Yasaqya 39 - NABUWWA KEE MALIKWA

BAABELOONUK TEMEETE FARMOYTITTE KEE CISKIYYAAHU ABEEMI

¹ Too dabaanal Baabelon-malikiy migaaqah Maroodak-Baldan deqsitahiyya Ciskiyyaahu lakmisak sugeeh, sarra qaffooteh 'yaanam yoobbe. Too waqdi yuktube warkat kee mattaco kaah ruube.

² Ciskiyyaahu farmo elle ruuben mara ruffa luk arcibiseeh, sarrak duyye daanah edde yabbixe makaadin ken culse. Too makaadinih addal, lakqooy dahabaay caxâ-sifaay qatri kee qaskar silaacih agantah, tu cabe'kal ken yuybulle. Ciskiyyaahu isi qarih adda kee isi xintoh gubat taniimik ken aybulle wayya heem mali.

³ Sarrak nabi-Yasaqya Malik-Ciskiyyaahu fan yemeeteeh, kaak iyyemii, «Too mari akak yemeetem ankeey, kok iyyeenim macaay?» kaak iyye. Ciskiyyaahu iyyemii, «A mari yi fan akak yemeetem, xer baaxoy Baabelon deqsittahiyya» iyye.

⁴ Yasaqya, «Hay ku qarih addal abaluk sugeenim macaa?» kaak iyye. Too waqdi Ciskiyyaahu, «Yi qarih addal tanim inkih yubleeniih; duyye edde daanah haan makaadanih addal taniimik, ken aybulle wayya heem mayyu» kaak iyye.

⁵ Tohuk lakal Yasaqya kaak iyyemii, «Hay tonnal, YALLAY Nabaamak Nabahiyya kok iyyam koh warisu waa.

⁶ ‹Ku qarit duyyek enna 'tam kee, ku kaxxa abbobti a saaku fan gaabosse duyye inkih, Baabelon fan edde weeroonu waan wakti xayyooweeh; caboonu waanam malon.

⁷ Ku abuusay kok radehiyya seewah beeloonuuh; ken seelabba heenih Baabelon-malikih gasoh addal ken tamsiiselon.› Taham intam YALLA» kaak iyye.

⁸ Too waqdi Ciskiyyaahu iyyemii, «Ta way atu edde yabta YALLIH yab meqe yaaba» 'yaanam iyye. Toh akah iyyem, «Anu innih anim fanah, baaxo amaan akkele» 'yaanam niyal hayya heeh iyye.