Yasaqya 40 - NABUWWA KEE MALIKWA

YALLIH AYTIKUMA

¹ Sin Dagelti qangara yaabe: «Yi ummatat niya hayisa; aytikuma keenik 'xica.

² *Yarsalaam xaylo lih yaaba; racmatta luk ken lih yaaba: ‹Mango biyak siinit yekke, mango waktih biyaakitten; aysa, biyak akket yaade. Abba hayten dambih inkih, dudda luk sin 'kah digaale; aysa dambik qafu geyten› 'yaanam inxica, warisa» 'yaanam iyye sin Dagelti.

³ Allak radda xongolo tan; «Bacarih tan baaxol YALLAH gita missoysaay bicisa. Ni Goyti akak yamaate'gid, sinam elle dago baaxol edde yamaatu waa gita makok gacisaay bicisa.

⁴ Fayya kee ramma le baaxo saytunoowak missoowele. Qaleela kee koomaami inkih ramma axceleeh missoowele. Boodaada le'kke maraqtaay; xeet le'kke bacari akkele.

⁵ YALLI le nabna kee migaq, ambulleeleeh, qaddoowele; ummat inkih tet ablele. Taham YALLI isih iyyeemi; dumaak xagna akah culeemi» 'yaanam inte ta xongolo.

⁶ Allak qangara yol radde, «Farmo tanik waris» inte. Woo yaabal qangara gacse; «Maca axcoo? Maa farmo qidoo?» 'yaanam axcuk elle gacse. «Axcettoomu, warsettoomu: ‹Baaxol yooboke qobooru sahdayti kinnih, 'kah yanim; kay nabna qoboorih gide.

⁷ YALLI caaco ruuba waqdi, qayso laqaymumtah kafta; qobor kafah baaxol rada. Sahdayti tohuk mayaysaay; too gideey tohuk mayaysa.

⁸ Qayso kaftaah, qobor radah, immay Yalli iyye qangara, daayiman tan, baati mabta. Ni Goyti iyyem elle raqta› iyyaanam farmo qidetto.

⁹ *Yarsalaamah warsa numow, meqe xaagu teetih waris. Fayya le qale fan gexay, amol bukka akak inxicay, ta xaaguy ayti doogisa, warisay, awadah inxic. Siyoonuh, anay fayya haay, a xaaguy ayti doogisa, teetih waris; awadah 'cuy. Fayya hay, anay fayya haay, teetik 'xicay, mameysitin. Yuudâ-magaaloolih marak, «Sin Goyti yamaateh» inxic.

¹⁰ «YALLAY Mulki le yamaateh, baaxo isi caylat xiinisuh, mamaatat yan, yamaateh yan; isi galto luk yamaate. Isi-ummatay isih wade, gabat baahak, yamaateh yan.

¹¹ Illit dacayrih yan loyni, isi illi elle dacrisa'nnal, YALLI isi mara dacrisa. Illi-xaylo gabal quukah, aliilit xabba haah beya. Xale illi xuwaw luk beya» 'yaanam axcuk keenih waris.

YALLA CELTAM MATAN

¹² Bad gabat tabbixem iyyaay? Hay, gennaqtal iyyi keexa? Gabâ-gennaqtat qaranwa le gide kiyassam iyyaay? Baadal qiddek tanih gide, daasak addal iyyi keexa? Toh Yallak sa num maduuda.

¹³ YALLAK «woh ab» intam iyyaay? «Ah ab» axcuk amri yeceeh, fayu yeceem iyyi duuda?

¹⁴ Aaxige waam barta'gidih, cubbuse waamat rada'gid, YALLI fayu iyyal essera? Takkem faxxintam aba'gid, cakkih tanim aba'gidih, YALLI fayu iyyal essera?

¹⁵ YALLI doolat tuh mayabla. YALLIH garil doolatwa inkih, roobuk radde tiffoh gide; qiddeyti gide, kay foocal. Gadirwa inkih YALLIH garil, gabat heen ballaaqeh gide.

¹⁶ Lubnaan rasul eneyya 'ta, garboh addal tan alluwwa, tikka 'taamak yasguuden way, Yallih sadgatah qidan way, Yallih sadgat duddam hinna. Woo garbol bocok enna 'tam onkoysaanaah yafiilen way, kaxxa sola akak xisan way, Yallih sadgat duddam hinna.

¹⁷ Yallih garil doolatwa inkih, tu hinna, tuh ken mayabla.

¹⁸ Yallat missowtam maay tani? Yallih ceelo iyyi yaaxige? «Anna ceela, woo gurral yan» intu duddah, intam iyya?

¹⁹ Gabak bicsen ceeloh innah, birtak aben ceeloh innah, dahabak yuskuten ceeloy lakqok yan birtak bicseeniih, silsilatat daabiseenih, inna malim Yalli, digga.

²⁰ Lakqo kee dahab gee wee num bokoke waa coox doorita; yaqbude ceelo akak bicsa. Bicisu yaaxige naggaar baahak, «Akak bicis» iyya. «Qibaadah daabisen ceeloy baaxô bagul rade wayta aqbuduh yoh bicis» iyya. Yalli woo bis malim digga.

²¹ Xer dabaanak, dumal elle, siinih warse num maay suge? Baad elle ginniimek sarra, tu aabbe ween mara tekkeenii? Aydumah mataaxigaanaa?

²² Addunya tuklukem Yalla. Baaxok daga raaqa aracal, dardaarinni korsih bagul, Yalli daffeynah yanih yan. Qaran gubal tan ummatta, qunxah xuune ceelak raqta. Guulah innah qaran fidseh, siraq innah qaran fidseh.

²³ Cayla-leelah tan abbobtik, cayla beyah, ken cabsiisah; keenik beyah, foyyal caba. Baadal amri tecee abbobti finqah ruubah, foyyal caba.

²⁴ Ubukka 'teh cabaaritte, qunxa caxah gide kinnon. Yalli caaco ruuba waqdi, qunxa caxa cabaarittah; kaffa karacca 'tah rabtah. Baaxoh abbobti too gide. Caaco beyta caffa yakken.

²⁵ Kudduusuk yan Yalli iyyam le: «Yot missowtu duddam maay tan? Hay, yi gid takkem maay tani?»

²⁶ Qaran fan gubaak wagitay; qaraanal tablen cutuuka, gintem iyya siinit celta? Cutuk beytaah, miraacissam ken gine Dagelta kinni. Loowo keenik takkeh gide yaaxigeeh, keenik diggi haa. Migaq keenik tiya-tiyah yaaxigeeh, keenik digga haa. Migaq keenik tiya-tiyah yaaxigeeh, ken mawaagisa; too migaaqal keenih seeca. Yallih qande waado mali. Cayla-li kinnuk Dagelti qaran cutuk faxeh gide, loowo kee mangah yakke way, ken yaaxige; tiyah-tiyah. Kaak mabayan; digga ken haa.

²⁷ Hay maca tan Israayiley! Tah ceddeeniih tismiteenik, «Ni Dagelti ni gadaama mayaaxiga» mannal intan? «YALLI ni cakkit maaqile» iyyaanam mannal intan?

²⁸ YALLI waara Goyta kinnim baad inkih gintem kaa kinnim siinih warse num maay suge? Cawal maabaay, maboolaata; kay ixxiga caddo malim aydumah mataaxigaana?

²⁹ Quuki taqbise seehada maqar 'kak geytam kaa kinni. Boolatteh qande-maleelat qande kee maqar haytam kaa.

³⁰ Qunxaane kee furrayniinol, num taqabelem raq mali. Bar qunxaamah yandufuleh; bar qunxaamah radah immay

³¹ YALLAL kibalsita maray kibaal kaal haak kaa qambaala qusba qande haysitelon; gabilleemi'nnal haadelon. Qaafiyatah danan yakken; yardeenimih cawal maaban. Abaanamah ibi-gexo, 'kak mataqban; maboolaatan.