Yasaqya 34 - NABUWWA KEE MALIKWA

ELLECABÔ-COKMI

¹ Baaxol enna 'ta doolatway, inkih yoo fanah ama! Xayyoowaay, axcem yok ankacisa! Baadal tan ummatey, yi yaabah ayti ucuya! Baaxo axcem yok taabbay; baaxô-bagul yan mari yi yab cubbusay. Addunya kee addunyak eweqqa 'tam yi yaabah ayti tacaay.

² YALLI kulli baaxoh doolata'lih qeebih yan. Kay bagcarra yakkeenimiik keenil oobeleeh, ken bayselem keenil yuckumeh yan; ken marih-qidimih bical yan.

³ Keeniy yusguudeenihiyyak lafa baaxot qidelon. Ken raysay baaxot qideenihiyya abicele. Qabal qaleelâ-baguk darah innah caxitele.

⁴ Qaraanal tan cutuuka diyaayele. Qaran warkat innah xambaqimma 'yeh qellitele. Cutuuka, qinab xala cooxih caffa kee sublâ-xaylo caxak elle luqta'nnal, luuqele.

⁵ YALLIH seef qaraanal tanim baysek lakal, Edom maray baati elle amrisehiyya too seefit bayele.

⁶ Sadgatah qidan saqa edde yasguuden gilel, qabala kee xayti elle raaqa gurrah, YALLI a mara edde qidu waa seefih bagul, qabal kee xaytak mangom raaqele. Macaay inteenik, YALLI Bosrâ-magaalal sadgatah ken qideleeh; Edom baaxol ken asguudeleeh, selele.

⁷ *Gurquuy beqra kee qande-le-awur Edom marih innah ansugguudumele. Inkih tan baaxo qabalat atlukele. Diyaaye xayti elle caxite burta diimo akkele.

⁸ Macaay inteenik, YALLI cane edde gacisu waa ayro tan; too saaku YALLI Siyoonuk naqboytiitih suge maral ken taama keenil gacsele.

⁹ Edom weeqaytitte daamaar akkele; tet bullaaqe *dani akkele; inkih tan baaxo ura daamaar akkele.

¹⁰ Too gira bar kee laqoh habug axceleeh, daayiman qeerele. Adok adoh amma 'yaanam, tokkel dabaaqah num magaca; too gitak num magexa.

¹¹ Inin kee kuraani dabaq akkele; qandoola kee alak alaakulleyti dabaq akkele. Yalli num sinniih lac sinni arac tet abele; Yalli tu ginaamak dumal elle sugte'nnal, aduurele.

¹² Teetil sugte abbobti bayeleeh elle reedaanam maraqta.

¹³ Amoytittê-gaso kee gaso-maroh-edde-tan-magaalooli keenan le coox kee sissib aabukeleeh wakarwa kee inin dabaq akkele.

¹⁴ Dubaala kee yanguli dabaq akkele; dabeeli ceelo le ginnitte elle xongolta arac akkele. Bar gexxa alluwwa guubuh elle gacta'gidih wokke amaatele.

¹⁵ Inin qarwa tokkel xissiteleeh, xaylo wokkel xalele. Xale xaylok amo wagtele. Qawittek sayim kee labim inkih wokkel gaaboowele.

¹⁶ A yab YALLIH kitaabih addal geytimaah, takriyeeni'gidih gorrisa. A alluwwa inkih anele; labim kee sayim inkih wokkel sugele. A yab akak yemeetem YALLA kinnuk, a alluwwak inki ali kinni way mabaata. Ta alluwwa tokkel gaaboyselem, kay Roocaaniyya.

¹⁷ Baaxo keenih kurtu waytam YALLA'mmay, tokkel dabaaqah sugelon. Baaxo kaadu daayiman kenim akkele.