Yasaqya 41 - NABUWWA KEE MALIKWA

YALLI SAHDAYTI ABTO YAMLIKEH

¹ Yalli iyyaamah: «Isin xer baaxol yan maraw, tibba 'xicay yoo fan ama. Baadal tan ummatey, qusba qande haysita. Cokmi-buxal yaabittaanamih nasiib alletton. Gital nek yan num nable'gidih, fooca kee foocah cokmi-buxal nangooroway.

² «Qeebil yaysu waa num ayrô-mawqa le kabuk bahtem iyyaay? Isi taama aba'gidih, qadaalatat kaa bahtem iyyaay? Amoytit kee ummatak iisa kaa geysissem Yalla. Qeebil seefit ken selele. Caaco caffa duufut elle beyta'nnal, siisa ken abeleeh; gaysê-baxat ken selele.

³ Lakak ken yayraddeeh; sissikuk abah yan ardah, ibi baaxo kaak maxagaay mabiyaakitaay muquk gexa.

⁴ Taham inkih abteeh absissem iyyay? Sahdayti abto tamlikem iyyay? Toh yoo YALLA. Anu inki anyoh; qimbo yooy, ellecabol kaadu aneyyo.

⁵ «Allî-baaxoh mari anu abem yubleeh, too way cunxiteeh, axaxiteh. Sarra gaabowwa 'yeenih yemeeten.

⁶ Num, num keenik cata. Toobokoyti toobokoytak, ‹Agiru tik› 'yaanam iyya.

⁷ Gaba naggaarinna le num dahab bicsa numuh aytikuma yecee. Yaqbuden ceelo gabah orra heeh yaysororooce num, bismaarat aatakuk tittat xakbisa numuk, ‹Meqe'nnal abtah tanik tama'nnal ab› 'yaanam iyya. Woo yaqbuden ceelo rade wayta'gidih, soolisaanaah bismaarat xakbisan.

CATO ABTAM YALLA

⁸ «Hay, Israayil-maray yi naqoosah yanihiyyaw! Yaqkuub-xayloy anu dooritehiyyaw! Abraahimiy yok kataysah yanihiyyak rade maraw!

⁹ Baaxô-maggaraqak siinih seece. Affara kaalibik sin gaaboyse. ‹Yi naqoosa kinnitoonuh; sin doorite'kkal, baaxot sin maqida› axcuk siinih seece.

¹⁰ Tonna'mmay anu sin lih anik, mameysitina. Sin Dagelti yook, niya siinik addigille waytay. Qande siinit heeyyooh sin cateyyo. Inni gabay qadaalat lehiyyat sin dacriseyyo.

¹¹ «Sin niqba mari nasri wayya heeh, wacarriy ken abbixelem digga. Sin biyaakah ugte mari bayeleeh suge weeh innah gacele.

¹² Sin gibangibita mara gorrisetto'mmay mageyta. Qeebi siinit abak suge mari a addunyah bagul ankulluke weeh innah gacelon.

¹³ Macaay inteenik, yoo YALLAY sin Dagelta kinnihiyya qande siinit haah, ‹Mameysitina. Sin cateyyok› siinik axce» iyye.

¹⁴ Yalli iyyemii: «Israayil ummatey, qunxaah boola le marah tantoonum siinik aaxigeh immay cato akak geytaanam, yooy kudduusuk yan sin Dagelta kinnihiyya kinnuk, mameysitina. Sin wadeeni, yooy kudduusuk yan sin Dagelta kinni.

¹⁵ Caffa darok edde meexan af le birtay qusbahiyya sin abeyyo; qaleela aggiggilettoonuuh bututtukku heetton. Koomaami bullaaqeh gacsetton.

¹⁶ Qaraanal siisah innah ken fikiikisetton; silayti qaraanal ken beele. Caaco baaxol ken fuluulukusele. Toh tabloonu waytan waqdi, YALLAT ruffa axcetton. Israayil doore Dageltay *Kudduusuk yanihiyya assakootetton. Tahat yabtam yoo YALLA» 'yaanam iyye.

¹⁷ «Tu maleela kee masaakiina yaaquben leeh goranat gacta'mmay mageyan. Katla keenik bakaarah kaffa 'te'mmay yoh seecan waqdi, too bakaarak yooy YALLAH yani ken wadele. Yooy Israayil doore Dagelta kinnihiyya gibdaabina kee gadaamal ken macaba.

¹⁸ Bakarroytah sugte koomaamik lee darah akah obta innah abeyyo. Goloolak buyyitte darah oobiseyyo. Bacarih sugte baaxo illalta abeyyo. Buyyittek caxitte lee kafinuk sugte baaxol darah oobele.

¹⁹ Bacarih tan baaxol *sariddo kee tikibleey cebakaay madeeraay wagar kee saagan aysubukeyyo; kaxxa cooxuy iraawo yeceehiyya aysubukeyyo.

²⁰ Taham YALLIH gabat tekkeeh; taham duudusseeh, gintem Israayil doore Dageltay kudduusuk yanihiyya kinnim woo masaakiina ubullaay cubbussa haan waqdi, aaxigeloonuh, edde radelon» 'yaanam iyye.

YALLAT TU MISSOOWAANAM TUXXIQ SINNIIMI

²¹ YALLAY Yaqkuub-Malikih-yani, gabak bicsen duyye yaqbude marak iyyemii; «Intaanam faxxaanamat marô-foocal yaabay! Sumaaqah litoonum uybulluyay!

²² Taqbuden duyye gabat luk amaay, ‹Takku waytam neh warisa› inxicay. Naabbu waynak ‹Duma tekkem neh warisa› inxicay; ‹Wohim edde cabtem neh warisa› inxicay. ‹Sarra tamaatu waytaah takku waytam neh warisa› inxicay!

²³ Hay, yalla kinnitoonum siinik elle naaxaguh, ‹Sarra takku waytam neh warisa› keenik inxicay. Umam takkuu, meqem takku, siinik meysinna'gidih, ‹Tuk teena abay› keenik inxicay.

²⁴ Cubbussa hayteenik, Yallah liton duyyeey, is tuh tanim hinna; tu abtu madudda. Ken dooritak yaqbude mari umâ-yabulih tanim yekke.

²⁵ Tonna'mmay kilbatak num ugseh aniih; too num amaatele. Ayrô-mawqa le kabuk, yi migaq fayya haa'gidih, amaatele. Too num baaxok abbobtih yan marat, kalla arqusan waqdi kallat elle yaaqiten innal, keenit aaqitele. Buuti kallak bicsa num woo kalla arqusa waqdi elle yaaqite'nnah, keenit aaqitele.

²⁶ Taqbuden duyyey aham akkeleemik naharal elle yabtehiyya maay tan? Isin yallah litoonum taham naharal siinih warseh suginnay, tonnal naharal elle teexegeenih sugak tenen. Takkay immay isin yallah litoonum tahat mayaabinnaay, tu naharal mawarsinnaay; keenik inki qangara maabbinnon.

²⁷ Ta xaagu naharal warissem yoo YALLAK ten. Siyon-marah ‹Tah akkelem› warse. Yarusalaam fanah meqe xaagu le farmoyta ruubeyyo.

²⁸ Yallah lon duyyey xeet kee cooxuk bicseenihiyya tuk teenat yabta'gidih ken wagteh immay tut yabtaamak masuginna. Ken essereemik yol gacseenim matan.

²⁹ Cubbussa hayteenik, tah deedala'kkal tanim hinna. Too duyye abtam mali. Deedalaay baditi'kkal tuxxiq lem hinna.»