Yasaqya 33 - NABUWWA KEE MALIKWA

WADOOTUH ABEN DOOQA

¹ Sinam baysew, woyyow kot takku waytaamow! Ku baati tekkeh masuginna'mmay ahaysa akkele. Sinam ganak sugte'mmay, koo gana mari masuginna. Takkay immay sinam edde ganak ten wakti gaba kalla heeh, sinam koo edde ganta wakti amaateleeh, sinam edde bayisak ten wakti gaba kalla haa waqdi, baati kot akkele.

² YALLAW, neh emeq. Ku maqaaneh qambaalat nan. Maaci elle maacisinnaanimil maqar net hay. Gadaaminna saaku nee cat.

³ Ku xongolo radda waqdi, baadal tan ummat kudele. Atu ugutta saaku doolatwa fiik faak akkele.

⁴ Tonna luk ken duyye dannabah beeloonuuh, caben duyyel sinam qanayti innah luulele.

⁵ YALLI fayya le aracal yan Dageltaay; nabna lem kaa. Siyon-qalel qadaalat kee cakkik-tan-maqaane heele.

⁶ Tet doolatah digga akkele. Teetih dacayri akkele. Kas kee ixxiga keenih aceele. Kaxxa acwa akak 'yaanam, YALLA meysitak yassanabbeenimi.

YALLIH COKMI

⁷ Ama tableeniih gitittel kaxxa weeqah weqtam, kaxxa agiira. Amaan fanxa axcuk rubne mari edde yanim, kaxxa weeqa.

⁸ Kaxxa gitittel lac mayanaay num mayana. Meysih, num woo gitittet magexa. Sitta elle geenim makot cabte; magaalooli yibbixeenih; yassakaxxen num mayana.

⁹ Baaxo kafteeh, coox laqaymuume. Lubnaan garbo kafte. Saronuy qaxmeqe-baaxoh sugte bakarroyta tekke. Basan rasu kee Karmel qalel yan cooxuk ayyuufi luuqa.

¹⁰ YALLI iyyamaa, «Away anu ugteyyo. Away, yi nabna kee yi qande sin aybulleeyyo.

¹¹ Bicat gactem kee sin taama inkih, kafte qaysoy hebeltô xiq sinnih bis le. Sin ufuy girah innah sin cararisele.

¹² Baadal tan ummatta, girat carrisen bocok rade qadô-gombodih innah gacele.

QUSBA SIYOONU KEE TEETIL YAN MALIIKI

¹³ «Isin allal yan maraw, anu abem wagita! Garil yan maraw, yi cayla ixiga!» iyya.

¹⁴ Siyon-qalel tan dambileelat kaxxa cunxo hayte. Yalla-maleela meysih axaxitte. «A giray muxuq intak iyyi yalliile? Daayiman urta girat carariyya iyyi faxa?» iyyan.

^15-16 Cakkit taamitaah nummat yaabaah, bukko kee rado niqbaah, guqul bee waah, sinam qidim kee umaaneh abittol malisa marat angale waah, umam abittot yan marat angale waa num fayya le arac geya. Reebuh, num aleele waa boolot gacele. Yakme maaqo kee yaaqube lee mawaa.

¹⁷ Inti siinik qaxa-le-malik ablele. Usuk reedah elle yan baaxo kulli kabuk ambulleele.

¹⁸ Duma luk sugten kaxxa cunxo luk maraqtan. «Marin baaxoh maray gabbara nek beyak yenehiyya maca abe? Nee gibitak yen mari mayanaa? Amo xer qarwa nek loowak yen mari maca abe?» 'yaanam axcelon.

¹⁹ Ahaysa woo maray kaxxiinah qubbuy axcuk yenehiyya matablan. Isin aaxige waytaanaah edde rada waytan afat yaaba marin mara tahaysa matablan.

²⁰ Siyon-qaley qiidih elle asak nenehiyya wagitay; Yarusalaam magaalay qiidih elle asak nenehiyya wagitay. Yarusalaamay amaanak tanihiyya namma inti siinik ablele. Yarusalaam, siraaqay elle daabisan ikkek kate waahiyya kinni. Tet akat mayaggiriqaay masalaca.

²¹ YALLAY Misliino le tokkel ni amo wagtele. Mango weeqaytuy darah gexahiyya le magaala akkele. Takkay immay kaxxa maraakib elle magexa.

²² YALLI ni cokmaabe; madqa isih neh yayyaaqe. Ni malik kaa; nee waddu waytam kaa.

²³ Isiniiy gexu duude waa markabay dagal kee siraq edde haan akoota salacak akak tanihiyyah bis liton. Takkay immay too waqdi mango duyyey qadad sinni ni naqboytiitik buubenno. Iba-mali kinni-way gaba akak maraqsitay kaa duddam akak beele.

²⁴ Too saaku ni marih addat biyaakita num mageytima. Wokkel woo saaku dabaaqah sugu waa marih dambik Yalli qafu abele.