Yasaqya 35 - NABUWWA KEE MALIKWA

YALLI WADE MARIH FARCATA

¹ Bacarih tan baaxoy bakarroytah tanihiyya ruffu axcele. Lee sinniih qayso sinni bacarih tan baaxo agda akkele. Birro kulli ikkel aabukeleeh, wir axcele.

² Birro kaxxa ubkah aabukele. Bakarroytah ten baaxo farcatah qililisele. Too baaxo Lubnaan le nabna geeleeh, Karmel kee Saaron deqsitta baaxo le qaxa geele. Sahda YALLAY ni Dageltah yanihiyyah-nabna kee qaxa ablele.

³ Gabak boolate maraw, gaba tamsiisa; gulub akak axaxita maraw, guluubat maqar haysita.

⁴ Meysita marak, «Sin Dagelti yanik, mameysitinay ayti kibba haa» inxica. «Yalli sin wada'gidih, sin qaxat gaceleeh, umam siinil baahe mara digaalele» keenik inxica.

⁵ Too saaku inti maleela inti geele; ayti maleela yab aabbele.

⁶ Kos axcuk suge mari ardah wayxexxa akkele. Duuditteh suge mari yaabeleeh, farcatah qililisele. Macaay inteenik, bakarroytah sugte baaxol buyyitte darah gexele. Bacarih tan baaxok kulli ikkel lee darah gexele.

⁷ Liiqih sinam cararisak yen daqaarak kulli ikke dora akkele. Bakarbakar luk ten baaxol, mango dori racele. Wakri-dabaaqah sugte baaxol, qayso kee bayreey gorrob aabukele.

⁸ «Taahirik yan gita» deqsita giti too baaxol awqele. Taahirik ane sinni mari gitah wokkek magaca. Woo gita gactu waytam, woo gitih mara. Too gita gaca maraay tu-iggimaane le marah agantah mabadisa.

⁹ Lubak kee sahda takme garboh alluwwa woo gitat magexxa. Takkay immay Yalli dambi akah cabe maray wadehiyya too gitat gexele.

¹⁰ YALLI wade mari Siyon fanah aduurele; Siyon fanah qililisak africuk aduurelon. Too saaku aben farcatah kulli waqdi africelon. Cisab kee nadaama mayablan.