Yasaqya 36 - NABUWWA KEE MALIKWA

ASSUURIYAH MALIK YARUSALAAM YABBIXE'GIDIH YEMEETE

¹ Ciskiyyaahu Yuudâ-malik edde yekke taban kee fereyhaytô-sanatat, Assuuriyah-malikiy migaaqah Sanceerib akak axcuk yeneenihiyya, inkih tan Yuudâ-magaalooliy maroh gasoosa edde sugtehiyya qeebit yibbixe.

² Assuuriyah-malik, Laakis-deqsitta-magaalak qaskar-abbah-yan-num Yarusalaam fan ruube. Too num mango qaskar gabat hayya heeh gexeeh, daga-raqta-dorak lee akak tamaate caraata elle obta'kkeh xaqul, «Sara kaqlisa marih Booxa» deqsita arac fan beya gital soole.

³ Too waqdi Yuudâ-marak sidiica num kaah garayte. Tohumuu, Cilkiyyá-Elaakimiy malik-qarih-abbah yanihiyya kee, Sebna deqsita numuy malik-qarih kutbe-abeenah yani kee, Asáf-Yowac deqsita numuy tikki 'taamah kutbeh-abeynah yanihiyyak ten.

⁴ Assuuriyah numuy qaskar-abbah-yanihiyya keenik iyyemii, «Gexay Malik-Ciskiyyaahuk, kaxxam naba malikih yan Assuuriyah-malik, ‹Atu kibaal elle litom iyyaay?

⁵ Kaxxa-yab, carbi-mala kee qaskariinô-dudda koh akkelem maay takkaleeh? Assuuriyat qeebi abtuh amo elle meqitom iyyaay?

⁶ Masri mari yemeeteh koo catelem takkale'mmay, toh bayreyta gabah caxxah haanamih bis le. Bayreyti gabâ-caxxa mayakka; yaddigilleeh, gaba kok qanxiseh caba. Kibaal kaal heenik, Masri-malik toh elle yan'inna› kaak inxica» keenik iyye.

⁷ Qagseh kaadu keenik iyyemii, « ‹Amo elle meqinom YALLAY ni Dageltah yani› yok inteenik, Ciskiyyaahu, Yuuda kee Yarusalaam marak, ‹Yalla dibuk Yarusalaamal yan sadgat aracal uqbuda› inxicca 'yeh wadirih fayya-le-aroocal heen qibaadah-qarwa kee sadgat arac akak yiggilem, YALLA kinnim hinna?

⁸ «Anu malik Sanceerib afak sin lih yaabu waa. Isin xoxbisa mara akah geyteenik, namma alfih faras siinih baahu waa.

⁹ Masri mari gaariira kee faras qeebi aba mara siinih ruubaanamah, ni qaskarak gacca 'ya qaskariiti siinik aysele» yaanam anqaasah keenik iyye.

¹⁰ Qagisak iyyemii, «A baaxo baysa'gidih akah emeetem, YALLIH cato maleh, inni amrih abam maay takkale? YALLI, ‹Woo baaxo ibbixay bayisa› 'yaanam isih yok iyye, 'yaanam kaak inxica» keenik iyye.

¹¹ Usuk too yaabak gaba kale waqdi, Elaakim kee Sebna kee Yowac kaak intemii, «Ni abbaw, nanu naaxigem Suuriyah afak, woo afat yaabaay am. Qibraan afay edde yabtahiyya a magaalah-gidaaral yan mari inkih yaabbek; edde mayaabin» iyyen.

¹² Too waqdi qaskar-abba keenil gacsemii, «Macaa, yi malik farmo yol akah ruubem, dibuk sin kee sin malik maay takkalen? Tonna hinna! Farmo yol akah ruubem, isin edde anuk, a maray gidaaral daffeyahiyyah kaadu edde ruube. Ama gidaaral daffeya maray siinik kaxxih kaadu isi caara yakamu waah isi daaco yaaqabu waahiyyah kaadu waris yok iyye» keenik iyye.

¹³ Tohuk lakal woo qaskar abba sollu 'yeh, anay fayya haak Qibraan afat, «Kaxxam naba malikih yan Assuuriyah malik siinik iyyam oobbeya!

¹⁴ Ciskiyyaahu sin catu maduuda'mmay, kay yab maabbina.

¹⁵ Usuk, ‹YALLI nee cateh Assuuriyah-qaskar magaala nek abbixe kalelek, YALLAL eemena› siinik iyyaamah maamanina» iyye.

¹⁶ Qagseh yab bisoh beyak iyyemii, «Assuuriyah malik siinik iyyemii, ‹Bica yo'lih abaay edde tanin ikkek eweqay gaba yol ucuya. Toh abteenik, kulli num siinik is qinabih xaylo akmele. Sin *subla siinih xalta xaylo akmetton; isinni qelwak lee aaqubetton.

¹⁷ Sarra sin baaxoh bis le baaxo sin beeyyo. Too baaxol darok cayyetton. Qinabak bicsen kamri kibuk elle yan baaxo. Gaqambo kee qinab xala coox kibuk elle yan baaxo.

¹⁸ Ciskiyyaahu, YALLI nee ayyaaqele iyyah immay kay yab maamanina. Aki baaxo mari yalla axcuk yaqbudem, ken baaxo Assuuriyah-malikih-gabak maay catte?

¹⁹ Camat kee Arfadal suge marih yallitte ankel tan? Safarwayimil suge marih yallitte ankel tan? Samaariyah yalli keenih xiqem maay le?

²⁰ Ta mari yallah luk yen yallitte, anu a mara ibbixe saaku, keenih xiqtem mali. Hay tonnal, YALLI Yarusalaam catelem mannal siinit celta?» keenik iyye.

²¹ Usuk yaabak gaba kale waqdi, Yuudâ-mari tu maxaccooy tibba iyye. Woh keenik aba intem Malik-Ciskiyyaahuk ten.

²² Sarrak Elaakim kee Sebna kee Yowac aben qaadah sara isinnik qanxiseenih, Assuuriyah-qaskar-abbah yan num keenik iyyem malikih warsen.