Yasaqya 31 - NABUWWA KEE MALIKWA

BAATI KEE WADIYYA

¹ Masri fan catoh gexa maraw, sin ikke tekkem ixiga. Isin cato Israayil doore Dageltay *kudduusuk yanil messertan; YALLAL kibaal mahaytaana'mmay, Masri-marih-fariisa kee, mango faras-gaariiray oson loonuhiyya kee, ken maray faras-amok-qeebi-abahiyyal kibaal haan.

² YALLI kas leeh; bala oobissem kaa. Usuk iyyem aba. Tonna-leemiik sarri-leelal gaba qideleeh, umaane aba marah cato yakke maral kaadu gaba heele.

³ Tonna'mmay Masri mari sinaamak kaxxih sahda ikkal, Yalla hinnoonum taaxigeenimi. Oson lon faaris, gersi faariisak kaxxih akak yaniinim, cado kee xagara ikkal, malayka hinnon. YALLI gaba siinil qidu waa saaku, cato elle essertan mara kee cato essera marak inkih baati sin qambaltam ixiga.

⁴ Macaay inteenik, YALLI yok iyyemii, «Lubak admoh baahe laahih cado yakme waqdi, lacti duwat suge mari yakkeemiik kaa fan dadha way, kaat kaayan way, keenik mameysita. Lac kaak raaqisaanam faxan way, hinnigga keenih m'iyya. Nabaamak Naba Dagelti kaadu too lubaakih innah, Siyon-qalel qeebi abuh yamaate waqdi, kaa akak waasu waa num mayan.

⁵ Kimbiro isi qari galwat akah reebissa'nnal, YALLAY Nabaamak Nabahiyya Yarusalaam-magaala umaanek reebiseleeh, tet wadele» yok iyye.

YALLI ISRAAYILIH ABU WAAMA

⁶ Israayil maraw, YALLAL uduura. YALLAT darre cabteenih taniinik, YALLAL uduura.

⁷ Macaay inteenik, too ayro, lakqo kee dahabak dambi-le-gaboobit bicissen duyyey Yalla axcuk taqbudeenihiyya baaxot qidetton.

⁸ «Assuuriyah mari seefit ambaxele'mmay, toh sahdayti bicse seef hinna. Ken mari too seefik kudele. Ken furrayna naqoosay dirkih tamsiisaana akkele.

⁹ Ken malikiy ken dacayrih yene cunxot bayele. Carbi-abbobti meysik gexxaamah, carbi qalaamatih sinbil baaxot qideenih cabelon. Ahat yabtam, yoo YALLAY Siyon-qaleh amol solal girah innah urahiyya.