Yasaqya 32 - NABUWWA KEE MALIKWA

QADLI LE MALIKI

¹ Ayrok teena cakkik tanim aba malik reedele. Too dabaanal abbobtih gacu waa mari qadli le mara akkelon.

² Keenik kulli num caacok edde rebsiman reebu akkele. Kaxxa roobuk edde yaggarren reebu akkele. Bakarroytal geen darah gexxa leeh bis aallele. Caxa-sinniih reebu-sinni bacarik-bagul, silal le boolok baguk radda iraawoh bis aallelon.

³ Tohuk wadir inti le marak inti fakkiimele; ayti le marak ayti aabbele.

⁴ Sabri maleela tut radak maaciseleeh, aaxigele. Iriro le mari yab nagay qidele.

⁵ Duquurak «Kasloytiiti» m'iyyan. Xuwaw sinni anaani-leela mayassakaxxan.

⁶ Macaay inteenik, duquruk yab saaha mali. Aaminnaanimil malsaanam taamah le. Tonna leemik, YALLA cina num yakkeeh; YALLIH giddinaamak, qellat le yaabat yaaba. Qulula mara mayaskama; bakaarita mara mayafqa.

⁷ Xuwaw sinni anaani-leela umaanet assa. Tu maleela edde baysan dirab kee masaakiina cakki edde waysiisan malat gacan.

⁸ Saraf le num sarafat malsaah, saraf le taamah abittol digga 'ya; tonnal marada.

AYLAHU KALIYYA

⁹ Isin cisab sinniih kulli way farcatat tan sayyoy, siinik axcem ankacisa.

¹⁰ A saaku cayit taniinim siinik ableh immay, sanat kee abxa gufe'kal gadaama sin abbixele. Qinab coox xaylo maxala. Kudaar morbissan.

¹¹ A saaku farcaanak yan agabow, meysita! A saaku nagay yanim isik yakkale agabow, gadaamitettoonum ixiga! Sara isinnik kalay *qabuudut gaca.

¹² Buqre elle abak tanton meqe baaxo waak sugettoonuh, qinab xaylo xalak yan coox waak sugettoonu'mmay, rookitay alil isinnik ugura.

¹³ Ummat afracuk addal akak tan qarwa kee, too qarwa elle tan magaalay farci kee wallitiyyat abak sugtahiyyah weeqay rookita. Yi ummat elle tan baaxol sissib kee keenan le coox aabukele'mmay weeqay rookita.

¹⁴ Macaay inteenik, malik qari foyya akkele. Mango xongolo elle radak ten magaala abur akkele. Amo xer qariy magaala akak dacrisak sugeenihiyya foyyah raaqele. Too aracal dabookalwa kee laa aloolele.

YALLIH ROOCAANIYYA OBTU WAYTA SAAKU

¹⁵ Takkay immay sarra yan saaku, *Yallih-Roocaaniyya baaxol oobeleeh, bacarih tan baaxo baqurê-baaxo akkele. Baaxol niqmat gaceleeh mango murti orbele.

¹⁶ Qadaalat kee cakkik tan maqaane inkih tan baaxol gacele.

¹⁷ Kulli num cakkik-tan-maqaane le gitat gexeleeh, tohuk gexxaamah cisab mayalla; daayiman baaxol amaan gaceleeh nagay aniina anele.

¹⁸ YALLIH mari isi buxal cisaabak amaanah xiineleeh; gadaamak affoofele.

¹⁹ Garbol kaxxa arroqle raddaamah, magaala abuuruh raqtaamah,

²⁰ tohuh isin, isinni baaxol niqmatat gacetton. Leek garil qidinnaan daro siinih aabukeleeh; laa kee danoona maatah gaceleeh aloolele.