Yasaqya 38 - NABUWWA KEE MALIKWA

CISKIYYAAHU ABE BIYAK KEE ELLE URE'NNA

¹ Toh edde tekke uddurut, Malik Ciskiyyaahu kaxxa biyaakah biyaakite. Rabi kaat xayyooweh suge. Amox-baxi-nabi-Yasaqya kaal yemeeteeh kaak iyyemii, «YALLI, ‹Ahaysa rabi kot xayiih; ama lakimak murta'mmay, buxâ-mara farriimitay cab› kok iyyah yan» 'yaanam kaak iyye.

² Toh yoobbe waqdi, Ciskiyyaahu foocah gidaarat ufkunna 'yeh dooqa abe.

³ Dooqah iyyemii, «YALLAW, inni bagu kee afqadook ku qibaada kee ku taamat sugem atu yok taaxigeh. Ku garil meqem abittoh yok orobtaamat asak suge» 'yaanam dooqah inxicca 'yeeh, namma intik kaxxa ximo kaak akah tamaate weeqah weeqe.

⁴ Tohuk lakal YALLIH qangara Yasaqyal obte.

⁵ YALLI kaak iyyemii, «Ciskiyyaahu fanah gexay kaak intamaa, YALLAY ku kaxxa abbah yan Dawuduk Dagelta kinnihiyya, ‹Atu abte dooqa kok oobbeeh, namma intik caxxe ximo kok uble. Tohuk gexxaamah taban kee koona sanat qumrik koh osisah an. Ahak sarra taban kee koona sanat sugetto.

⁶ Carbik koo cateyyo. Ama magaala kaadu Assuuriyah malikih gabat radi mahaay, innih tet dacriseyyo› 'yaanam kaak inxic» iyye.

^7-8 Nabi Yasaqya Ciskiyyaahuk iyyemii, «YALLI, koo qaffoyseyyo, axcuk koh cule xagana koh duuduselem kaak elle taaxigemii, Malik Acad bicse mawqeenal rada silal, salaf-salafah tabna maaqattak taturra axceleeh; toh, qaffootettom elle taaxagu wayta asta» kaak iyye. Too usuk akah iyye'nnah, iraawo tabna maaqatta wadirih tuduure.

⁹ Ciskiyyaahu biyaakak qaffoote saaku Yalla elle faylisa saare abe.

¹⁰ «Anu ekkeleh sugem YALLAW, qumrik abxa yoo waysisseh, rabah yoo beytam ekkele. Diikoh yoo rubtam ekkele; akeera oobeyyom ekkele.

¹¹ ‹Ahaysa cayaatal anuk YALLA abaluk maraaqa› exce. ‹Cayaatal yan mara mabla. Ken mageyaay magaraya› 'yaanam inni afqadol exce.

¹² ‹Dacarsittô-marih qarway cube'kal guuruntah innah, yi rooci guurumeh› exce. Xambaqen fiddima ekkeh an. Yalli, ‹Mano kok finqitteh› iyyaanam yok iyyeh suge. Ama ayro gaba kale'kal, Yallih amri yol yamaatem inni niyal cubak suge.

¹³ Isbireeh, Yalla qambaalak, inkih yan bar xiinak suge. Dagelti lubaakih innah lafa yok kitittifak yen. Ama ayro gaba kale'kal, Yallih amri yol yamaatem inni niyal cubak suge.

¹⁴ Anay boola yok baaheh yen. Robti-kimbir celamceelak, wirriq axcuk, xongolak en. Camaamah innah iihise. Qaran wagittot namma-inti taqabteeh boola yok bahte. ‹Edde anim, ankikkiqiyya; Yallaw, yoo eyyeq; yoo wad, YALLAW› 'yaanam exce kaa kallace.

¹⁵ ‹Axcem mayyu abam mayyu› 'yaanam inni-afqadol exce. «Aham inkih Yallih fayxiiy Yallih amrik yot tekke› exce. Qaadeh bagi yok ankayeh; ah yot tekkeemih sabbatah, anu addunyal anim fanah rammitta axcuk xiiniseyyo.

¹⁶ ‹Yoo qaffosseh, yi Dageltaw rabak yoo waddeh, yi Goytaw! Aba mano koh abeyyo; koh aneyyooh, kum akkeyyo. Yallaw, yot tekkem sinaamah ceelalloh akkelem digga› 'yaanam inni-afqadol exce.

¹⁷ ‹Afqado yok abte ankaya maqaaneey meqem yoh xalte. Yoo akcinuk, rabak yoo catteh; abe dambi yoh cabteh tan› 'yaanam yi Dageltak exce.

¹⁸ Akeera oobaah raba mari ku fayla maabaay maduudan; Akeera oobaah raba mari, lito digga mayaaxigan.

¹⁹ Anu koo akah faylisa'nnah, yan mari fayla koh aba. Addunyâ-bagul yan mara ku digga elle tan inna abbobti, xayloh warissa.

²⁰ Yallaw, ah yooy yoo qaffosseh. Ahaysa ku fayla abenno; *kirar gabak aagurenno; ku fayla gambik abenno. Qumrik naniih mano linom ku Qibaadah-Qarih addal ku candu kee saare abenno» 'yaanam Ciskiyyaahu Yalla elle faylisa saare abe.

²¹ Ciskiyyaahu biyaakitak yen saaku, nabi Yasaqya kaadu kaak iyyemii, «Ama duddubay litohiyya kok qaffoota'gidih, sublâ-xaylo tittak bagul hayya haay edde dug; tonnal qaffootettok» kaak iyye.

²² Too waqdi Ciskiyyaahu, «Qaffotta exceh YALLIH Qari gexu duudem, innik elle aaxagu waam mannaay? Aham elle aaxige astah maca tan?» kaak iyyeh yen.