh; baaxo fidseeh baaxô-bagul ubukku intam yuklukeeh; baadal yan marat rooci kee ufuy hee. Usuk qagseh isi naqasuk iyyemii:

⁶ Yoo YALLA koh sectam; kooy yi naqasuh yanihiyyah qadaalatat seecah an. Ko'lih aneyyooh; koo dacriseyyooh; ummat lih qahdi koo le kabuk heeyyo. Baadal tan ummattah ifu koo abeyyo.

⁷ Inti maleela inti geysiisetto; casbit yan mara casbik ayyaaqetto. Ditet yan mara woo casbik ayyaaqetto» iyye.

⁸ Yalli kaadu tonnah iyyemii; «Anu YALLA kinniyo; YALLI yi migaaqa. Inni nabna faxinnaanimit tabsa Dagelta hinniyo; Innih liyo fayla xeet kee cooxuk bicissa heenimiy yaqbudeenihiyyah yacee Dagelta hinniyo.

⁹ Duma edde yaabeeh, akkele akak excem tekkeh tan. Taway sarra takku waytam, takkeemik dumal edde yaabe» 'yaanam YALLI iyye.

FAYLAH ABEN GADA

¹⁰ YALLA qusba faylah faylisa! Baadal yan maraw, fayla abaay YALLA saarisa. Badal safarat yan maraw, kaa saarisak candu kaah gacisa. Badak addal enna 'taamay rooci lehiyya candu YALLAH gacissay. Xer baaxo kee xer baaxoh maraw, YALLA faylisa.

¹¹ Bacari kee bacarih tan baaxol tan magaaloolih maraw, YALLA faylisa. Keedarah yooboke mari YALLA faylisaama. Silaq deqsitta magaalal yan mari qililisak kaa faylisay; qaleelah amol gacca 'yeenih kaa faylisoonay.

¹² Xer rasul yan mari YALLA faylisaay kaa yaynabay; YALLA saarisaay kaa yaynabay.

¹³ YALLI, celem gaaduh elle gexa'nnal, gaaduh gexele. Carbih gexa num elle gexa'nnal, bagcarritak gexele. Qeebih tirtirisak naqboytiitik aysele.

YALLI ISI UMMAT CATU WAAMAH XAGNA CULE

¹⁴ YALLI iyyemii, «Mango dabaanah tibbat sugeeh ableeh aabbeemik tibba axcuk, tu elle gacse'kal suge. A saakuh tu gactek, abini wakti yemeeteh lacawat tan barrah innah iihisah, deero aba.

¹⁵ Qaleela kee koomaami abur abeyyo; caxa kee qayso elle mataabuka. Illaltah sugte baaxo kafseyyo; doritte elle sugte baaxo kafseyyo.

¹⁶ Inti maleela duma edde gexe wayte gitat beeyyo; duma aaxige waak sugen gitat ken beeyyo. Diteh sugte baaxo ifu keenih bahsiiseyyo; umuk suge gita saytun-gita abeyyo. Abu waam tamahaay; duuduse'kkal fanat ken macaba.

¹⁷ Xeet kee coox yaqbudeeh elle yeemeneeh; gabak bicsen duyyek, ‹Ni dageltit siini› iyya mari, qaybit radeleeh, kaxxa wacarriy ken abbixele.»

YALLIH MARI YALLIH YAB CINEH

¹⁸ YALLI iyyemii, «Ayti allih aabbe waa maraw, ankacisa! Inti allih able waa maraw, ubula!

¹⁹ Yi naqoosak intî-sinnah lafita mari mayan. Anu ruube farmoytittek aytî-sinnah lafita mari mayan. Yi naqoosay yoo fan gactehiyyak mari mayan.

²⁰ Israayil ummatey, mangom tubleeni'mmay tubleenimit cubbi mahanniton. Edde taabboonuh ayti litoonu'mmay taabbeenim manton.»

²¹ YALLI isih leh yan cakkik gexxaamah, isi baritto kaxxa barittoy nabna lehiyya abeeh; toh kaa ruffa hayte.

²² Takkay immay a mari buubeeniih, buxa akak wararen mara. Boodot qideeniih, casbit daanisen maraay, ken waddam wee mara. Seewah ken been saaku, ‹Ken gacisa› inteh keenih yabtem matana.

²³ Aham siinik ankacissam iyyaay? Ahak wadir ahat cubbi siinik haytam iyyaay?

²⁴ Israayil-mara seewah sinam gabal haytem iyya? Israayil-mara ken buubu waa marih gabal haytem iyyaay? Taham inkih YALLI keenik abeemi. Dambi lem YALLAL bahneeh; tohuk gexxaamah tamah nel baahe. Yallih gita katayaanam cineeniih, kay amri yaabbeenim cineenih.

²⁵ Yalli toh keenik ubulla hee waqdi, isi bagcarray girah innah sinam cararissahiyya keenil ruube. Carbi keenit aba mara keenit ruube; Too carbi girah innah ken laqlaqe'mmay, tohuh edde maradinnon. Too gira ken tokmeh immay, toh baritto keenih makkina.